U wo idhere sa-sa nọ ahwo a rẹ rọ nọ onọ nana, ejọ họ, Fikieme Ọghẹnẹ ọ rọ ma omẹ? hayo Ẹjiroro vẹ ma rọ rrọ uzuazọ? Ebaibol ọ ta nọ ẹjiroro nọ Ọghẹnẹ ọ rọ ma omai họ, re ma mu usu kugbei. Joma ruẹ eware jọ nọ Ebaibol na ọ ta kpahe ẹme nana.

•   Ọghẹnẹ họ Ọnọ ọ ma omai. Ebaibol na ọ ta nọ: “[Ọghẹnẹ] họ ọnọ ọ ma omai, yọ ọye o wo omai.”​—Olezi 100:3; Eviavia 4:11.

•   Ọghẹnẹ o wo ẹjiroro nọ ọ rọ ma ahwo-akpọ gbe eware efa kpobi.​—Aizaya 45:18.

•   Ọghẹnẹ ọ ma omai evaọ oghẹrẹ nọ ma rẹ rọ gwọlọ riẹe, yọ oware ofa jọ nọ ma rẹ gwọlọ riẹ họ, ẹjiroro nọ ma rọ rrọ uzuazọ. (Matiu 5:3) Yọ Ọghẹnẹ ọ gwọlọ nọ ma ginẹ riẹ ẹjiroro nọ ma rọ rrọ uzuazọ.​—Olezi 145:16.

•   Re ma sae riẹ Ọghẹnẹ ziezi, o gwọlọ nọ ma re mu usu kugbei. Dede na, ahwo jọ a re roro nọ o sae lọhọ họ re a mu usu kugbe Ọghẹnẹ. Rekọ Ebaibol na ọ tuduhọ omai awọ nọ: “Wha si kẹle Ọghẹnẹ, o re ti si kẹle owhai.”​—Jemis 4:8; 2:23.

•   Re ma sae jọ egbẹnyusu Ọghẹnẹ, o gwọlọ nọ ma re ru oware nọ Ọghẹnẹ ọ rọ fiki riẹ ma omai na. Yọ a jọ obe Ọtausiuwoma Na 12:13 fodẹ oware nana. O ta nọ: “Dhozọ Ọghẹnẹ uzẹme na je koko izi riẹ, keme oware kpobi nọ a gwọlọ mi ohwo-akpọ ona.”

•   Evaọ obaro, ma te ruẹ epanọ ẹjiroro nọ Ọghẹnẹ ọ rọ fiki riẹ ma ahwo-akpọ o ti ro rugba nọ o te si uye-oruẹ kpobi no otọ no, kẹsena o ve ti ru re ahwo kpobi nọ a be gọe a wo uzuazọ ebẹdẹ bẹdẹ.​—Olezi 37:10, 11.