Ee, ọ te kuyo elẹ ra. Eware nọ a kere fihọ Ebaibol na gbe iku ahwo sa-sa i dhesẹ nọ Ọghẹnẹ ọ rẹ kuyo elẹ. Ebaibol na ọ ta nọ: “[Ọghẹnẹ] o re ru ẹgwọlọ enọ e be dhozọ riẹ kẹ ae; o re yo ubo rai rọkẹ obufihọ, yọ o re siwi ai.” (Olezi 145:19) Rekọ re Ọghẹnẹ ọ sai yo olẹ ra, whọ rẹ lẹ evaọ edhere nọ ọ gwọlọ.

Oware nọ Ọghẹnẹ ọ gwọlọ nọ ahwo nọ a be lẹ sei a re ru

•   Lẹ se Ọghẹnẹ orọnikọ Jesu, Meri, erẹri na, ikọ-odhiwu, hayo emema ha. Jihova ọvo họ “Ọnọ o re yo olẹ.”​—Olezi 65:2.

•   Jọ olẹ ra o rọwokugbe oreva Ọghẹnẹ, koyehọ eware nọ e rẹ were iẹe nọ Ebaibol na ọ ta kpahe.​—1 Jọn 5:14.

•   Lẹ evaọ odẹ Jesu re whọ rọ ere dhesẹ nọ whọ be kẹe adhẹẹ. Jesu ọ ta nọ: “Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.”​—Jọn 14:6.

•   Lẹ avọ ẹrọwọ inọ Ọghẹnẹ o ti yo olẹ ra na. Whọ sae tubẹ lẹ re Ọghẹnẹ o fiobọhọ kẹ owhẹ gbe wo ẹrọwọ.​—Matiu 21:22; Luk 17:5.

•   Lẹ no udu ze avọ omaurokpotọ. Ebaibol ọ ta nọ: “Dede nọ Jihova o kpehru, o re muẹrohọ enọ e be romakpotọ.”​—Olezi 138:6.

•   Jọ olẹ o bẹ owhẹ no ho. Jesu ọ ta nọ: “Wha ruabọhọ ẹyare, a te kẹ owhai.”​—Luk 11:9.

Eware jọ nọ Ọghẹnẹ o re rri hi nọ ma tẹ be lẹ

•   Uyẹ mai gbe orẹwho nọ ma no ze. “Ọghẹnẹ o wo ọriẹwẹ hẹ, rekọ evaọ orẹwho kpobi, ohwo nọ ọ be dhozọ riẹ je bi ru oware nọ u kiehọ ọ rẹ jẹe rehọ.”​—Iruẹru Ikọ 10:34, 35.

•   Oghẹrẹ nọ ohwo o fi oma riẹ họ nọ ọ tẹ be lẹ. Whọ sae lẹ se Ọghẹnẹ nọ whọ tẹ keria, kigwẹ, dikihẹ, hayo nọ who te guzou kpotọ.​—1 Iruẹru-Ivie 17:16; Nehemaya 8:6; Daniẹl 6:10; Mak 11:25.

•   Nọ ohwo ọ tẹ lẹ họ eva hayo lẹ do via. Ọghẹnẹ ọ rẹ kuyo elẹ nọ a lẹ họ eva nọ amọfa a tube yo dede he.​—Nehemaya 2:1-6.

•   Oghẹrẹ nọ ẹbẹbẹ ra ọ rro te hayo kawo te. Ọghẹnẹ ọ gwọlọ nọ ma “gbolo awaọruọ [mai] kpobi kẹe, keme ọ be daezọ [mai].”​—1 Pita 5:7.