“Wha gbẹ kuvẹ re uyero-akpọ nana o kpọ owhai hi, rekọ wha nwene oghẹrẹ ohwo nọ wha rrọ ẹkwoma iroro rai nọ wha re nwene, re wha sai ru omarai wo imuẹro kpahe oware nọ o rrọ oreva Ọghẹnẹ nọ u woma, nọ ọ rẹ jẹrehọ, jẹ rrọ gbagba.”—Ahwo Rom 12:2, Efafa Akpọ Ọkpokpọ.

 “Wha kielele akpọ nana ha; rekọ jọ ẹjiroro ọkpokpọ rai o rẹriẹ owhai, re wha dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.”—Ahwo Rom 12:2, Ebaibol Ẹri Na.

 Re ohwo ọ sai ru eva were Ọghẹnẹ, orọnikọ ọ rẹ kẹnoma kẹ ekpehre iruemu ọvo ho, o gwọlọ nọ o re nwene hayo siobọno iruemu nọ i fo ho nọ o wo. Ọghẹnẹ ọ rẹ gba ahwo họ nwene he; ohwo o re nwene fikinọ o you Ọghẹnẹ yọ ọ ruẹ nọ izi riẹ e rrọ wowoma, yọ i re fiobọhọ kẹ omai.—Aizaya 48:17.

 “Wha gbẹ kuvẹ re uyero-akpọ nana o kpọ owhai hi.” “Uyero-akpọ” nana, koyehọ iroro, iruẹru, gbe iruemu ahwo nọ a rrọ akpọ na i wo ohẹriẹ no iroro gbe eriwo Ọghẹnẹ. (1 Jọn 2:15-17) Uyero-akpọ na u re ru ahwo dhesẹ ekpehre iruemu je ru eware nọ i fo ho. Re ohwo ọ sae gọ Ọghẹnẹ evaọ oghẹrẹ nọ o rẹ were iẹe, o gwọlọ nọ ọ rẹ kẹnoma kẹ iruemu gbe ikpehre eware nọ ahwo akpọ na a bi ru, keme e rẹ wha uye sei yọ e rẹ dha Ọghẹnẹ eva.—Ahwo Ẹfisọs 2:1-3; 4:17-19.

 “Wha nwene oghẹrẹ ohwo nọ wha rrọ ẹkwoma iroro rai nọ wha re nwene.” O tẹ jẹ gwọlọ nọ ohwo ọ rẹ daoma nwene oghẹrẹ ohwo nọ ọ rrọ evaọ obeva, koyehọ, te iroro gbe uruemu riẹ. Onana ginọ enwene ologbo keme ẹme Griki nọ a fa “nwene” na, o dhesẹ oghẹrẹ nọ okpoho o re nwene zihe ruọ ẹwowo. Ahwo nọ a be gọ Ọghẹnẹ a rẹ whẹ “uruemu okpokpọ” na họ oma.—Ahwo Ẹfisọs 4:23, 24; Ahwo Kọlọsi 3:9, 10.

 “Wha . . . ru omarai wo imuẹro kpahe oware nọ o rrọ oreva Ọghẹnẹ nọ u woma, nọ ọ rẹ jẹrehọ, jẹ rrọ gbagba.” Ọghẹnẹ ọ gwọlọ nọ eware nọ ahwo nọ a be gọe a rọwo i re mu ai ẹro ziezi. Yọ o rẹ jọ ere nọ a te bi wuhrẹ Ebaibol na, ru oware nọ a jariẹ wuhrẹ, jẹ be ruẹ ewoma nọ o bi noi ze nọ a bi koko izi Ọghẹnẹ na. A vẹ rọ ere ru omarai wo imuẹro nọ idhere Ọghẹnẹ e mai woma.—Olezi 34:8.

 Obe Ahwo Rom izou 12 o ta kpahe epanọ ma sae rọ gọ Ọghẹnẹ evaọ oghẹrẹ nọ o rẹ were iẹe. Yọ egagọ itieye i re dhesẹ oma via evaọ kabọ kabọ uzuazọ mai, o tẹ jẹ gwọlọ nọ ohwo ọ rẹ rehọ “ẹgba iroro” riẹ roro ziezi kpahe oware nọ ọ rọwo orọnikọ o re mu rọwo gheghe fikinọ o were iẹe he. (Ahwo Rom 12:1, 3) Uzou Ebaibol na o tẹ jẹ ta kpahe epanọ ma sai ro dhesẹ emamọ iruemu, epanọ ma sai ro lele amọfa rria dhedhẹ, gbe oware nọ ma re ru nọ amọfa a te ru omai thọ.—Ahwo Rom 12:9-21.