A jọ Ebaibol na fodẹ Ohọ obọ Turin na ha. Ohọ obọ Turin na yọ ohọ nọ ahwo buobu a roro nọ a ro ki Jesu Kristi. Fiki onana, ahwo jọ a rri ohọ nana wọhọ ẹmema nọ egagọ Kristẹndọm a re ro ru egagọ rai. Ohọ nana o rrọ uwou ichọche ulogbo jọ enẹna evaọ okpẹwho Turin nọ o rrọ Italy, yọ a fi rie họ evaọ oware jọ nọ a be jọ sẹro riẹ.

 Kọ Ebaibol na ọ ta ẹme jọ nọ u dhesẹ nọ Ohọ obọ Turin na họ ohọ ukio Jesu? Ijo.

 Joma ta kpahe eware esa jọ nọ i dhesẹ nọ ohọ obọ Turin na u wo ohẹriẹ no oware nọ Ebaibol na ọ ta.

1.   Ohọ obọ Turin na yọ ẹwẹ-ohọ ọvo nọ u theri te 442 centimeter jẹ kẹre te 113 centimeter, u te je wo ẹwẹ nọ o theri te 8 centimeter nọ a ko fihọ ofẹ uthethei riẹ.

    Oware nọ Ebaibol na ọ ta: A rehọ emehọ buobu variẹ ugboma Jesu evaọ okenọ o whu, orọnikọ ohọ ọvo jọ họ. A rehọ omohọ jọ variẹ uzou riẹ. Nọ a kpare Jesu nọ uwhu ze no, ukọ riẹ jọ nọ ọ nyaze obọ uki na, ọ “ruẹ emehọ ohọ-olọlọhọ na nọ e rrọ etẹe.” Ebaibol na ọ tẹ jẹ ta nọ: “Omohọ nọ a rọ variẹ uzou riẹ o jọ kugbe emehọ edekọ na ha, rekọ a kpiri rie fihọ oria riẹ sa.”​—Jọn 20:6, 7.

2.   Ohọ obọ Turin na u wo eka azẹ erọ ori ohwo nọ a họ họ.

    Oware nọ Ebaibol na ọ ta: Okenọ Jesu o whu no, ilele riẹ a ruẹrẹ ugboma riẹ họ “wọhọ epaọ uruemu ahwo Ju nọ a re ro ki ohwo.” (Jọn 19:39-42) Wọhọ epaọ uruemu ahwo Ju na, a rẹ họ ori ohwo nọ o whu no na jẹ rehọ udẹ gbe eware nọ i re gbo ore awere wholo ugboma ohwo na taure a te ti ki ei. (Matiu 26:12; Iruẹru Ikọ 9:37) Onana u dhesẹ nọ ilele Jesu a họ ugboma Jesu taure a tẹ te rehọ emehọ variẹ iẹe.

3.   Wọhọ epanọ obe ofeme nọ a re se Encyclopædia Britannica o ta, Ohọ obọ Turin na u wo uwoho ọzae jọ “nọ o kiẹzẹ wariama fihọ abọvo uthethei ohọ na, a te kpiri ubro nọ u kiọkọ fihọ obọ uzou riẹ re u ruru oma na soso.”

    Oware nọ Ebaibol na ọ ta: Ilele Jesu a ta kpahe uwhu riẹ, uki riẹ nọ o jọ ofofe, gbe eyae nọ i se isẹri inọ “a ruẹ ikọ-odhiwu jọ nọ e ta kẹ ae nọ ọ rrọ uzuazọ.” (Luk 24:15-24) O hae jọnọ ohọ obọ Turin na o jọ evaọ uki nọ a ki Jesu fihọ na, ilele riẹ a hae ta kpahe ohọ na gbe uwoho na. Rekọ Ebaibol na ọ ta ha inọ ilele na a ta kpahe ohọ nana.

 Ijo. O tẹ make rọnọ eme nọ a ta kpahe ohọ na uzẹme dede, o thọ re a gọ ohọ na ghele. Joma ta kpahe ehri-izi Ebaibol nọ e ta kpahe oware nọ o rọ thọ.

1.   U fo ho. Jesu ọ ta nọ: “Ọghẹnẹ yọ Ẹzi, yọ enọ e be gọe a rẹ rehọ ẹzi gbe uzẹme gọ hrọ.” (Jọn 4:24) A rẹ rehọ emema hayo iwoho rọ gọ egagọ uzẹme he.

2.   Ọghẹnẹ o mukpahe iẹe. A jọ Izi Ikpe na ta nọ o thọ re a gọ emedhọ. (Iziewariẹ 5:6-10) Epọvo na re, Ebaibol na o jie uzi kẹ Ileleikristi nọ: “Wha kẹnoma kẹ emedhọ.” (1 Jọn 5:21) Ahwo jọ a sae ta nọ ohọ na yọ ẹmẹdhọ họ, rekọ uwoho gheghe hayo oka egagọ rai. Rekọ nọ ohwo ọ tẹ be gọ uwoho yọ u zihe ruọ ẹmẹdhọ kẹ ohwo na no. a Fikiere, ohwo kpobi nọ ọ gwọlọ ru Ọghẹnẹ evawere, ọ rẹ rehọ adhẹẹ kẹ uwoho ọvuọvo ho hayo gọe he, makọ ohọ obọ Turin na.