Ebaibol na ọ nwane ta kpahe eva nọ a kekaro fihọ kpare he. Rekọ ma rẹ jọ Ebaibol ruẹ eria sa-sa nọ i fiobọhọ kẹ omai riẹ oghẹrẹ nọ Ọghẹnẹ o rri uzuazọ ohwo-akpọ, te orọ ọmọ nọ ọ rrọ eva.

 Uzuazọ yọ okẹ nọ Ọghẹnẹ ọ kẹ omai. (Emuhọ 9:6; Olezi 36:9) Uzuazọ ohwo-akpọ kpobi o rrọ ghaghae kẹ Ọghẹnẹ, te uzuazọ ọmọ nọ ọ gbẹ rrọ eva. Fikiere, ohwo o te kekaro fihọ kpe ọmọ nọ ọ rrọ eva, yọ ohwo o kpe na.

 Ọghẹnẹ o jie uzi kẹ ahwo Izrẹl nọ: “Otẹrọnọ ezae ivẹ a bi lele ohwohwo hrowo oma nọ a jẹ nwa aye nọ o dihọ oma o je yẹ yọ emerae riẹ e re gba ha rekọ ohwo ọvo o whu hu, ọnọ o ru thọ na ọ rẹ hwa oware nọ ọzae aye na ọ ta kẹe; yọ ọ rẹ hwae ẹkwoma ibruoziẹ na. Rekọ otẹrọnọ ohwo jọ o whu, a rẹ rehọ uzuazọ hwosa uzuazọ.”​—Ọnyano 21:​22, 23. a

•  Kọ ẹdẹdẹ nọ a dieva ọmọ họ, a sai sei ohwo?

•  Kọ Ọghẹnẹ ọ rẹ rọvrẹ ohwo nọ ọ kpare eva no ẹdẹjọ?

•  Otẹrọnọ uzou oni na u ti lele iei hayo ọmọ na o wo ẹbẹbẹ ologbo, kọ a sae kpare eva na?

 Ee. Nọ a tẹ nwani dieva ọmọ họ no, ohwo-akpọ dẹẹ ọ rrọ. Ere Ọghẹnẹ o rri rie. Ọghẹnẹ ọ jọ eria sa-sa evaọ Ebaibol na dhesẹ nọ o rri ọmọ nọ a ri yẹ hẹ wọhọ ohwo-akpọ, wọhọ epanọ ahwo edekọ kpobi a rrọ. Joma ta kpahe eria jọ evaọ Ebaibol nọ i dhesẹ nọ ọmọ nọ ọ gbẹ rrọ eva avọ ọnọ a yẹ ze no, epọvo na a rrọ evaọ aro Ọghẹnẹ.

•   Ọghẹnẹ ọ rọ ẹzi riẹ fiobọhọ kẹ Devidi ovie na kere nọ: “Makọ okenọ mẹ jọ edhede, ibiaro ra e ruẹ omẹ.” (Olezi 139:16) Ọghẹnẹ ọ rehọ Devidi wọhọ ohwo-akpọ makọ oke nọ a ri yẹi hi.

•   U te no ere no, taure a te ti yẹ Jerimaya ọruẹaro na, Ọghẹnẹ ọ riẹ nọ Jerimaya o ti ru obọdẹ iruo jọ kẹe. Ọghẹnẹ ọ ta nọ: “Taure mẹ tẹ te ruẹrẹ owhẹ họ evaọ edhede, mẹ riẹ owhẹ, yọ taure a te ti yẹ owhẹ me ro ru owhẹ fo. Mẹ rọ owhẹ mu ọruẹaro kẹ erẹwho na.”​—Jerimaya 1:5.

•   Luk nọ ọ jọ edọkita, nọ o kere obe Ebaibol jọ, ọ rehọ ẹme Griki ọvona se ọmọ nọ ọ rrọ eva avọ ọmọ nọ a yẹ obọ.​—Luk 1:41; 2:​12, 16.

 Nọ ohwo nọ ọ kpare eva no ẹdẹjọ o te kurẹriẹ, Ọghẹnẹ ọ rẹ rọvrẹ riẹ. Jọ udu u gbe bru ohwo otiọye na ha inọ Ọghẹnẹ ọ te kẹe uye fiki oware nọ o ru na. Ebaibol na ọ ta nọ: “Jihova o wo ohrọ-oriọ gbe ọdawẹ . . . Wọhọ epanọ ovatha-ọre u thabọ no ukiediwo-ọre na, ere o fi izieraha mai họ thabọ no omai te re.” b (Olezi 103:​8-12) Jihova ọ rẹ rọvrẹ ahwo kpobi nọ a kurẹriẹ, te enọ e kpare eva no ẹdẹjọ.​—Olezi 86:5.

 Wọhọ epanọ ma ruẹ no evaọ Ebaibol na, uzuazọ ọmọ nọ ọ rrọ eva o rrọ ghaghae. Fikiere, ohwo nọ ọ kpare eva fikinọ o roro nọ oware jọ o te via kẹ aye nọ o dihọ na hayo ọmọ na, ọ thọ uzi Ọghẹnẹ.

 O rẹ sae via ẹsejọ inọ evaọ oke nọ aye na ọ be rọ thuẹ othuẹ eyẹ na, omọvo ọvo ọ te sae zọ evaọ usu oni na avọ ọmọ na. Kọ ọvẹ a re siwi? Ahwo uviuwou na ae a rẹ jiroro na.