Jesu ọ fodẹ obọdẹ edhere jọ nọ ma re ro lele amọfa yeri. Oke nọ ọ jẹ kẹ ovuẹ obọ ugbehru nọ ahwo a riẹ gaga na, ọ ta nọ: “Eware kpobi nọ wha gwọlọ nọ ahwo a ru kẹ owhai, o gba owhai họ nọ eye wha re ru kẹ ae re.” (Matiu 7:12; Luk 6:31) Oghẹrẹ ofa nọ a fa ẹme nana họ: “Koware koware nọ wha guọlọ nọ ahwo a ru kẹ owhai, wha ru i tieye kẹ ai re.”​—Ebaibol Ẹri Na.

•  Eme họ otọ ẹme Jesu na?

•  Fikieme u ro woma re ma ru epanọ Jesu ọ ta na?

•  Kọ Jesu ọ be ta nọ ma ru ewoma kẹ ahwo re a ruẹsi ru kẹ omai?

•  Ẹvẹ ma sai ro ru epanọ Jesu ọ ta na?

 Ẹme nọ Jesu ọ be ta na họ, ma ru amọfa epanọ ma hae gwọlọ nọ a ru omai. Wọhọ oriruo, o rẹ were omai nọ ahwo a tẹ kẹ omai adhẹẹ, dhesẹ uwowou kẹ omai, je ru eware nọ i dhesẹ nọ a you omai. Kọ u gbe ti woma re ma “ru epọvo na kẹ ae re”?​—Luk 6:31.

 Ma te ru epanọ Jesu ọ ta na, u re fiobọhọ gaga evaọ kabọ kabọ uzuazọ. Irere jọ nọ ma re wo họ:

•   O rẹ lẹliẹ evawere jọ orọo.​—Ahwo Ẹfisọs 5:28, 33.

•   U re fiobọhọ kẹ esẹgbini yọrọ emọ rai ziezi.​—Ahwo Ẹfisọs 6:4.

•   O rẹ lẹliẹ egbẹnyusu kpekpe, lẹliẹ ahwo nọ a be rria oria ovo rria kugbe ziezi, jẹ lẹliẹ ahwo nọ a bi ru iruo evaọ oria ovo riẹ yeri.​—Itẹ 3:27, 28; Ahwo Kọlọsi 3:13.

 Ma te rri izi sa-sa nọ Jihova o jie evaọ Ọvọ Anwae na, ma rẹ ruẹ nọ ọkpọ uruemu ovona Jihova ọ gwọlọ nọ idibo riẹ a wo. Uruemu nana nọ Jesu ọ ta nọ ma wo na “họ otofa Uzi na [koyehọ obe Emuhọ rite Iziewariẹ] gbe eme Eruẹaro na [ebe nọ eruẹaro Ọghẹnẹ a kere].” (Matiu 7:12) Ugogo oware nọ Ọvọ Anwae na o bi wuhrẹ họ, ma you erivẹ mai. Yọ uyoyou ọvona Jesu ọ be ta nọ ma wo na.​—Ahwo Rom 13:8-10.

 Ijo. Orọnikọ oware nọ ma re ru re amọfa a ruẹsi ru eware kẹ omai oye Jesu ọ be ta ha. Oware nọ o bi wuhrẹ omai na họ, ma thakpi ru ewoma ọvo. Oke nọ Jesu ọ rọ ta ẹme na, ọ tubẹ ta nọ ma ru ewoma kẹ ewegrẹ mai. Yọ ma riẹ nọ o rẹ vẹrẹ tere he re ọwegrẹ ohwo o ru ewoma kẹe. (Luk 6:27-31, 35) Fikiere, Jesu ọ gwọlọ nọ ma hai ru ewoma kẹ ohwo kpobi, te a ru kẹ omai te a ru kẹ omai hi.

1.  1. Muẹrohotọ. Who te muẹrohotọ ziezi, whọ te riẹ epanọ eware e rrọ kẹ ahwo. Wọhọ oriruo, whọ sae ruẹ ohwo nọ ọ wọ ewha egbẹgbẹdẹ, whọ sai yo inọ ohwo jọ nọ ọ be rria kẹle owhẹ ọ rrọ obọ ẹsipito, hayo whọ sai yo nọ oware jọ o via kẹ ohwo jọ nọ wha gbẹ rrọ iruo. Whọ tẹ be hae “gwọlọ . . . ewoma amọfa,” hayo fiẹrohotọ ziezi, whọ sae ruẹ ebẹbẹ jọ nọ a wo, who ve fiobọhọ kẹ ae.​—Ahwo Filipai 2:4.

2.  2. Jọ eware nọ e da amọfa e da owhẹ re. Who te yo nọ oware jọ o via kẹ ohwo, dai roro epanọ o rẹ jọ owhẹ oma o hae jọnọ whẹ o via kẹ. (Ahwo Rom 12:15) Whọ tẹ be hae daoma riẹ epanọ oware o be kẹ omọfa uye te, whọ te gwọlọ fiobọhọ kẹe.

3.  3. Kareghẹhọ nọ ahwo kpobi a rrọ epọvo ho. Oware nọ o rẹ were ọjọ o rẹ were ọjọ họ. Ẹsejọhọ oware nọ whọ hae te gwọlọ nọ a ru kẹ owhẹ, oye omọfa ọ te gwọlọ nọ a ru kẹe he. Fikiere, whọ tẹ gwọlọ fiobọhọ kẹ ohwo, daoma riẹ onọ who ti ru kẹe nọ o te mai kiehọ iẹe oma.​—1 Ahwo Kọrint 10:24.