Nọ Ebaibol o je dhesẹ ohẹriẹ nọ o rrọ udevie enọ e ginẹ rrọ egagọ uzẹme gbe enọ e rrọ họ, ọ tẹ ta nọ: “Ibi rai wha re ro vuhu ai. A rẹ sae kọrọ otiowo-eni no idhigbo ze he hayo kọrọ ibi ifigi no enwẹnwẹ ze he, kọ a sai ru ere?” (Matiu 7:16) Nwane wọhọ epanọ whọ rẹ sae rehọ ibi nọ ure otiowo-eni gbe ọrọ enwẹnwẹ e mọ ro vuhu ai na, ere ọvona a sae rehọ ibi nọ egagọ ọ be mọ ro vuhu ei sọ ọrọ uzẹme hayo ọrue, hayo whọ sae jẹ rehọ iruemu nana vuhu ei re.

1.   Egagọ uzẹme i re wuhrẹ uzẹme nọ o rrọ Ebaibol na, orọnọ eriariẹ ahwo-akpọ họ. (Jọn 4:24; 17:17) U fo nọ a re wuhrẹ ahwo oware nọ ẹwẹ ọ rrọ, je ru ae riẹ epanọ a sae rọ rria uzuazọ bẹdẹ bẹdẹ evaọ aparadase otọakpọ nọ ma bi rẹro riẹ na. (Olezi 37:29; Aizaya 35:5, 6; Izikiẹl 18:4) Yọ u fo nọ egagọ e rẹ ko ahwo nọ i ru eware iyoma dhere he.—Matiu 15:9; 23:27, 28.

2.   Egagọ uzẹme i re fiobọhọ kẹ ahwo riẹ Ọghẹnẹ, i re wuhrẹ ahwo nọ odẹ riẹ họ Jihova. (Olezi 83:18; Aizaya 42:8; Jọn 17:3, 6) Yọ i re wuhrẹ nọ Ọghẹnẹ o thabọ no ahwo-akpọ họ hayo a sae jọ Ogbẹnyusu riẹ hẹ; ukpoye, egagọ uzẹme i re ru ahwo riẹ nọ Ọghẹnẹ ọ gwọlọ nọ ma jọ egbẹnyusu riẹ.—Jemis 4:8.

3.   Egagọ uzẹme o re dhesẹ Jesu Kristi wọhọ ọnọ Ọghẹnẹ ọ rehọ siwi omai. (Iruẹru Ikọ 4:10, 12) Ahwo nọ a rrọ egagọ na kpobi a re yo uzi kpobi nọ Jesu ọ kẹ jẹ daoma lele oriruo riẹ.—Jọn 13:15; 15:14.

4.   Egagọ uzẹme i re ru ahwo riẹ nọ Uvie Ọghẹnẹ ọvo họ ẹruore nọ ahwo-akpọ a wo. Yọ ahwo nọ a rrọ egagọ na a rẹ vuẹ amọfa kpahe Uvie na.—Matiu 10:7; 24:14.

5.   Egagọ uzẹme i re wuhrẹ ahwo re a you ohwo kpobi no eva ze. (Jọn 13:35) U re wuhrẹ ahwo re a rọ adhẹẹ kẹ ahwo ẹvẹrẹ kpobi je dede oghẹrẹ ohwo kpobi rehọ, te ahwo ovioma ofa, ahwo ẹvẹrẹ ọfa gbe ahwo oghẹrẹ uyerakpọ kpobi. (Iruẹru Ikọ 10:34, 35) Ahwo nọ a rrọ egagọ uzẹme a re kpoho ẹmo ho fikinọ a you amọfa.—Maeka 4:3; 1 Jọn 3:11, 12.

6.   Egagọ uzẹme i wo osu ọvuọvo nọ a rẹ hwosa ha, yọ o re mu edẹ ọkwa kẹ ohwo ọvo ho.—Matiu 23:8-12; 1 Pita 5:2, 3.

7.   Egagọ uzẹme o re wo obọ vievie he evaọ ẹme esuo egọmeti. (Jọn 17:16; 18:36) Ghele na, ahwo nọ a rrọ eva riẹ a re yoẹme kẹ egọmeti, onọ o rọwokugbe uzi nọ Ebaibol na ọ kẹ: “Wha hwa eware Siza zihe kẹ Siza, [koyehọ egọmeti nọ o bi su na], rekọ eware Ọghẹnẹ kẹ Ọghẹnẹ.”—Mak 12:17; Ahwo Rom 13:1, 2.

8.   Egagọ uzẹme i re zihe ro ẹkoma ohwo, orọnikọ thakpinọ a gọ hayo a ta nọ ma gọ ma jẹ be gọ họ. Ohwo nọ ọ rrọ eva riẹ kpobi o re koko izi Ebaibol na evaọ edẹ uzuazọ riẹ kpobi. (Ahwo Ẹfisọs 5:3-5; 1 Jọn 3:18) Orọnikọ izi Ọghẹnẹ i keke hrọ nọ u re ru ohwo jọ ọkọkora ha, ukpoye, eva e rẹ were ohwo kpobi nọ ọ be gọ “Ọghẹnẹ evawere” na.—1 Timoti 1:11.

9.   Ahwo nọ e te jọ egagọ uzẹme a ti bu hayo wo ẹgba te egagọ efa ha. (Matiu 7:13, 14) Ẹsibuobu a re rri ahwo nọ e rrọ egagọ uzẹme vo, se ai ẹkoko hayo tube gboja kẹ ae dede fikinọ a bi ru oreva Ọghẹnẹ.—Matiu 5:10-12.

Orọnikọ ‘egagọ nọ i kiehọ omẹ oma ọna’ oye u re ru ei fihọ ọrọ uzẹme he

 Ohwo ọ sae kie ruọ ọgọdọ lọlọhọ otẹrọnọ ọ salọ egagọ jọ fikinọ eye e mae were iẹe. Ebaibol ọ ta nọ oke o be tha nọ ahwo “a ti koko iwuhrẹ [egagọ] họ kẹ omarai re a wuhrẹ ae eware nọ e rẹ were ai ezọ.” (2 Timoti 4:3) Rekọ, oware nọ Ebaibol ọ ta nọ ma ru họ, ma lele “egagọ nọ e rrọ fuafo nọ u gbeku hu evaọ aro Ọghẹnẹ gbe Ọsẹ mai,” o tẹ make rọnọ egagọ na e gbẹ make viodẹ dede he.—Jemis 1:27, oruvẹ-obotọ; Jọn 15:18, 19.