Ebaibol na ọ ta nọ ofu nọ a re mu vrẹta o rẹ wha enwoma ze, yọ onana o rẹ sai kpomahọ ohwo nọ o mu ofu na gbe amọfa. (Itẹ 29:22) Dede nọ eware jọ e sae whae ze nọ ohwo o re ro mu ofu ẹsejọ, Ebaibol na ọ ta nọ ahwo nọ a re mu “ofu-ọkpoo” a ti wo esiwo ho. (Ahwo Galesha 5:19-21) A rẹ jọ Ebaibol na ruẹ ehri-izi nọ e rẹ sai fiobọhọ kẹ ohwo kpọ ofu riẹ.

•  Kọ o thọ re a mu ofu ẹsejọ?

•  Okevẹ ofu nọ a re mu o rọ thọ?

•  Ẹvẹ whọ sae rọ kpọ ofu ra?

•  Eria Ebaibol nọ e ta kpahe ofu-omuo

 Ijo. Eware jọ e sae whae ze nọ ohwo o re ro mu ofu ẹsejọ. Wọhọ oriruo, okenọ Nehemaya o yo nọ a bi kienyẹ ibe egegagọ riẹ jọ ‘eva e dha riẹ gaga.’​—Nehemaya 5:6.

 Evaọ ẹsejọ, Ọghẹnẹ o re mu ofu. Wọhọ oriruo, nọ ahwo Izrẹl oke anwae a raha ọvọ nọ a re kugbe Ọghẹnẹ inọ ọye ọvo a rẹ gọ je mu eghẹnẹ erue họ ẹgọ, “Jihova o te mu ofu gaga kẹ” ahwo Izrẹl na. (Ibruoziẹ 2:13, 14) O make rrọ ere na, ofu-omuo o rrọ usu iruemu Jihova Ọghẹnẹ hẹ. Jihova o re mu ofu nọ o tẹ gwọlọ ere yọ ọ rẹ kpọ ofu riẹ ẹsikpobi.​—Ọnyano 34:6; Aizaya 48:9.

 Ofu nọ a re mu gheghe gheghe hayo nọ a re mu vrẹta o thọ, yọ ahwo-akpọ nọ a gba ha a re mu oghẹrẹ ofu otiọnana gaga. Wọhọ oriruo:

•   Nọ Ọghẹnẹ ọ se idhe Keni “eva e tẹ dha Keni gaga.” Eva e dha Keni te epanọ o ro kpe oniọvo riẹ.​—Emuhọ 4:3-8.

•   Nọ Jona ọruẹaro na ọ ruẹ nọ Ọghẹnẹ ọ rọvrẹ ahwo Nanivi nọ a kurẹriẹ no, “eva e tẹ jẹ dhae gaga.” Rekọ Ọghẹnẹ ọ kpọ Jona họ, ọ ta kẹe nọ “u kiehọ re [o] mu ofu ga tere” he. Ọ tẹ jẹ ta kẹ Jona nọ ọ hai wo ọdawẹ kẹ erahaizi yena nọ i kurẹriẹ na.​—Jona 3:10–4:1, 4, 11. a

 Iriruo nana i dhesẹ nọ ofu ohwo-akpọ nọ ọ gba ha “u re ru ei ru oware nọ u kiẹrẹe evaọ aro Ọghẹnẹ hẹ”—Jemis 1:20.

•   Riẹ enwoma nọ i re noi ze nọ ohwo ọ gbẹ kpọ ofu riẹ hẹ. Ahwo jọ a re roro nọ ohwo nọ o re mu ofu gaga họ ohwo nọ ọ mai wo ogaga. Uzẹme riẹ họ, ohwo nọ ọ rẹ sae kpọ ofu riẹ hẹ yọ ọyẹlẹ. “Wọhọ okpẹwho nọ a vẹro nọ o wo igbẹhẹ hẹ, ere ohwo nọ ọ rẹ sae kpọ ofu riẹ hẹ ọ rrọ.” (Itẹ 25:28; 29:11) Rekọ nọ ma tẹ be hae daoma kpọ ofu mai, u re dhesẹ nọ ma gine wo ogaga gbe orimuo. (Itẹ 14:29) Ebaibol na ọ ta nọ: “Ohwo nọ ọ rẹ kaki mu ofu hu o woma vi ọgba.”​—Itẹ 16:32.

•   Daoma kpọ ofu ra re whọ siọ oware nọ who te vioja riẹ ẹdẹfa ba eru. Olezi 37:8 o ta nọ: “Nyasiọ evedha ba re whọ siọ ofu-omuo ba; whọ jọ eva e dha owhẹ re whọ nyai ru oware umuomu hu.” Muẹrohọ nọ etenẹ na ọ ta nọ, nọ ofu o te mu omai, ma sae salọ oware nọ ma re ru, koyehọ, ma sae kpọ ofu na re ma siọ “oware umuomu” ba eru. Ahwo Ẹfisọs 4:26 o ta nọ “wha sai mu ofu, rekọ wha raha uzi hi.”

•   O tẹ lọhọ, nyavrẹ nọ ofu o tẹ be gwọlọ mu owhẹ. Ebaibol na ọ ta nọ: “Ohọre nọ a re muhọ o wọhọ unuẹthẹ ame nọ a bi rovie; taure ẹwhọ o te ti du lahwe, nyavrẹ.” (Itẹ 17:14) Dede nọ u fo re a ku ẹwhọ họ vẹrẹ vẹrẹ, o gwọlọ nọ ofu ra avọ ọrọ ohwo nọ wha gbe wo ẹwhọ na o re kpotọ no tao, re wha sae ta ẹme na dhedhẹ.

•    Riẹ uzẹme ẹme na. Itẹ 19:11 o ta nọ: “Otoriẹ udidi nọ ohwo o wo u re hrẹ ofu riẹ kpotọ.” U fo nọ ma rẹ riẹ uzẹme ẹme nọ ọ rrọ otọ na tao, taure ma te ti ku ei họ nọ ere ẹme na ọ ginẹ rrọ. Nọ ma tẹ romatotọ gaviezọ kẹ oware nọ o via, ẹsejọhọ ma ti gbe mu ofu dede he.​—Jemis 1:19.

•    Lẹ re who wo udu udhedhẹ. Olẹ o sai fiobọhọ kẹ owhẹ wo “udhedhẹ Ọghẹnẹ nọ u vi otoriẹ kpobi.” (Ahwo Filipai 4:7) Olẹ yọ edhere jọ nọ ma re ro wo ẹzi ọfuafo Ọghẹnẹ, onọ u re fiobọhọ kẹ omai wo iruemu wọhọ udhedhẹ, odiri, gbe oma-onyẹ.​—Luk 11:13; Ahwo Galesha 5:22, 23.

•   Romatotọ salọ egbẹnyusu ra. Ma rẹ gwọlọ raro kele egbẹnyusu mai. (Itẹ 13:20; 1 Ahwo Kọrint 15:33) Oyejabọ nọ Ebaibol na ọ rọ vẹvẹ omai unu nọ: “Who lele ohwo nọ o wo ofu ọkpakpata nya usu hu hayo kuomagbe ohwo nọ ọ rẹ kaki mu ofu hu.” Fikieme? “Re who gbe wuhrẹ uruemu riẹ vievie he nọ u re ru owhẹ kie ruọ agbefẹ.”​—Itẹ 22:24, 25.