Uzioraha yọ oware nọ ohwo o ru, hayo oware nọ o bi roro evaọ udu riẹ nọ o rọwokugbe oreva Ọghẹnẹ hẹ. U kugbe izi Ọghẹnẹ nọ ohwo ọ rẹ lavrẹ nyai ru oware uyoma hayo oware nọ u kiẹrẹe he evaọ aro Ọghẹnẹ. (1 Jọn 3:4; 5:17) Ebaibol ọ tẹ jẹ ta re nọ ohwo ọ tẹ riẹ oware nọ u fo eruo nọ o gbe ru ei hi, yọ uzioraha.—Jemis 4:17.

 Evaọ evẹrẹ nọ a ro kere Ebaibol na evaọ oke ọsosuọ, uzioraha u dhesẹ “epanọ a rẹ ma obọ thọ” hayo ohwo ọ ma obọ te he. Wọhọ oriruo, isoja buobu evaọ oke emọ Izrẹl a riẹ epanọ a rẹ sa urọba gaga, “a rẹ ma obọ thọ họ.” A tẹ rọ ere fa ẹme yena, koyehọ u dhesẹ nọ “ọ rẹ raha uzi hi.” (Ibruoziẹ 20:16) Fikiere, nọ ohwo ọ tẹ raha uzi yọ u dhesẹ nọ ọ ma izi Ọghẹnẹ na te he.

 Ọghẹnẹ o wo udu nọ o re ro fi izi họ kẹ ahwo akpọ, keme ọye họ Ọmemama. (Eviavia 4:11) O wo udu nọ ọ sae rọ rehọ oware nọ ma ru ro gu omai ẹdhọ.—Ahwo Rom 14:12.

Kọ o lọhọ inọ ohwo ọ rẹ raha uzi vievie he?

 Ijo. Ebaibol ọ ta nọ “ahwo kpobi a raha uzi no, a be sai dhesẹ oruaro Ọghẹnẹ via ha.” (Ahwo Rom 3:23; 1 Ivie 8:46; Ọtausiuwoma Na 7:20; 1 Jọn 1:8) Ẹvẹ o jẹ rrọ ere?

 Adamu avọ Ivi nọ a jọ ahwo ọsosuọ nọ Ọghẹnẹ ọ ma, a raha uzi hi evaọ oke emuhọ. Keme uwoho riẹ ọ rọ mae fikiere a jọ gbagba. (Emuhọ 1:27) Rekọ no umuo okenọ a rọ ghẹmeeyo kẹ Ọghẹnẹ, a gbẹ jọ ahwo ọgbagba ha. (Emuhọ 3:5, 6, 17-19) Nọ a mu emọ họ eyẹ no, azẹ sebaẹgba gbe uzioraha o tẹ ruọ emọ rai oma. (Ahwo Rom 5:12) O nwane rọwokugbe ẹme nọ Devidi ovie na ọ ta, “eva eyoma a jẹ yọrọ omẹ.”—Ilezi 51:5.

Kọ izieraha jọ e gbẹdẹ vi ejọ?

 Ee. Wọhọ oriruo, Ebaibol ọ ta nọ ahwo nọ a jọ Sọdọm a “yoma gaga, a je ru umuomu,” “izieraha rai ethọesiwa.” (Emuhọ 13:13; 18:20) Kiẹ eware esa jọ riwi nọ i re dhesẹ epanọ uzioraha o sae rro hayo gbẹdẹ te.

1.   Ẹgbẹdẹ. Ebaibol ọ vẹvẹ omai unu nọ ma whaha izieraha ilogbo wọhọ ọfariẹ-ogbe, edhegọ, uji-tho, idieda-thomawa, ofruriọ, ohwo-okpe, gbe iruẹru-imizi. (1 Ahwo Kọrint 6:9-11; Eviavia 21:8) Ebaibol na o dhesẹ nọ izieraha nana i wo ohẹriẹ no eme igheghẹ eta, hayo izieraha nọ e thọ ohwo obọ, wọhọ oriruo, eme edada hayo oware odada nọ a rẹ sae ru omọfa. (Itẹ 12:18; Ahwo Ẹfẹsọs 4:31, 32) Ghele na, orọnikọ Ebaibol ọ be ta nọ ma rri uzioraha jọ vo ho, keme ere ohwo ọ rẹ rọ raha uzi ulogbo re.—Matiu 5:27, 28.

2.   Oware nọ o wha riẹ ze. Ahwo buobu a rọ ogbori raha uzi no keme a riẹ nọ oware nọ a ru na o rẹ dha Ọghẹnẹ eva ha. (Iruẹru Ikọ 17:30; 1 Timoti 1:13) Dede nọ Ebaibol o rri izieraha itieye na vo ho, Ebaibol ọ ta nọ i wo ohẹriẹ no izi Ọghẹnẹ nọ a rọ aro koko la vrẹ. (Ikelakele 15:30, 31) Imuemu aro koko i re no udu “umuomu” ze.—Jerimaya 16:12.

3.   Ẹkpekpe. Ebaibol na o ti je dhesẹ nọ o hẹriẹ o rrọ uzioraha ẹsiẹvo gbe onọ a re dhe erueru. (1 Jọn 3:4-8) Ohwo kpobi nọ o “keke aro fihọ raha uzi,” maero nọ o te wuhrẹ kpahe oware nọ o rẹ dha Ọghẹnẹ eva no, Ọghẹnẹ ọ te rehọ iẹe guẹdhọ.—Ahwo Hibru 10:26, 27.

 Udu nọ u re brukpe ohwo nọ ọ raha uzi ulogbo o rẹ tubẹ gbẹdẹ vi uzi nọ ọ raha na dede. Wọhọ oriruo, Devidi ovie na o kere nọ: “Eyoma mẹ o kie ruru uzou mẹ wọhọ owha ogbẹgbẹdẹ; o gbẹdẹ vi omẹ.” (Ilezi 38:4) Rekọ Ebaibol ọ vuẹ omai nọ: “Jọ o ru umuomu ọ se umuomu riẹ ba, gbe ohwo oyoma ọ se ekpehre iroro riẹ ba. Jọ o zihe bru ỌNOWO na, re ọ re iẹe ohrọ, bru Ọghẹnẹ mai, keme ọ rẹ te rehọ vrẹ owhẹ.”—Aizaya 55:7.