Ee. Ebaibol na ọ sai fiobọhọ kẹ omai ru oware nọ udu u gbe ro brukpe omai hi. (Olezi 32:1-5) Nọ ma te ru oware jọ thọ, ma je dhesẹ nọ oware na o ginẹ kẹ omai uye, Ọghẹnẹ ọ rẹ rọvrẹ omai je ru udu te omai otọ. (Olezi 86:5) Ebaibol na o dhesẹ nọ udu nọ u re brukpe omai na o sai fiobọhọ kẹ omai ẹsejọ, keme o rẹ sai ru nọ ma rẹ rọ siọ oware uyoma nọ ma bi ru ba jẹ kẹnoma kẹe lelele. (Olezi 51:17; Itẹ 14:9) Rekọ Ebaibol na ọ vuẹ omai nọ u fo ho re udu u brukpe ohwo vrẹta hayo re ohwo o roro nọ o gbe wo ẹruore he hayo o gbe fioka ha evaọ aro Ọghẹnẹ. Iroro itieye na e sai ru nọ “ọkora ọgaga” ọ rẹ rọ jọ ohwo oma.​—2 Ahwo Kọrint 2:7.

•  Eme ọ rẹ sai ru udu brukpe ohwo?

•  Eme me re ru nọ udu u te bi brukpe omẹ?

•  Eria Ebaibol nọ e ta kpahe udu nọ u re brukpe ohwo gbe erọvrẹ

 Eware sa-sa e riẹ nọ e rẹ lẹliẹ udu brukpe omai. Udu o sai brukpe omai nọ ma te ru ohwo jọ thọ hayo nọ ma gbe ru oware jọ nọ u fo nọ ma re ru hu. Rekọ ẹsejọ, dede nọ ma ru oware ovo thọ họ, udu o rẹ sai brukpe omai. Wọhọ oriruo, nọ ma te fi izi egaga họ kẹ omamai, oke kpobi nọ ma gbẹ sai koko ai hi, udu o sai brukpe omai. Oyejabọ nọ Ebaibol na ọ rọ vuẹ omai nọ ma du rẹro eware nọ ma sai ru hu mi omamai hi.​—Ọtausiuwoma Na 7:16.

 Ukpenọ whọ rẹ kuvẹ re awa oware nọ who ru u kpe owhẹ no, daoma ru oware nọ o rẹ lẹliẹ awaọruọ ra kpotọ. Eme whọ rẹ sai ru?

•   Rọwo nọ who gine ru thọ. Whọ sae lẹ se Jihova a Ọghẹnẹ re ọ rọvrẹ owhẹ. (Olezi 38:18; Luk 11:4) Jọ u mu owhẹ ẹro nọ Ọghẹnẹ o ti yo olẹ ra nọ who te dhesẹ nọ oware nọ who ru na o ginẹ kẹ owhẹ uye, nọ who je kurẹriẹ jẹ daoma ru epanọ who gbe ro ru oware yena ofa ha. (2 Iruẹru-Ivie 33:13; Olezi 34:18) Ọghẹnẹ ọ rẹ ruẹ udu mai nọ ohwo-akpọ ọvo ọ rẹ sae ruẹ hẹ na. Ọghẹnẹ “o re ru ẹme riẹ gba o te je kiẹrẹe, fikiere ọ te rọ izieraha mai rọvrẹ omai” nọ ọ tẹ ruẹ nọ ma be daoma re ma siobọno ekpehre uruemu jọ nọ ma wo.​—1 Jọn 1:9; Itẹ 28:13.

   Nọ who te ru ohwo jọ thọ, u fo nọ whọ rẹ rọwo nọ who gine ru ei thọ, who ve wounu kẹe ziezi. Rekọ ẹsikpobi onana o rẹ lọhọ họ. Re whọ sai wounu, o gwọlọ nọ who re wo udu gbe omaurokpotọ. Rekọ whọ tẹ sai gine ru ere, oma u re vẹ owhẹ wọhọ ẹsenọ a wọ owha ogbẹgbẹdẹ jọ no uzou ra. Yọ u re ru nọ udhedhẹ o rẹ rọ jọ udevie ra avọ ohwo na.​—Matiu 3:8; 5:23, 24.

•   Roro didi kpahe eria Ebaibol sa-sa nọ e ta kpahe ohrọ-oriọ Ọghẹnẹ. Wọhọ oriruo, roro kpahe ẹme nọ ọ rrọ 1 Jọn 3:19, 20 na. Oria Ebaibol yena o ta nọ “udu mai [o sai] brukpe omai,” koyehọ, o sae jọ nọ ma be fo omamai ga hrọ, bi tube roro nọ ma te ohwo nọ Ọghẹnẹ ọ rẹ sai you hu. Rekọ oria na o ta re nọ “Ọghẹnẹ ọ rro vi udu mai.” Eme họ otọ ẹme yena? Otọ ẹme yena họ Ọghẹnẹ ọ riẹ omai totọ, ọ riẹ eware nọ e be jọ bẹbẹ kẹ omai re ma siobọno na, ọ tẹ jẹ riẹ epanọ o rẹ jọ omai oma nọ ma te ru eware yena. Ọ riẹ nọ ma re ru thọ ẹsibuobu fikinọ a yẹ omai avọ uzioraha. b (Olezi 51:5) Fikiere nọ ohwo ọ tẹ raha uzi je gine dhesẹ nọ oware nọ o ru na o kẹ riẹ uye, Jihova ọ rẹ rọvrẹ riẹ.​—Olezi 32:5.

•   Who roro kpahe ikpehre eware nọ who ru vrẹ no ẹsikpobi hi. Whọ rẹ jọ Ebaibol na ruẹ iku ahwo jọ nọ a ru eware iyoma nọ a kurẹriẹ uwhremu na. Ohwo otiọna jọ họ, Sọl obọ Tasọs, ọnọ a se Pọl ukọ na uwhremu na. Okenọ ọ gbẹ jọ ohwo Farisi o je kpokpo ilele Jesu gaga. (Iruẹru Ikọ 8:3; 9:​1, 2, 11) Rekọ nọ Pọl ọ ruẹ nọ kpakọ Ọghẹnẹ avọ Jesu Kristi nọ ọ rrọ Mesaya na o je kpokpo na, o te kurẹriẹ, je zihe ruọ Oleleikristi, ọnọ o fi emamọ oriruo họ otọ kẹ omai. Pọl ọ vioja eware iyoma nọ o ru evaọ oke yena, rekọ ọ jẹ hai roro kpahe ae ẹsikpobi hi. Ọ riẹ nọ Ọghẹnẹ ọ ginẹ re ohrọ riẹ, fikiere ọ jẹ rọ ọwhọ ta usi uwoma na, o te je kru ẹruore uzuazọ ebẹdẹ bẹdẹ nọ o wo na gaga.​—Ahwo Filipai 3:13, 14.

 Jerimaya 31:34: “Mẹ te rọ oruthọ rai rọvrẹ rai, yọ mẹ gbẹ te kareghẹhọ uzioraha rai ofa ha.”

 Oware nọ u dhesẹ: Ọghẹnẹ ọ tẹ rọvrẹ no yọ ọ rọvrẹ no, ọ rẹ gbẹ kareghẹhọ omai oware nọ ma ru thọ na ha. Ọghẹnẹ ọ rẹ ginẹ re ohrọ.