ERIA EBAIBOL NỌ A RU VẸ

Matiu 6:33—“Kake Guọlọ Uvie” Ọghẹnẹ

KPORO

“Nọ o rrọ ere na, wha gbẹ hae kake gwọlọ Uvie na gbe ẹrẹreokie riẹ ẹsikpobi, a ve ti fi eware efa nana kpobi ba kẹ owhai.”—Matiu 6:33, Efafa Akpọ Ọkpokpọ.

“Rekọ wha kake guọlọ uvie riẹ gbe [ẹrẹreokie] riẹ, eware enana kpobi a reti fi ai họ kẹ owhai.”—Matiu 6:33, Ebaibol Ẹri Na.

Otofa Eme nọ E Rrọ Matiu 6:33

Uvie Ọghẹnẹ yọ egọmeti evaọ obọ odhiwu nọ u ti ru otọakpọ na fihọ oghẹrẹ nọ Ọghẹnẹ ọ gwọlọ nọ ọ jọ. (Matiu 6:9, 10) Ohwo ọ rẹ kake gwọlọ Uvie na nọ o te ru ei fihọ oware nọ o mai wuzou kẹe evaọ uzuazọ. a Re ohwo ọ sai ru onana, orọnikọ o rẹ were iẹe re o wuhrẹ kpahe Uvie Ọghẹnẹ ọvo ho, rekọ ọ rẹ jẹ vuẹ amọfa kpahe emamọ eware nọ Uvie na u ti ru. (Matiu 24:14) Ohwo nọ ọ be gwọlọ Uvie na ọ rẹ jẹ lẹ re o ze.—Luk 11:2.

Ẹrẹreokie Ọghẹnẹ u kugbe izi riẹ kpahe oware nọ u woma gbe onọ u yoma. (Olezi 119:172) Fikiere ohwo ọ rẹ gwọlọ ẹrẹreokie Ọghẹnẹ nọ o te bi koko izi riẹ, enọ e rrọ rọkẹ ewoma mai.—Aizaya 48:17.

Ẹme na, “a ve ti fi eware efa nana kpobi ba kẹ owhai” u dhesẹ eyaa nọ Ọghẹnẹ ọ ya inọ ọ te rẹrote ahwo nọ a rọ Uviẹ na karo evaọ uzuazọ rai je bi koko izi Ọghẹnẹ.—Matiu 6:31, 32.

Eme nọ E Wariẹ Matiu 6:33 Họ

Jesu ọ ta eme nana okenọ ọ jẹ kẹ ovuẹ nọ a se Ovuẹ Evaọ Ugbehru na, onọ a kere fihọ Matiu izou 5-7. Ahwo buobu nọ a jẹ gaviezọ kẹ Jesu a jọ iyogbe. Ẹsejọhọ a je roro nọ u fo nọ a rẹ mae tẹrovi epanọ a rẹ rọ kuọ omarai, onọ u ru nọ a gbe ro wo oke tere nọ a rẹ rọ gwọlọ Uvie na ha. Rekọ Jesu ọ tuduhọ ae awọ inọ a muẹrohọ epanọ Ọghẹnẹ ọ be rọ rẹrote idodo gbe evra nọ ọ ma na. Ọghẹnẹ ọ ya eyaa nọ o ti ru epọvo na kẹ ahwo kpobi nọ a be kake gwọlọ Uvie na re.—Matiu 6:25-30.

Eriwo ọthọthọ nọ Ahwo A Wo Kpahe Matiu 6:33

Eriwo ọthọthọ: Ohwo nọ ọ be gwọlọ Uvie na o re fe.

Uzẹme ẹme na: Jesu ọ ta nọ ahwo nọ a rọ Uvie Ọghẹnẹ karo a ti wo eware nọ e roja kẹ ae, wọhọ emu gbe iwu. (Matiu 6:25, 31, 32) Rekọ ọ ta nọ ahwo otiọye a ti fe he, yọ orọnikọ epanọ ohwo o fe te u re dhesẹ nọ Ọghẹnẹ ọ be ghale iẹe he. Jesu dede ọ tubẹ vẹvẹ ilele riẹ unu kpahe efe nọ a re le, onọ o rẹ sai ru ei bẹbẹ re a kake gwọlọ Uvie na. (Matiu 6:19, 20, 24) Pọl ukọ na o ru iruo gaga fiki Uvie Ọghẹnẹ, rekọ u wo ẹsejọ nọ eware nọ e roja kẹe e jẹ hae kare iẹe. Wọhọ Jesu, Pọl ọ vẹvẹ amọfa unu kpahe enwoma nọ i re noi ze nọ ohwo ọ tẹ be dawo oghẹrẹ kpobi re ọ sai fe.—Ahwo Filipai 4:11, 12; 1 Timoti 6:6-10.

Eriwo ọthọthọ: U du gwọlọ nọ Ileleikristi a re ru iruo nọ a rẹ rọ kuọ omarai hi.

Uzẹme ẹme na: Ebaibol na ọ ta nọ Ileleikristi a re ru iruo nọ a rẹ rọ kuọ omarai gbe uviuwou rai. (1 Ahwo Tẹsalonika 4:11, 12; 2 Ahwo Tẹsalonika 3:10; 1 Timoti 5:8) Orọnikọ Jesu ọ ta nọ Ileleikristi a gwọlọ Uvie na ọvo ho, ukpoye ọ ta nọ a kake gwọlọ Uvie na.

Nọ ohwo ọ tẹ be kake gwọlọ Uvie na jẹ be daoma ru iruo nọ ọ rẹ rọ kuọ omariẹ, Ọghẹnẹ o re fiobọhọ kẹe wo eware nọ e roja evaọ uzuazọ.—1 Timoti 6:17-19.

a A fa ẹme na “gbẹ hae . . . gwọlọ” no ẹme Griki jọ ze, yọ u dhesẹ oware nọ ohwo ọ rẹ hai ru ẹsikpobi, a rẹ sae jẹ fae “dhe ẹgwẹgwọlọ.” Fikiere, Uvie na o rẹ jọ oware nọ o rẹ mai wuzou kẹ omai evaọ uzuazọ, orọnikọ oware nọ o rẹ were omai evaọ omoke jọ ọvo ho.