Orọnikọ omọvo jọ hayo ẹko ahwo jọ họ ọnọ ọ rọ so Kristi na ha, keme Ebaibol ọ ta nọ “ibuobu enọ e rọ so Kristi” e riẹ. (1 Jọn 2:18) Ukpoye, “ọnọ ọ rọ so Kristi” na o no ẹme Griki nọ otọ riẹ o rrọ “mukpahe (hayo viukpọ) Kristi” nọ o dikihẹ kẹ ohwo kpobi nọ o bi ru eware nana:

•   Ọ rọwo nọ Jesu họ Kristi hayo Mesaya na ha, yọ ọ rọwo nọ Jesu yọ Ọmọ Ọghẹnẹ hẹ.​—1 Jọn 2:22.

•   Ọ be wọso Kristi, Ọnọ Ọghẹnẹ O Wholo na.​—Olezi 2:1, 2; Luk 11:23.

•   O bi ru wọhọ ẹsenọ ọye họ Kristi na.​—Matiu 24:24.

•   O bi kpokpo ilele Jesu, yọ Jesu o re rri rie nọ oware kpobi nọ a ru ilele riẹ ọye a ru.​—Iruẹru Ikọ 9:5.

•   O re ru wọhọ Oleleikristi kpakiyọ ọ vọ avọ eviẹhọ yọ o koko izi Ọghẹnẹ hẹ.​—Matiu 7:22, 23; 2 Ahwo Kọrint 11:13.

 Ebaibol o se ohwo kpobi nọ o bi ru eware nana nọ, ọnọ ọ rọ so Kristi, je se ẹko ahwo otiọye na kpobi inọ “ọnọ ọ rọ so Kristi na.” (2 Jọn 7) Ahwo nana nọ a rọ so Kristi na a kake romavia evaọ oke ikọ na, yọ a gbẹ riẹ rite inẹnẹ na. Yọ Ebaibol ọ ta nọ oghẹrẹ ahwo utiona a te romavia.​—1 Jọn 4:3.

•   A re wuhrẹ iwuhrẹ erue kpahe Jesu. (Matiu 24:9, 11) Wọhọ oriruo, ohwo kpobi nọ o bi wuhrẹ nọ Ọghẹnẹ yọ Esanerọvo hayo inọ Jesu yọ Ọghẹnẹ Erumeru, ọ be wọso Ẹme nọ Jesu ọ ta inọ: “Ọsẹ na ọ rro vi omẹ.”​—Jọn 14:28.

•   Enọ e rọ so Jesu a se eware nọ Jesu o wuhrẹ kpahe oghẹrẹ nọ Uvie Ọghẹnẹ u bi ro su. Wọhọ oriruo, isu egagọ buobu a ta nọ Kristi họ ọnọ ọ be kpọ egọmeti ahwo-akpọ. Rekọ uwuhrẹ nana o rọwokugbe oware nọ Jesu ọ ta ha, inọ: “Uvie mẹ o rrọ orọ akpọ nana ha.”​—Jọn 18:36.

•   A rẹ ta nọ Jesu yọ Olori rai rekọ a re koko izi riẹ hẹ, onọ u kugbe usiuwoma Uvie na nọ a rẹ ta.​—Matiu 28:19, 20; Luk 6:46; Iruẹru Ikọ 10:42.