Ijo. Ebaibol ọ ta nọ ugho yọ oware uyoma ha. Ma rẹ jọ Ebaibol ruẹ oria ovo nọ o ta nọ ugho oye o wha ebẹbẹ nọ e rrọ akpọ na kpobi ze he. Ahwo buobu a rẹ ta nọ “ugho yọ ẹdhọ” hayo “ugho yọ ekpehre oware.” Rekọ orọnọ ere Ebaibol ọ ta ha. Ẹme nọ Ebaibol ọ ta họ, “uyoyou ugho yọ ehri oghẹrẹ eware iyoma kpobi.” a​—1 Timoti 6:10.

•  Eme Ebaibol ọ ta kpahe ugho?

•  Fikieme Ebaibol ọ rọ ta nọ ma you ugho ho?

•  Irere vẹ ma re wo nọ ma te lele ohrẹ Ebaibol kpahe ugho?

•  Eria Ebaibol nọ e ta kpahe ugho

 Ebaibol ọ ta nọ u wo eware buobu nọ ma rẹ sae rọ ugho ru. Ọ tubẹ ta nọ “o rẹ thọ ohwo.” (Ọtausiuwoma Na 7:12) U te no ere no, Ebaibol o jiri ahwo nọ a re ru ọghọ, yọ ma riẹ nọ a sae rọ ugho ru ọghọ ẹsejọ.​—Itẹ 11:25.

 O make rrọ ere na, Ebaibol ọ ta nọ ma yọroma, re ma gbẹ rọ akpọ mai kpobi le igho ho. Ọ ta nọ: “Jọ edhere uzuazọ rai o kare uyoyou ugho, jọ onọ wha wo o da owhai ẹro.” (Ahwo Hibru 13:5) Oware nọ etenẹ na o bi wuhrẹ omai na họ, ma le efe he. Ukpoye, jọ utho nọ ma wo o da omai ẹro. Oware nọ ohwo-akpọ ọ ginẹ gwọlọ họ, emu, iwu, gbe oria nọ ọ rẹ rria.​—1 Timoti 6:8.

 Ahwo nọ a wo uvou-uthethei a ti wo uzuazọ ebẹdẹ bẹdẹ hẹ. (Ahwo Ẹfisọs 5:5) Oware jọ nọ o wha riẹ ze họ, uvou-uthethei yọ oghẹrẹ ẹdhọgọ jọ. (Ahwo Kọlọsi 3:5) Oware ofa họ, ohwo nọ o wo uvou-uthethei o re duwu abọ họ eware iyoma buobu. Itẹ 28:20 o ta nọ: “Ọnọ o bi le efe kiti kiti ọ te siọ oware uyoma ba eru hu.” Ọ sae tubẹ gwọlọ ru eware wọhọ iwhayo, ofruriọ, ewhariọ, ovivie, gbe ohwo-okpe.

 Ohwo nọ o you ugho ọ gbẹ maki ru oware uyoma ha, ọ sai kie ruọ ebẹbẹ efa. Ebaibol ọ ta nọ “ahwo nọ a gba riẹ mu nọ a re fe a re kie ruọ odawọ gbe agbefẹ gbe isiuru igheghẹ gbe erọ enwoma buobu.”​—1 Timoti 6:9.

 Ma gbe duwu abọ họ eware iyoma fiki ugho ho, amọfa a te kẹ omai adhẹẹ. Oye ovo gbe he, eva mai e te were Ọghẹnẹ, o ve je fiobọhọ kẹ omai. Ọghẹnẹ ọ ya eyaa kẹ ohwo kpobi nọ ọ be daoma ru oware nọ o rẹ were iẹe inọ: “Mẹ te nyasiọ owhẹ ba vievie he, yọ me ti gbabọkẹ owhẹ vievie he.” (Ahwo Hibru 13:5, 6) Ọ tẹ jẹ ta nọ “ohwo ọtẹruo o ti wo eghale buobu.”​—Itẹ 28:20.