Ileleikristi a rọwo nọ Jesu o whu fiki izieraha ahwo-akpọ. (1 Pita 3:18) Dede na, re ohwo ọ sai wo esiwo, orọnikọ ọ rẹ rọwo ọvo nọ Jesu yọ osiwi mai hi. Idhivẹri na a riẹ nọ Jesu yọ “Ọmọ Ọghẹnẹ,” rekọ a ti wo esiwo ho, a te raha ae no.​—Luk 4:41; Jud 6.

•  Eme me re ru re mẹ sai wo esiwo?

•  Kọ ẹvẹ kpahe “Olẹ Erahaizi”?

•  Diẹse “Olẹ Erahaizi” u muhọ no ze?

•   Whọ rẹ rọwo nọ Jesu ọ rehọ uzuazọ riẹ dhe idhe fiki izieraha mai. (Iruẹru Ikọ 16:30, 31; 1 Jọn 2:2) Onana u dhesẹ nọ whọ rẹ rọwo inọ Jesu ọ ginẹ ziọ akpọ na, yọ eware kpobi nọ Ebaibol na ọ ta kpahe iẹe i rugba.

•   Wuhrẹ oware nọ Ebaibol na ọ ta. (2 Timoti 3:15) Ebaibol na ọ ta nọ Pọl avọ Saelas a ta kẹ oriekarọ jọ nọ: “Rọwo Olori na Jesu, who ti wo esiwo.” Kẹsena a te wuhrẹ oriekarọ na “ẹme Jihova.” a (Iruẹru Ikọ 16:31, 32) Onana u dhesẹ nọ oriekarọ na o re wo otoriẹ Ẹme Ọghẹnẹ re ọ sae rọwo Jesu. O gwọlọ nọ o re wo eriariẹ egbagba uzẹme na nọ o rrọ Ebaibol na.​—1 Timoti 2:3, 4.

•   Kurẹriẹ. (Iruẹru Ikọ 3:19) O gwọlọ nọ who re kurẹriẹ, hayo dhesẹ nọ eware iyoma nọ who ru evaọ okenọ u kpemu e da owhẹ. Otẹrọnọ who gine kurẹriẹ no, ahwo a rẹ riẹ keme who ti gbe ru eware nọ e rẹ dha Ọghẹnẹ eva ha, rekọ “eware nọ i re dhesẹ ekurẹriẹ.”​—Iruẹru Ikọ 26:20.

•   Họ-ame. (Matiu 28:19) Jesu ọ ta nọ ahwo nọ a zihe ruọ ilele riẹ a rẹ họ-ame. Oriekarọ nọ ma ta kpahe na ọ họ-ame. (Iruẹru Ikọ 16:33) Epọvo na re, nọ Pita ukọ na o wuhrẹ ogbotu obuobu jọ uzẹme kpahe Jesu no, “enọ e rehọ evawere dede eme riẹ rehọ a tẹ họ-ame.”​—Iruẹru Ikọ 2:40, 41.

•   Ru oware nọ Jesu ọ ta. (Ahwo Hibru 5:9) Ahwo nọ a ginẹ rrọ ilele Jesu a re “ru eware kpobi” nọ Jesu o jie uzi rai, je dhesẹ onana via evaọ oghẹrẹ nọ a bi yeri uzuazọ rai. (Matiu 28:20) A rẹ jọ enọ i re “ru lele ẹme na orọnikọ enọ i re yo ọvo ho.”​—Jemis 1:22.

•   Thihakọ te urere. (Mak 13:13) U fo nọ ilele Jesu a re “thihakọ” re a ruẹsi wo esiwo. (Ahwo Hibru 10:36) Wọhọ oriruo, Pọl ukọ na ọ daoma ru lele iwuhrẹ Jesu kpobi, yọ o yoẹme kẹ Ọghẹnẹ re. O ru onana no umuo okenọ o ro zihe ruọ Oleleikristi ri bọwo ẹdẹ uwhu riẹ.​—1 Ahwo Kọrint 9:27.

 Evaọ egagọ jọ, a rẹ lẹ oghẹrẹ elẹ jọ nọ a re se “Olẹ Erahaizi” gbe “Olẹ Usiwo.” Ahwo nọ a rẹ lẹ oghẹrẹ elẹ nana, a rẹ ta nọ ae omarai yọ erahaizi, gbe nọ Jesu o whu fiki izieraha rai. A rẹ jẹ lẹ re Jesu o fiobọhọ kẹ ae evaọ uzuazọ. Rekọ Ebaibol na ọ ta vievie he inọ ma lẹ oghẹrẹ olẹ jọ nọ a re se “Olẹ Erahaizi.”

 Ahwo jọ a re roro nọ a tẹ lẹ “Olẹ Erahaizi” no, ẹsiẹe a sai ro wo esiwo ebẹdẹ bẹdẹ. Rekọ olẹ ọvo u re ru nọ ohwo o re ro wo esiwo ho. Fikinọ mai ahwo-akpọ ma gba ha, ma re ru thọ ẹsikpobi. (1 Jọn 1:8) Fiki onana Jesu o ro wuhrẹ ilele riẹ re a hae lẹ rọkẹ erọvrẹ izieraha rai kẹse kẹse. (Luk 11:2, 4) Ofariẹ, Ileleikristi jọ nọ a hai ti wo esiwo a kie no edhere Ọghẹnẹ, fikiere a te ku uvẹ nọ a hai ti ro wo uzuazọ ebẹdẹ bẹdẹ fiẹ.​—Ahwo Hibru 6:4-6; 2 Pita 2:20, 21.

 Igbiku a roro nọ “Olẹ Erahaizi” na u muhọ no eria sa-sa ze. Ejọ e rẹ ta nọ olẹ nana u muhọ evaọ okenọ ohẹriẹ o rọ romavia evaọ ichọche Katọlik evaọ etoke nọ a re se Protestant Reformation. Efa e rẹ ta nọ ahwo a mu “Olẹ Erahaizi” na họ ẹlẹ nọ ichọche ekpokpọ i je muhọ evaọ etoke ukpe 1700 gbe 1800 ze. Oghẹrẹ kpobi nọ o rọ kẹhẹ, whọ rẹ jọ Ebaibol na ruẹ oria ọvo nọ a jọ tuduhọ omai awọ re ma lẹ “Olẹ Erahaizi” na ha, yọ Ebaibol na ọ gwọlọ nọ ma wariẹ olẹ ọvona ẹwẹwariẹ hẹ.