Uvie Ọghẹnẹ nọ Jesu Kristi ọ rrọ Ovie riẹ na o te wha udhedhẹ ziọ akpọ, orọnikọ isuẹsu ahwo-akpọ họ. Muẹrohọ oware nọ Ebaibol na o wuhrẹ kpahe ẹruore igbunu nana.

1.   Ọghẹnẹ o ti ru nọ “ẹmo o je serihọ ri te oka akpọ” na, ọ vẹ rọ ere ru eyaa riẹ gba inọ: ‘Udhedhẹ u te akpọ udevie ahwo nọ a were riẹ!’—Olezi 46:9; Luk 2:14.

2.   Obọ odhiwu Uvie Ọghẹnẹ o rrọ, yọ u ti su akpọ na kpobi. (Daniẹl 7:14) Evaọ oke nọ u ti su akpọ na, u ti si oma-ohẹriẹ kpobi no otọ, onọ o be mae wha ẹmo ze nẹnẹ.

3.   A se Jesu, ọnọ ọ rrọ Ovie Uvie Ọghẹnẹ na “Ovie Udhedhẹ,” yọ o ti ru nọ udhedhẹ o te rọ jọ bẹdẹ.—Aizaya 9:6, 7.

4.   Ahwo nọ a gba riẹ mu nọ a rẹ siọ ohọre ba ha a te ruọ Uvie na ha, keme “[Ọghẹnẹ] o mukpahe ọnọ o you igbruku” hayo ozighi.—Olezi 11:5; Itẹ 2:22.

5.   Ọghẹnẹ o bi wuhrẹ ahwo nọ a te jọ otọ esuo riẹ epanọ a sae rọ rria dhedhẹ. Ebaibol na ọ ta kpahe oware nọ u ti no uwuhrẹ nana ze, inọ: “A ve ti duwu egbọdọ rai zihe ruọ etọẹkpẹ gbe izuẹ rai zihe ruọ ubru-ebe; orẹwho o gbẹ te wọ ẹmo bru orẹwho ho, hayo wuhrẹ kpahọ ẹmo-ofio ofa ha.”—Aizaya 2:3, 4.

 Isẹri Jihova nọ e rrọ akpọ na soso a bi wuhrẹ epanọ a rẹ rọ rria dhedhẹ kugbe amọfa. (Matiu 5:9) Dede nọ ma no erẹwho sa-sa nọ i bu vi 230 ze, ma re fi ẹmo ho.