Oghẹrẹ Vẹ Jesu O ro Siwi Omai?
Uyo nọ Ebaibol na ọ kẹ
Jesu ọ rọ ẹkwoma uzuazọ riẹ nọ o siobọno rọkẹ ẹtanigbo ro siwi ahwo-akpọ nọ a wo ẹrọwọ. (Matiu 20:28) Fikiere, Ebaibol na o se Jesu “osiwi akpọ na.” (1 Jọn 4:14) Ọ tẹ jẹ ta nọ: “Ohwo ọfa ọ riẹ hẹ nọ a rẹ rọ ẹkwoma riẹ wo esiwo, keme odẹ ọfa o rrọ otọakpọ na ha nọ Ọghẹnẹ ọ kẹ nọ a re ro siwi omai.”—Iruẹru Ikọ 4:12.
Jesu “o whu rọkẹ ahwo kpobi” nọ a fi ẹrọwọ họ iẹe. (Ahwo Hibru 2:9; Jọn 3:16) Rekọ “Ọghẹnẹ ọ kpare riẹ no uwhu ze,” kẹsena Jesu o te zihe kpobọ odhiwu wọhọ omama ẹzi. (Iruẹru Ikọ 3:15) Evaọ obọ odhiwu, Jesu ọ sai “siwi enọ e be rọ ẹkwoma riẹ bru Ọghẹnẹ ze riẹriẹriẹ, keme ọ rrọ uzuazọ ẹsikpobi re ọ lẹ Ọghẹnẹ kẹ ae.”—Ahwo Hibru 7:25.
Fikieme o rọ gwọlọ nọ Jesu ọ rẹ lẹ Ọghẹnẹ kẹ omai?
Fikinọ mai kpobi yọ erahaizi. (Ahwo Rom 3:23) Uzioraha u fi ohẹriẹ họ udevie mai avọ Ọghẹnẹ, yọ onana o rẹ wha uwhu ze. (Ahwo Rom 6:23) Rekọ Jesu yọ “amiunugu” rọkẹ enọ i fi ẹrọwọ họ idhe ẹtanigbo riẹ. (1 Jọn 2:1, ẹme-obotọ) Jesu ọ rẹ lẹ Ọghẹnẹ fiki rai re o yo elẹ rai jẹ rọ izieraha rai rọvrẹ rai fiki idhe ẹtanigbo na. (Matiu 1:21; Ahwo Rom 8:34) Ọghẹnẹ o re yo elẹ itieye na nọ Jesu ọ lẹ keme e rọwokugbe oreva Ọghẹnẹ. Ọghẹnẹ o vi Jesu ziọ otọakpọ na “re a rọ ẹkwoma riẹ siwi akpọ na.”—Jọn 3:17.
Kọ ẹrọwọ nọ ma re fihọ Jesu ọvo họ oware nọ o gwọlọ re ma sai wo esiwo?
Ijo. Dede nọ u fo nọ ma re fi ẹrọwọ họ Jesu re ma sai wo esiwo, o gwọlọ nọ ma re ru eware efa re. (Iruẹru Ikọ 16:30, 31) Ebaibol na ọ ta nọ: “Wọhọ epanọ ugboma nọ u wo ẹzi hi u whu no na, ere ọvona ẹrọwọ nọ a be rọ iruo dhesẹ via ha o whu no re.” (Jemis 2:26) Fikiere, re ma sai wo esiwo, o gba omai họ nọ ma re:
Wuhrẹ kpahe Jesu avọ Ọsẹ riẹ, Jihova.—Jọn 17:3.
Fi ẹrọwọ họ ai.—Jọn 12:44; 14:1.
Dhesẹ nọ ma wo ẹrọwọ ẹkwoma izi rai nọ ma re koko. (Luk 6:46; 1 Jọn 2:17) Jesu ọ ta nọ orọnikọ ohwo kpobi nọ o se rie “Olori” a ti siwi hi, rekọ enọ i “bi ru oreva Ọsẹ [riẹ] nọ ọ rrọ obọ idhiwu na ọvo.”—Matiu 7:21.
Kru ẹrọwọ mai ga ẹsikpobi o tẹ make rọnọ edawọ i bi te omai. Jesu o ru ẹme nana vẹ inọ: “Ọnọ o thihakọ te urere a ti siwi ei.”—Matiu 24:13.
Enana E Sae jẹ Were Owhẹ
ENỌ NỌ EBAIBOL Ọ KẸ IYO RAI
Kọ Ohwo Ọ rẹ Nwani Wo Esiwo Fikinọ Ọ Rọwo Jesu?
Ebaibol na ọ ta kpahe ahwo jọ nọ a rọwo Jesu inọ a ti wo esiwo ho. Ẹvẹ o rọ rrọ ere?
ERIA EBAIBOL NỌ A RU VẸ
A Ru Jọn 3:16 Vẹ—“Keme Ọghẹnẹ O You Akpọ na Hrọ”
Eme Jihova Ọghẹnẹ o ru nọ u dhesẹ nọ o you omai omomọvo yọ ọ gwọlọ nọ ma rria bẹdẹ bẹdẹ?
IWUHRẸ EBAIBOL NỌ I WUZOU
Fikieme Jesu O ro Whu?
Ebaibol na ọ vuẹ omai oware nọ uwhu Jesu u je wuzou. Kọ uwhu riẹ u wo erere jọ kẹ omai?
UWOU-ERORO NA
Ẹvẹ Whọ Sai ro Wo Uzuazọ nọ O Rrọ Obaro Tha Na?
U wo “edhere” jọ nọ u fo nọ who re lele re whọ sae reawere uzuazọ nọ Ọghẹnẹ ọ be ruẹrẹ kpahe kẹ ahwo nọ a you rie.
USI UWHOWHO OBỌDẸ
Rọwo nọ Ma Wuhrẹ Ebaibol na Kugbe Owhẹ
Ohwo jọ o ti wuhrẹ Ebaibol na kugbe owhẹ ọvọvẹ.