“Jesu ọ tẹ ta kẹe nọ: ‘Mẹ họ edhere na gbe uzẹme na gbe uzuazọ na. Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.’”—Jọn 14:6, Efafa Akpọ Ọkpokpọ.

 “Jesu ọ tẹ ta kẹe nọ, ‘Mẹ họ edhere na, gbe uzẹme, gbe uzuazọ; ohwo ọvo o bru Ọsẹ na ze he, rekọ fiki mẹ.’”—Jọn 14:6, Ebaibol Ẹri Na.

 Ohwo kpobi nọ ọ gwọlọ gọ Jihova a Ọghẹnẹ, Ọsẹ na, o re vuhu obọdẹ iruo nọ Jesu o wo mu.

 “Mẹ họ edhere na.” Jesu o rovie “edhere” na fihọ nọ ma sae rọ gọ Ọghẹnẹ evaọ oghẹrẹ nọ o rẹ were iẹe. Wọhọ oriruo, ohwo kpobi nọ ọ be lẹ se Ọghẹnẹ ọ rẹ rọ odẹ Jesu lẹ sei. (Jọn 16:23, 24) Uwhu Jesu u ru rie lọhọ nọ ma sae rọ ruẹrẹhọ kugbe Ọghẹnẹ hayo nọ ma sae rọ wariẹ jọ egbẹnyusu riẹ. (Ahwo Rom 5:8-11) Jesu o te je yeri uzuazọ nọ o ro fi emamọ oriruo hotọ kẹ ahwo nọ a gwọlọ ru eva were Ọghẹnẹ.—Jọn 13:15.

 “Mẹ họ . . . uzẹme na.” Jesu o wuhrẹ uzẹme na je yeri uzuazọ riẹ lele uzẹme na. (1 Pita 2:22) Ma re wuhrẹ uzẹme na kpahe Ọghẹnẹ nọ ma tẹ be gaviezọ kẹe. (Jọn 8:31, 32) Jesu ọ tẹ jẹ rrọ “uzẹme na” keme o ruọ eruẹaruẹ Ebaibol gba. Ọ tẹ rọ enẹ dhesẹ nọ eyaa Ọghẹnẹ i ti gine rugba dẹẹ.—Jọn 1:17; 2 Ahwo Kọrint 1:19, 20; Ahwo Kọlọsi 2:16, 17.

 “Mẹ họ . . . uzuazọ na.” Jesu o siobọno uzuazọ riẹ re ahwo nọ a fi ẹrọwọ họ iẹe a sai wo uzuazọ ebẹdẹ bẹdẹ. (Jọn 3:16, 36) Jesu ọ tẹ jẹ rrọ “uzuazọ na” rọkẹ ahwo nọ a whu no, keme ọ te kpare ae no uwhu ze.—Jọn 5:28, 29; 11:25.

 “Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.” Ahwo nọ a gwọlọ wo usu okpekpe kugbe Ọghẹnẹ a re vuhu obọdẹ iruo nọ Jesu o wo mu. A re ru onana nọ a tẹ be rọ odẹ Jesu lẹ se Ọghẹnẹ, onọ u re dhesẹ nọ a vuhu udu nọ Jesu Kristi o wo mu. (Jọn 15:16) A re je vuhumu nọ fiki Jesu ọvo a sai ro wo esiwo.—Iruẹru Ikọ 4:12; Ahwo Filipai 2:8-11.

 Eme nọ Jesu ọ ta kẹ emamọ ikọ 11 riẹ evaọ aso urere taure a te ti kpei, e rrọ obe Jọn izou 13 rite 17 na. Evaọ uzou avọ 14, Jesu ọ tuduhọ ilele riẹ awọ inọ a fi ẹrọwọ họ iẹe avọ Ọsẹ riẹ, inọ a you rai, je yoẹme kẹ ae. (Jọn 14:1, 12, 15-17, 21, 23, 24) O dhesẹ nọ o wo usu okpekpe kugbe Ọsẹ riẹ anwẹdẹ je rite enẹna. (Jọn 14:10, 20, 28, 31) O make rọnọ Jesu o ti zihe kpobọ odhiwu kẹle, ọ kẹ ilele riẹ imuẹro nọ o ti gbabọkẹ ae he. (Jọn 14:18) Ọ tẹ jẹ ya eyaa kẹ ae inọ Ọsẹ na ọ te rọ odẹ riẹ vi “ẹzi ọfuafo na” se ai, yọ o se rie “ofiobọhọ na.” (Jọn 14:25-27) Oghẹrẹ nana gbe idhere efa Jesu ọ rọ ruẹrẹ ilele riẹ kpahe kẹ ebẹbẹ nọ i ti te ai evaọ obaro.