Maekẹl yọ odẹ nọ a se Jesu taure ọ tẹ ziọ otọakpọ, yọ a se rie odẹ na re evaọ okenọ o zihe kpobọ odhiwu no. a Ahwo egagọ jọ a re sei “Maekẹl Ọrezi” na. Maekẹl o lele Setan vro avro evaọ okenọ Mosis o whu no, yọ o fiobọhọ kẹ ukọ-odhiwu jọ nọ Ọghẹnẹ o vi bru Daniẹl ọruẹaro na. (Daniẹl 10:13, 21; Jud 9) Otofa odẹ na Maekẹl họ, “Ono Ọ Wọhọ Ọghẹnẹ?” Maekẹl o bi ru otofa odẹ riẹ na gba keme ọ be thọ esuo Ọghẹnẹ jẹ họre ewegrẹ riẹ.​—Daniẹl 12:1; Eviavia 12:7.

 Joma ta kpahe oware nọ ma rọ ta nọ Jesu họ Maekẹl ukọ-odhiwu oride na.

•   Maekẹl họ “ukọ-odhiwu oride na.” (Jud 9) Otofa “ukọ-odhiwu oride” na họ, “ọnọ o wuzou ikọ-odhiwu.” Odẹ na o romavia evaọ Ebaibol na evaọ eria ivẹ ọvo. Yọ evaọ eria ivẹ nana, a rọ odẹ na se ukọ-odhiwu ọvo orọnikọ ikọ-odhiwu ivẹ hẹ. A jọ oria ikere nana jọ ta nọ, Jesu nọ a kpare ze no na “o ti no obọ odhiwu ze, ọ vẹ te rehọ urru oruarua orọ ukọ-odhiwu oride ro se.” (1 Ahwo Tẹsalonika 4:16) Jesu o wo “urru oruarua orọ ukọ-odhiwu oride” keme ọye họ Maekẹl, ukọ-odhiwu oride na.

•   Maekẹl họ osu ikọ-odhiwu buobu gbidi gbidi. “Maekẹl avọ ikọ-odhiwu riẹ a tẹ jẹ họre araomuomu idudu na,” koyehọ Setan. (Eviavia 12:7) Maekẹl o wo ogaga ulogbo evaọ obọ odhiwu keme a se rie ọnọ “ọ rrọ omọvo isu nọ e mae viodẹ na” gbe “osu ologbo.” (Daniẹl 10:13, 21; 12:1) Ọzae jọ nọ a re se David E. Aune nọ o wuhrẹ kpahe Ọvọ Ọkpokpọ na ọ ta nọ edẹ nana i dhesẹ nọ, Maekẹl họ “ọnọ o wuzou ogbaẹmo ikọ-odhiwu na.”

   Ebaibol na ọ fodẹ odẹ omọfa nọ o wuzou ogbaẹmo ikọ-odhiwu. Ebaibol na ọ ta kpahe okenọ “Olori na Jesu ọ te romavia no odhiwu ze avọ ikọ-odhiwu egaga riẹ evaọ ebruerae, nọ ọ te rehọ uye kẹ enọ e riẹ Ọghẹnẹ hẹ.” (2 Ahwo Tẹsalonika 1:7, 8; Matiu 16:27) Jesu “o kpohọ odhiwu, Ọghẹnẹ o te ru ikọ-odhiwu gbe enọ i wo udu-esuo gbe ogaga re a jọ otọ riẹ.” (1 Pita 3:21, 22) O sai kiehọ họ re Ọghẹnẹ ọ rọ Jesu avọ Maekẹl mu enọ i wuzou ikọ-odhiwu na, re aimava na a hai hrowo oma. Ukpoye, o mae kiehọ re ma ta nọ edẹ ivẹ na, Jesu avọ Maekẹl, yọ edẹ nọ a ro se omọvo na.

•   Maekẹl “ọ te kpama” evaọ obaro re o fiobọhọ kẹ idibo Ọghẹnẹ evaọ “oke idhọvẹ.” (Daniẹl 12:1) Ẹme na “ọ te kpama” nọ a fodẹ unuẹse buobu evaọ obe Daniẹl na, a rehọ e riẹ dhesẹ epanọ ovie o re mu ze re o ru obọdẹ oware jọ. (Daniẹl 11:2-4, 21) Jesu Kristi nọ ọ rrọ “Ẹme Ọghẹnẹ” na o ti ru obọdẹ oware jọ keme ọye họ “Ovie ivie.” O ti kpe ewegrẹ Ọghẹnẹ kpobi no jẹ thọ idibo riẹ. (Eviavia 19:11-16) O ti ru onana evaọ etoke nọ “uye ulogbo o te jọ, utionọ o re via no emuhọ akpọ na ze he.”​—Matiu 24:21, 42.