“Ọghẹnẹ o dhesẹ oghẹrẹ nọ uyoyou riẹ o rrọ via kẹ omai, keme nọ ma gbẹ jọ erahaizi, Kristi o whu kẹ omai.”—Ahwo Rom 5:8, Efafa Akpọ Ọkpokpọ.

 “Onana Ọghẹnẹ oro ru uyoyou riẹ gba kẹ omai keme okenọ ma gbẹ jọ erahaizi, Kristi o te whu kẹ omai.”—Ahwo Rom 5:8, Ebaibol Ẹri Na.

 Jihova a Ọghẹnẹ o dhesẹ uyoyou ulogbo okenọ ọ kẹ Jesu Kristi Ọmọ riẹ uvẹ re o whu fiki izieraha ahwo-akpọ. (Jọn 3:16) Nọ orọnọ mai ahwo-akpọ yọ erahaizi na, eware nọ e wọso izi Ọghẹnẹ e rẹ mae ziọ omai iroro, yọ eye ma rẹ mai ru. (Ahwo Kọlọsi 1:21, 22) Rekọ Ọghẹnẹ o ru rie lọhọ re ma ruẹrẹhọ kugbei ẹkwoma “uwhu Ọmọ riẹ.” (Ahwo Rom 5:10) Fikiere, ma sai wo uvẹ nọ ma re ro usu okpekpe kugbe Ọghẹnẹ enẹna, je wo ẹruore uzuazọ ebẹdẹ bẹdẹ evaọ obaro.—Ahwo Rom 5:11; 1 Jọn 4:9, 10.

 Ileleikristi nọ e jẹ rria Rom Pọl ukọ na o kere eme nana se. Evaọ oria nọ o rrọ uzou avọ 5 ileta ro se Ahwo Rom enẹna, Pọl ọ ta kpahe oware nọ Ileleikristi a sae rọ ghọghọ gbe oware nọ u re ro mu ai ẹro nọ a ti wo ẹruore rai tobọ. (Ahwo Rom 5:1, 2) “Ẹruore na o re kiekpe ohwo ho,” keme fiki uyoyou ulogbo Ọghẹnẹ nọ ọ rehọ uwhu Jesu dhesẹ via ma ro woi. (Ahwo Rom 5:5, 6) Jesu o yoẹme kẹ Ọghẹnẹ evaọ oware kpobi rite urere, onọ u ru rie wo ohẹriẹ gaga nọ Adamu, ọzae ọsosuọ na nọ ọ rọwo ru ere he. (Ahwo Rom 5:19) Aghẹmeeyo Adamu o wha uzioraha gbe uwhu se emọ riẹ. (Ahwo Rom 5:12) Rekọ, ẹmeoyo Jesu gbe uwhu riẹ u ru rie lọhọ nọ ahwo-akpọ nọ a bi yoẹme kẹ Ọghẹnẹ a sai ro wo ẹruore uzuazọ ebẹdẹ bẹdẹ.—Ahwo Rom 5:21.