Ee, Ẹdhọ ọ rrọ. Ẹdhọ yọ omama ẹzi nọ o zihe ruọ ukọ umuomu jẹ wọso Ọghẹnẹ. Ọye họ “osu akpọ na.” (Jọn 14:30; Ahwo Ẹfisọs 6:​11, 12) Ebaibol na o dhesẹ oghẹrẹ nọ Ẹdhọ ọ rrọ kẹ omai ẹkwoma edẹ sa-sa nọ a ro dhesẹ iẹe:

•   Setan, onọ otofa riẹ o rrọ “Ohwo-Ọwọsuọ.”—Job 1:6.

•   Ẹdhọ, onọ otofa riẹ o rrọ “Ohwo-Ọtaraha.”—Eviavia 12:9.

•   Araomuomu, onọ Ebaibol na o re ro dhesẹ “Ọviẹahwohọ.”—2 Ahwo Kọrint 11:3.

•   Ọdawo-Ahwo.—Matiu 4:3.

•   Ọtọrue.—Jọn 8:44.

Orọnikọ Ẹdhọ yọ oware jọ gheghe hayo oware uyoma nọ o rrọ ohwo udu hu

 Ahwo jọ a rẹ ta nọ Setan Ẹdhọ na yọ oware jọ gheghe hayo oware uyoma nọ o rrọ ohwo udu. Rekọ Ebaibol na o dhesẹ nọ Ọghẹnẹ avọ Setan a ta ẹme. Ọghẹnẹ ọ gbakiete, fikiere orọnikọ eyoma jọ nọ o rrọ udu riẹ o je lele ta ẹme he. (Iziewariẹ 32:4; Job 2:1-6) Epọvo na, dede nọ uzioraha o rrọ oma Jesu hu, Setan ọ dawo e riẹ. (Matiu 4:8-10; 1 Jọn 3:5) Fikiere, Ebaibol na o dhesẹ vevẹ nọ Ẹdhọ ọ ginẹ rrọ orọnikọ oware uyoma nọ o rrọ udu ohwo ho.

 Ahwo buobu a rọwo nọ Ẹdhọ ọ rrọ họ. Kọ onana u re gbe omai unu? U re gbe omai unu hu keme Ebaibol na ọ ta nọ Setan ọ rẹ rọ eviẹhọ ru eware riẹ kpobi. (2 Ahwo Tẹsalonika 2:​9, 10) Obọdẹ edhere jọ nọ ọ be rọ viẹ ahwo họ họ, o wuhu iroro ahwo buobu di no re a roro nọ ọ rrọ họ.​—2 Ahwo Kọrint 4:4.

  Eriwo ọthọthọ: Lusifa yọ odẹ ọfa nọ a re se Ẹdhọ.

 Uzẹme ẹme na: Otofa ẹme Hibru nọ a fa “Lusifa” evaọ efafa Ebaibol jọ na họ “ọnọ o bi lo.” (Aizaya 14:12) Eme nọ e wariẹ oria Ebaibol nọ a jọ fodẹ ẹme nana i dhesẹ nọ, Ebaibol na ọ be ta kpahe unuwou nọ isu i re no ze evaọ Babilọn, enọ Ọghẹnẹ o ti hrẹ kpotọ fiki omorro rai. (Aizaya 14:4, 13-20) A jẹ rọ ẹme nana “ọnọ o bi lo” se isu Babilọn ẹkoko evaọ okenọ a fi ei kparobọ no.

  Eriwo ọthọthọ: Setan yọ “oguẹdhọ” nọ Ọghẹnẹ o bi ro ruiruo.

 Uzẹme ẹme na: Ẹdhọ yọ ọwegrẹ Ọghẹnẹ orọnikọ odibo riẹ hẹ. Setan Ẹdhọ na ọ be wọso ahwo nọ a be gọ Ọghẹnẹ je gu eware fihọ ae uzou.​—1 Pita 5:8; Eviavia 12:10.