A rẹ rọ ẹme na “Emamọ Ohwo Sameria” ro dhesẹ ohwo nọ o re fiobọhọ kẹ ahwo nọ a gwọlọ obufihọ. A rehọ ẹme na no iku hayo ọtadhesẹ jọ nọ Jesu ọ kẹ ze. Jesu ọ ta evaọ ọtadhesẹ na nọ emamọ ọrivẹ o re fiobọhọ kẹ amọfa ghelọ orẹwho nọ a no ze hayo ovioma rai. a

Ma te jọ uzoẹme nana ta kpahe eware nana

•  Eme ọ via evaọ ọtadhesẹ “Emamọ Ohwo Sameria” na?

•  Fikieme Jesu ọ rọ kẹ ọtadhesẹ na?

•  Eme ma rẹ sai wuhrẹ no ọtadhesẹ na ze?

•  Amono họ ahwo Sameria na?

•  Kọ iku “Emamọ Ohwo Sameria” na yọ oware nọ o ginẹ via?

Joma ta kpahe iku nọ Jesu o gbe kpahe “Emamọ Ohwo Sameria” na kpẹkpẹe: Ọzae Ju jọ o je no Jerusalẹm kpobọ Jẹriko. Igbulegbu a te kru rie evaọ edhere, a te mi ei eware riẹ, a te kpei kẹle uwhu jẹ nyase iẹe ba.

Nọ ozerẹ Ju jọ ọ nyaku ei avọ emela nọ e vọ riẹ oma ọ tẹ nyase iẹe ba, yọ epọvo na osu egagọ ahwo Ju ọfa jọ o ru re. Dede nọ orẹwho ọvona aimava na gbe ohwo nọ igbulegbu a kpe kẹle uwhu na a no ze, a rọwo fiobọhọ kẹe he.

Uwhremu na ọzae jọ nọ ọ rrọ ohwo orẹwho ọfa ọ tẹ jẹ nya edhere na vrẹ. Ohwo Sameria ọ jọ. (Luk 10:33; 17:16-18) Nọ ọ ruẹ e riẹ ohrọ riẹ o tẹ re iẹe, fikiere ọ tẹ gba emela riẹ na. Ọ tẹ wọe kpohọ uwou nọ erara i re wohọ. Ọ tẹ jọ etẹe rẹrote ei bẹsenọ oke o rọ ke. Evaọ okiokiọ riẹ, ọ tẹ kẹ ọnọ ọ be rẹrote oria na ugho re ọ rẹrote ọzae na, jẹ vuẹe nọ ọ te hwa ugho ọfa kpobi nọ ọ raha kẹe nọ o te zihe ze.—Luk 10:30-35.

Jesu o gbiku nana kẹ ọzae jọ nọ o je roro nọ ahwo nọ a no orẹwho riẹ ze ọvo họ erivẹ riẹ. Ọ jẹ gwọlọ rọ iku nana wuhrẹ iẹe obọdẹ oware jọ inọ orọnikọ ohwo nọ ọ rrọ ohwo Ju ọvo họ “ọrivẹ” riẹ hẹ, rekọ te amọfa nọ a rrọ ahwo Ju hu. (Luk 10:36, 37) A kere iku nana fihọ Ebaibol na re ohwo kpobi nọ ọ gwọlọ ru oware nọ o rẹ were Ọghẹnẹ, o ve wuhrẹ oware jọ noi ze.—2 Timoti 3:16, 17.

Iku na i wuhrẹ omai nọ emamọ ọrivẹ o re dhesẹ nọ ọ be re ohrọ amọfa nọ o te ru oware jọ ro fiobọhọ kẹ ae. Emamọ ọrivẹ o re fiobọhọ kẹ ohwo nọ ọ be ruẹ uye ghelọ oria nọ o no ze, orẹwho riẹ, hayo ovioma riẹ. O re ru emamọ eware kẹ amọfa wọhọ epanọ ọ gwọlọ nọ a ru kẹe.—Matiu 7:12.

Ahwo Sameria a jẹ rria ẹkwotọ nọ ọ jọ ẹkpẹlobọ ovatha-ọre Judia. Ahwo nana jọ yọ ahwo nọ a no uyẹ ahwo Ju nọ a rehọ ahwo erẹwho efa ze.

Evaọ etoke ikpe-udhusoi ọsosuọ na, yọ ahwo Sameria a wo egagọ obọrai no. A rọwo nọ ebe isoi ọsosuọ ọrọ Ikereakere Hibru na i no obọ Ọghẹnẹ ze, rekọ a fievahọ enọ i kiọkọ họ.

Evaọ oke Jesu, ahwo Ju buobu a jẹ hai rri ahwo Sameria nyenyenye, fikiere a jẹ hai ru oware ovo kugbe ae he. (Jọn 4:9) Ahwo Ju jọ dede a jẹ hae rọ ẹme na “Ohwo Sameria” rọ wọviẹ ohwo.—Jọn 8:48.

Ebaibol na ọ ta ha sọ ọtadhesẹ ohwo Sameria na yọ iku oware nọ o ginẹ via. Dede na, nọ Jesu o te bi wuhrẹ ahwo, ọ jẹ hae ta kpahe uruemu ẹwho gbe eria nọ ahwo a riẹ ziezi re ahwo nọ a be gaviezọ kẹe a sai wo otoriẹ oware nọ o bi wuhrẹ na.

Eware jọ nọ ọ ta kpahe evaọ iku na e rrọ gbagba. Wọhọ oriruo:

• Edhere nọ o no obọ Jerusalẹm kpobọ Jẹriko o theri vrẹ ikilomita 20, yọ o kuwhrẹrẹ kpotọ te ikilomita ọvo. Jesu ọ jọ ọtadhesẹ na ta nọ ohwo na ọ jẹ nya “no obọ Jerusalẹm ziọ otọ” kpobọ Jẹriko.—Luk 10:30.

• Izerẹ gbe ahwo Livae nọ e jẹ rria Jẹriko a jẹ hae nya edhere yena kpobọ Jerusalẹm.

• Igbulegbu a jẹ hai dhere eria jọ evaọ edhere na, re a kru ahwo nọ a bi kpohọ erẹ, maero kọ ahwo nọ ae ọvo a rrọ usu.