“Uwowou ulogbo nọ me dhesẹ kẹ owhẹ u te, keme evaọ oma enọ e ga ha ogaga mẹ u re jo dhesẹ oma via vọvọ.”—2 Ahwo Kọrint 12:9, Efafa Akpọ Ọkpokpọ.

 “Aruoriwo mẹ o te kẹ owhẹ, keme eva okuako ogaga mẹ o jẹ gbunu.”—2 Ahwo Kọrint 12:9, Ebaibol Ẹri Na.

 Ọghẹnẹ ọ ya eyaa nọ ọ te kẹ Pọl ukọ na ogaga nọ ọ sai ro thihakọ je fi edawọ nọ i bi tei kparobọ.

 “Uwowou ulogbo nọ me dhesẹ kẹ owhẹ u te.” A sae jẹ fa ẹme nana nọ Ọghẹnẹ ọ rọ kuyo olẹ Pọl na inọ, “uwowou mẹ họ oware nọ whọ gwọlọ.” Otọ ẹme na họ, uwowou ulogbo Ọghẹnẹ u ti fiobọhọ kẹ Pọl re ọ sai thihakọ edawọ riẹ. Evaọ oghẹrẹ vẹ? Ẹme nọ a fa “uwowou ulogbo,” hayo “aruoriwo” na, yọ ẹme nọ a re ro dhesẹ okẹ ọvọvẹ nọ Ọghẹnẹ ọ rẹ kẹ ohwo dede nọ ohwo na o te ọnọ a rẹ kẹ okẹ na ha. Pọl ọ jọ eware nọ o kere dhesẹ nọ o wo erere gaga no uwowou ulogbo Ọghẹnẹ ze. Dede nọ Pọl o je kpokpo ukoko Ọghẹnẹ, Ọghẹnẹ ọ kẹ riẹ ogaga re ọ sai nwene uruemu riẹ, je fiobọhọ kẹ amọfa kurẹriẹ ruọ ukoko Ileleikristi na. (1 Ahwo Kọrint 15:9, 10; 1 Timoti 1:12-14) Pọl ọ sai fievahọ Ọghẹnẹ inọ o ti fiobọhọ kẹe re o fi edawọ kpobi nọ i ti tei kparobọ.

 “Keme evaọ oma enọ e ga ha ogaga mẹ u re jo dhesẹ oma via vọvọ.” Jihova a ọ ta kẹ Pọl ukọ na inọ ogaga riẹ u re dhesẹ oma via vọvọ nọ ọ tẹ be rehọ iẹe fiobọhọ kẹ enọ e ga ha. (2 Ahwo Kọrint 4:7; 12:8) Nọ Ileleikristi a te vuhumu nọ u wo umuo nọ ogaga rai u te, a jẹ rẹroso Ọghẹnẹ re o fiobọhọ kẹ ai, Ọghẹnẹ ọ rẹ rọ ogaga riẹ fiobọhọ kẹ ae vọvọ. (Ahwo Ẹfisọs 3:16; Ahwo Filipai 4:13) Enẹ ma sae rọ ta nọ ogaga Ọghẹnẹ u re dhesẹ oma via evaọ oma enọ e ga ha.

 Pọl o kere ileta se Ileleikristi obọ Kọrint evaọ oware wọhọ 55 C.E. Evaọ ubrobọ urere ileta na, ọ ta nọ ọyomariẹ yọ ukọ Jesu re. Ọ ta ere keme ahwo jọ nọ a se omarai ikọ Jesu a jẹ fo iẹe, yọ ẹsejọhọ a je gu ei ẹdhọ fiki oghẹrẹ nọ oma riẹ o jọ hayo oghẹrẹ nọ ọ rẹ ta ẹme.—2 Ahwo Kọrint 10:7-10; 11:5, 6, 13; 12:11.

 Evaọ ileta na, ọ ta nọ Ọghẹnẹ họ ọnọ ọ be kẹe ogaga nọ ọ be sae rọ ta usi uwoma je thihakọ ebẹbẹ nọ i bi tei, orọnikọ ẹgba obọriẹ hẹ. (2 Ahwo Kọrint 6:4; 11:23-27; 12:12) Evaọ uzou avọ 12, ọ ta kpahe “unwe evaọ oma” riẹ, ẹsejọhọ ẹbẹbẹ jọ nọ o be kẹe uye hayo oware jọ nọ o be dae evaọ oma riẹ. (2 Ahwo Kọrint 12:7) Dede nọ Pọl ọ fodẹ uzedhe oware nọ o be kẹe uye he, ọ gba riẹ mu nọ o re thihakọ keme ọ rẹroso Ọghẹnẹ inọ ọ te kẹe ogaga.

 Nẹnẹ, eware e sae jọ gaga kẹ Ileleikristi yọ a sae rẹriẹ ovao ku ukpokpoma. Rekọ oware nọ o rẹ kẹ ae omosasọ họ, a riẹ nọ Ọghẹnẹ ọ te kẹ ae ogaga nọ a sai ro thihakọ ebẹbẹ kpobi nọ i te rai. Wọhọ Pọl ukọ na, a sae ta ududu nọ: “Okenọ mẹ ga ha, ẹsiẹe me re wo ogaga.”—2 Ahwo Kọrint 12:10.

 Rri ividio ọkpẹkpẹe nana re whọ ruẹ eware nọ e rrọ obe 2 Ahwo Kọrint.