Ebaibol na ọ tuduhọ omai awọ nọ ma rehọ unevaze kẹ okẹ jẹ rehọ emamọ ẹjiroro kẹ okẹ na. Onana o rẹ wha evawere se ohwo nọ a kẹ okẹ na gbe ọnọ ọ kẹ okẹ na. (Itẹ 11:25; Luk 6:38) Jesu ọ ta nọ: “Ẹkẹ evawere e mae rrọ vi emio.”​—Iruẹru Ikọ 20:35.

•  Okevẹ okẹ mai o rẹ rọ were Ọghẹnẹ?

•  Okevẹ okẹ mai o gbẹ rọ were Ọghẹnẹ hẹ?

•  Eria Ebaibol sa-sa nọ e ta kpahe okẹ nọ a rẹ kẹ

 Okẹ mai o rẹ were Ọghẹnẹ otẹrọnọ u no omai eva ze. Ebaibol na ọ ta nọ: “Jọ ohwo kpobi o ru wọhọ epanọ ọ gba riẹ mu evaọ udu riẹ, orọnikọ avọ oma eheho ho hayo ọgbahọ họ, keme Ọghẹnẹ o re you ohwo nọ ọ rẹ rọ evawere kẹ okẹ.”​—2 Ahwo Kọrint 9:7, ẹme-obotọ.

 Okẹ nọ u no eva ze yọ abọjọ “oghẹrẹ egagọ nọ” Ọghẹnẹ ọ jẹrehọ. (Jemis 1:27) Ohwo nọ o re ru ahwo nọ a gwọlọ obufihọ ọghọ o re ru Ọghẹnẹ eva were, yọ Ọghẹnẹ o rri ọghọruo utiọnana wọhọ ẹsenọ a bi momo iei kẹ ọyomariẹ. (Itẹ 19:17) Ebaibol na ọ ta nọ Ọghẹnẹ ọ te hwosa kẹ ọnọ ọ be kẹ amọfa na.​—Luk 14:12-14.

 Nọ ohwo ọ gbẹ rọ emamọ eva kẹ okẹ na ha. Wọhọ oriruo, nọ ma tẹ kẹ okẹ:

•   Re amọfa a ruẹsi jiri omai.​—Matiu 6:2.

•   Avọ ẹjiroro nọ amọfa a te wha zihe kẹ omai.​—Luk 14:12-14.

•   Re Ọghẹnẹ ọ ruẹsi siwi omai.​—Olezi 49:6, 7.

 A tẹ be rehọ okẹ na ru eware nọ Ọghẹnẹ o mukpahe. Wọhọ oriruo, o thọ re a kẹ omọfa ugho re o ro fi edhọ, dẹ igbo hayo isigareti nọ a re vovo, hayo dẹ udi ogaga nọ ọ rẹ da vrẹ ẹta. (1 Ahwo Kọrint 6:9, 10; 2 Ahwo Kọrint 7:1) Epọvo na re, ohwo nọ ọ rẹ sai ruiruo ọ tẹ se nọ o re ruiruo ho, u fo ho re a kẹ ohwo otiọye na ugho.​—2 Ahwo Tẹsalonika 3:10.

 Nọ u te bi ru ei bẹbẹ kẹ ohwo na re ọ sae rẹrote uviuwou riẹ. Ebaibol na ọ ta nọ enọ i wuzou uviuwou a rẹ rẹrote ahwo uviuwou rai hrọ. (1 Timoti 5:8) U fo ho re enọ i wuzou uviuwou a fiobọhọ kẹ amọfa yọ ahwo uviuwou gbe imoni rai a be reoja. Epọvo na re, Jesu o brukpe ahwo nọ a se nọ a rẹ rẹrote esẹgbini rai nọ ekpako no ho, enọ e be ta nọ eware nọ a wo kpobi yọ “okẹ nọ a ro mudhe kẹ Ọghẹnẹ.”​—Mak 7:9-13.