O thọ họ. Eme nọ Jesu ọ ta kẹ ilele riẹ o lẹliẹ omai riẹ onana. Jesu ọ vuẹ rai nọ “ahwo nọ oma rai o ga a gwọlọ ọbo-imu hu, rekọ enọ e be mọ e gwọlọ ọbo-imu.” (Matiu 9:12) Uzẹme na họ Ebaibol yọ obe imu hu. Rekọ eme nọ e rrọ eva riẹ i re fiobọhọ kẹ ahwo nọ a be mọ, re a gbe ru oware nọ Ọghẹnẹ o mukpahe he.

Enọ nọ whọ sae nọ omara

 1. Kọ mẹ riẹ umu nọ mẹ gwọlọ rehọ na totọ? Ebaibol ọ vuẹ omai nọ ma nwane “rọwo ẹme kpobi” nọ a vuẹ omai hi, rekọ ma rẹ kiẹ kpahe iẹe re ma riẹ oware nọ u fo nọ ma re ru.—Itẹ 14:15.

 2. Kọ o thọ re mẹ nọ edọktọ ọvo hayo ivẹ efa kpahe ẹyao mẹ na? U yoma ha nọ ‘ekohrẹ hayo ahwo nọ a sai fiobọhọ kẹ owhẹ a te bu,’ maero nọ ẹyao ra na ọ tẹ rrọ gaga.—Itẹ 15:22.

 3. Ọghẹnẹ ọ gwọlọ nọ ma “siomano . . . azẹ.” Kọ oghẹrẹ nọ a gwọlọ ro siwi omẹ na, o te gwọlọ nọ a se azẹ fihọ omẹ oma?—Iruẹru Ikọ 15:20.

 4. Kọ umu nọ mẹ gwọlọ rehọ na hayo oghẹrẹ nọ a ro ru ei, o rọ oghẹrẹ jọ whomahọ iruẹru-imizi? Jihova o mukpahe “iruẹru-imizi.” (Ahwo Galesha 5:19-21) Kọ ẹvẹ whọ sae rọ riẹ sọ a jọ umu jọ nọ a bi ru kẹ owhẹ ru iruẹru-imizi? Whọ sae nọ omara enọ nana:

•   Kọ ohwo nọ ọ gwọlọ ru umu na kẹ omẹ na ọ rẹ nọ mi idhivẹri?

•   Kọ mẹ be rehọ umu na fikinọ me bi roro nọ ẹdhọ jọ o bi ru omẹ? Kọ mẹ be rehọ umu na fikinọ me roro nọ erieda a bi kpokpo omẹ?

•   Kọ o gwọlọ nọ me re dhe idhe jọ nọ a te bi ru umu na hayo nọ mẹ tẹ be rehọ iẹe? Kọ o gwọlọ nọ a re gu eme fihọ umu na ro zizie ogaga jọ hayo ru oware ofa jọ nọ u wobọ kugbe iruẹru-imizi?

 5. Kọ omoware kpobi nọ o via o be hae lẹliẹ omẹ roro nọ ẹyao mẹ be te mọ na? Ebaibol ọ ta nọ: “Wha ru re ahwo kpobi a ruẹ nọ wha wo iroro.” (Ahwo Filipai 4:5) Nọ who gbe bi roro kpahe omara ẹsikpobi hi, o te lẹliẹ owhẹ “vuhu eware nọ e mae roja,” koyehọ eware nọ e rẹ lẹliẹ usu ra avọ Jihova dhe ẹgẹga.—Ahwo Filipai 1:10; Matiu 5:3.