Ẹvẹ Uwhu Jesu O rọ Rrọ ‘Ẹtanigbo kẹ Ahwo Buobu’?

KPORO

Uyo nọ Ebaibol na ọ kẹ

Ọghẹnẹ ọ rọ ẹkwoma uwhu Jesu siwi ahwo-akpọ no igbo uzioraha gbe uwhu. Ebaibol na o dhesẹ nọ azẹ Jesu yọ osa ẹtanigbo. (Ahwo Ẹfisọs 1:7; 1 Pita 1:18, 19) Oyejabọ nọ Jesu ọ rọ ta nọ ọ nyaze re o “siobọno uzuazọ riẹ rọkẹ ẹtanigbo ọrọ ahwo buobu.”—Matiu 20:28.

Fikieme “ahwo buobu” a rọ gwọlọ “ẹtanigbo”?

A ma Adamu ohwo ọsosuọ na gbagba, ababọ uzioraha. Ọ hae rria bẹdẹ bẹdẹ rekọ o te ku uvẹ na kufiẹ evaọ okenọ ọ ghẹmeeyo kẹ Ọghẹnẹ. (Emuhọ 3:17-19) Nọ o yẹ emọ, emọ riẹ a tẹ reuku uzioraha mi ei. (Ahwo Rom 5:12) Fiki onana, Ebaibol na ọ ta nọ Adamu ọ “zẹ” omariẹ gbe emọ riẹ kpobi fihọ igbo uzioraha gbe uwhu. (Ahwo Rom 7:14) Fikinọ emọ Adamu kpobi a gba ha, a sae dẹ uzuazọ ogbagba nọ Adamu o kufiẹ na zihe ze he.—Olezi 49:7, 8.

Ohrọ emọ Adamu o tẹ re Ọghẹnẹ keme a wo ohwo ọvo nọ o re fiobọhọ kẹ ai hi. (Jọn 3:16) Rekọ, fikinọ Ọghẹnẹ o re bruoziẹ okiẹrẹe, ọ sae nwane kpairoro vrẹ izieraha emọ Adamu ere he. (Olezi 89:14; Ahwo Rom 3:23-26) Ọghẹnẹ o you ahwo-akpọ gaga, fikiere o te ru ọruẹrẹfihotọ re ọ sae rọvrẹ ai je voro izieraha rai no. (Ahwo Rom 5:6-8) Ẹtanigbo na họ ọruẹrẹfihotọ yena.

Eme họ ẹtanigbo na?

Evaọ Ebaibol na, ẹme na “ẹtanigbo” o dikihẹ kẹ eware esa nana:

Osa nọ a rọ hwa oware.—Ikelakele 3:46, 47.
Oware nọ a ro nwene uzou, hayo si ohwo no igbo.—Ọnyano 21:30.
O rẹ jọ ẹrẹrẹe kugbe hayo te oware nọ a be hwosa fihọ na. a

Joma ta kpahe epanọ eware esa nana i ro kiekpahe idhe ẹtanigbo Jesu Kristi na.

Osa nọ a rọ hwa oware. Ebaibol na ọ ta nọ “a hwa osa rọ dẹ” Ileleikristi. (1 Ahwo Kọrint 6:20; 7:23) Osa yena họ azẹ Jesu nọ ọ rọ “dẹ ahwo kẹ Ọghẹnẹ no orua kpobi, ẹrọunu kpobi, oghoghẹrẹ ahwo gbe orẹwho kpobi ze.”—Eviavia 5:8, 9.
Oware nọ a ro Nwene uzou, hayo si ohwo no igbo. Idhe Jesu u ru rie lọhọ nọ a sae rọ “hwa osa ẹtanigbo ro si omai no igbo” uzioraha.—1 Ahwo Kọrint 1:30; Ahwo Kọlọsi 1:14; Ahwo Hibru 9:15.
O rẹ jọ ẹrẹrẹe kugbe hayo te oware nọ a be hwosa fihọ na. Uzuazọ Jesu o nwane rrọ ẹrẹrẹe kugbe uzuazọ ogbagba nọ Adamu o kufiẹ. (1 Ahwo Kọrint 15:21, 22, 45, 46) Ebaibol na ọ ta nọ: “Wọhọ epanọ aghẹmeeyo ọzae ọvo [Adamu] o ru ahwo buobu zihe ruọ erahaizi na, ere ọvona re a te rọ ẹkwoma ẹmeoyo omọvo [Jesu Kristi] ru ahwo buobu kiẹrẹe.” (Ahwo Rom 5:19) Onana u dhesẹ epanọ omọvo ọ sae rọ rehọ uzuazọ riẹ hwosa ẹtanigbo kẹ erahaizi buobu. Jesu ọ rọ ẹkwoma uzuazọ riẹ nọ o ro dhe idhe hwa “osa ẹtanigbo nọ o rrọ ẹrẹrẹe rọkẹ ahwo kpobi” nọ a gwọlọ wo erere noi ze.—1 Timoti 2:5, 6.

a Evaọ Ebaibol na, eme nọ a fa “ẹtanigbo” na i dhesẹ osa, hayo oware nọ u te osa nọ a hwa. Wọhọ oriruo, ẹme Hibru nọ a re se ka·pharʹ na, o dhesẹ epanọ a re “di” oware hayo ruru oware. (Emuhọ 6:14) Onana u dhesẹ izierkaha nọ a rẹ rọvrẹ. (Olezi 65:3) Ẹme ọfa nọ ọ wọhọ ọnana họ koʹpher nọ u dhesẹ osa nọ a hwa ro nwene uzou, hayo re a ro siobọno oware. (Ọnyano 21:30) Epọvo na re, a rẹ sae jẹ fa ẹme Griki nọ a re se lyʹtron nọ o dikihẹ kẹ “ẹtanigbo” na osa ẹtanigbo. (Matiu 20:28) Ahwo Griki nọ a re kere ebe a rẹ rọ ẹme nana ta kpahe osa nọ a hwa re a siobọno ohwo nọ a mu no ẹmo kpozi hayo re a ro siobọno ọrigbo.