“Jọ ozọ u mu owhẹ hẹ, keme mẹ rrọ kugbe owhẹ. Whọ ruawa ha, keme mẹ họ Ọghẹnẹ ra. Me ti ru owhẹ ga, ẹhẹ, me ti fiobọhọ kẹ owhẹ, mẹ te rehọ obọze ẹrẹreokie mẹ kru owhẹ kekeke.”—Aizaya 41:10, Efafa Akpọ Ọkpokpọ.

 “Ozọ umu owhẹ hẹ, keme mẹ avọ owhẹ a gbẹ rọ, who nyuhẹ hẹ, keme mẹ họ Ọghẹnẹ ra. Mẹ te kẹ owhẹ ogaga, me ti fiobọhọ kẹ owhẹ, mẹ te rehọ obokparọ mẹ kru owhẹ dikihẹ.”—Aizaya 41:10, Ebaibol Ẹri Na.

 Jihova a ọ be jọ oria ikere nana ta kẹ idibo riẹ nọ o ti fiobọhọ kẹ ae ghelọ epanọ ebẹbẹ nọ a wo e rro te kẹhẹ.

 “Mẹ rrọ kugbe owhẹ.” Jihova ọ be vuẹ idibo riẹ nọ u du gwọlọ nọ a rẹ dhozọ họ nọ a te wo ẹbẹbẹ, keme ọ rrọ kugbe ae. Nọ orọnọ ọ riẹ ebẹbẹ nọ a wo na, yọ o re yo nọ a tẹ be lẹ sei na, o rẹ wọhọ ẹsenọ ọ ginẹ rrọ etẹe kugbe ae.—Olezi 34:15; 1 Pita 3:12.

 “Mẹ họ Ọghẹnẹ ra.” Jihova ọ be rehọ ẹme nana kareghẹhọ idibo riẹ inọ ọyomariẹ yọ Ọghẹnẹ rai, yọ egagọ rai e be were iẹe. Oware ovuọvo o riẹ hẹ nọ u re ru nọ Jihova o gbe ro fiobọhọ kẹ idibo riẹ hẹ.—Olezi 118:6; Ahwo Rom 8:32; Ahwo Hibru 13:6.

 “Me ti ru owhẹ ga, ẹhẹ, me ti fiobọhọ kẹ owhẹ, mẹ te rehọ obọze ẹrẹreokie mẹ kru owhẹ kekeke.” Jihova ọ ta eko eme esa nana re u ru idibo riẹ riẹ nọ o ti gine fiobọhọ kẹ ae. Jihova ọ ta nọ ọ te rehọ obọze riẹ ro kru ae, koyehọ o ti ru oware jọ ro fiobọhọ kẹ ae nọ a te wo ẹbẹbẹ. Nọ ohwo o te kie, Jihova ọ rẹ sae rriẹ obọze riẹ ro kru ei kpama.—Aizaya 41:13.

 Ebaibol na họ ugogo oware nọ Jihova o re ro fiobọhọ kẹ idibo riẹ jẹ bọ ae ga. (Joshua 1:8; Ahwo Hibru 4:12) Wọhọ oriruo ahwo nọ a wo ebẹbẹ sa-sa wọhọ, uvuhu, ẹyao, hayo nọ ohwo o whu ku, a sae jọ Ebaibol na ruẹ ehrẹ nọ i re fiobọhọ kẹ ai thihakọ. (Itẹ 2:6, 7) U te no ere no, Jihova ọ rẹ rọ ẹzi ọfuafo riẹ fiobọhọ kẹ idibo riẹ wo ẹgba nọ a re ro thihakọ ebẹbẹ.—Aizaya 40:29; Luk 11:13.

 Eme oria ikere nana e sasa ahwo Ju nọ e jẹ gọ Ọghẹnẹ oma, enọ a mu kpohọ igbo Babilọn uwhremu na. Jihova ọ ruẹaro fihotọ no vẹre inọ okenọ ahwo Ju na a ti ro no igbo kpo o tẹ be kẹle no, usi jọ u ti do ze inọ ewegrẹ jọ a be wọ ohọre bru Babilọn avọ erẹwho nọ e wariẹ e riẹ họ ze. (Aizaya 41:2-4; 44:1-4) Usi nana u ti ru ozọ mu Babilọn avọ erẹwho nọ e wariẹ e riẹ họ na gaga, rekọ ozọ u ti mu ahwo Ju na ha, keme Jihova ọ te thọ ae. Isiasa soso Jihova ọ ta nọ, “jọ ozọ u mu owhẹ hẹ,” ọ tẹ rọ ere dhesẹ kẹ ae nọ o ti gine fiobọhọ kẹ ae.—Aizaya 41:5, 6, 10, 13, 14.

 Dede nọ ahwo Ju nọ a jọ igbo Babilọn Jihova ọ ta eme nọ e rrọ obe Aizaya 41:10 na kẹ, o ru re a kere eme na fihotọ re e sasa idibo riẹ kpobi oma nẹnẹ re. (Aizaya 40:8; Ahwo Rom 15:4) O bi fiobọhọ kẹ ai nẹnẹ wọhọ epanọ o fiobọhọ kẹ idibo riẹ evaọ okenọ u kpemu na.