ERIA EBAIBOL NỌ A RU VẸ

Emuhọ 1:1—“Evaọ Emuhọ Ọghẹnẹ Ọ Ma Idhiwu gbe Otọakpọ Na”

KPORO

“Evaọ emuhọ Ọghẹnẹ ọ ma idhiwu gbe otọakpọ na.”—Emuhọ 1:1, Efafa Akpọ Ọkpokpọ.

“Evaọ emuhọ Ọghẹnẹ ọ ma odhiwu gbe akpọ.”—Emuhọ 1:1, Ebaibol Ẹri Na.

Otofa Eme nọ E Rrọ Emuhọ 1:1

Whọ rẹ jọ eme nana nọ i mu Ebaibol na họ na ruẹ eware ivẹ jọ nọ i wuzou gaga. Orọ ọsosuọ, u wo oke nọ a rọ ma “idhiwu gbe otọakpọ na,” koyehọ ehrugbakpọ na. Orọ avọ ivẹ, Ọghẹnẹ họ ọnọ ọ ma rai.—Eviavia 4:11.

Ebaibol na ọ vuẹ omai oghẹrẹ nọ ehrugbakpọ na o kri te no ho hayo oghẹrẹ nọ Ọghẹnẹ ọ rọ mae he. Rekọ o vuẹ omai nọ “ẹgba ologbo riẹ nọ o bi ruiruo ẹsikpobi gbe ogaga riẹ nọ u re mu ọwhewhe,” oye ọ rọ mae.—Aizaya 40:26.

Ẹme Hibru nọ a fa “ma” na a rẹ rehọ iẹe ta kpahe oware nọ Ọghẹnẹ o ru ọvo. a Yọ evaọ Ebaibol na, Jihova b Ọghẹnẹ ọvo a se Ọmemama.—Aizaya 42:5; 45:18.

Eme nọ E Wariẹ Emuhọ 1:1 Họ

Emuhọ 1:1 oye iku emama na e jọ muhọ rite uzou avọ 2. No Emuhọ 1:1 rite 2:4, Ebaibol na ọ ta umutho eme jọ ọvo kpahe oghẹrẹ nọ Ọghẹnẹ ọ rọ ma otọakpọ na jẹ ma eware kpobi nọ i wo uzuazọ fihọ iẹe othotha, te ọzae avọ aye ọsosuọ na. Kẹsena o tẹ romatotọ gbiku epanọ a rọ ma ọzae avọ aye na.—Emuhọ 2:7-25.

Obe Emuhọ na o dhesẹ nọ “edẹ” ezeza Ọghẹnẹ ọ rọ ma eware na. Rekọ orọnikọ edẹ ezeza gheghe oye oria Ebaibol nana o be ta kpahe na ha, ukpoye o be ta kpahe etoke sa-sa jọ, yọ a fodẹ epanọ etoke enana i theri te he. Uzẹme riẹ họ, ẹme na “ẹdẹ” o rẹ sae jọ etoke sa-sa orọnikọ ẹdẹ ọvo jọ họ. Wọhọ oriruo, evaọ Emuhọ 2:4 a se edẹ ezeza nọ Ọghẹnẹ ọ rọ ma eware na “okenọ” hayo “ẹdẹ” ọvo.

Eriwo Ọthọthọ Sa-Sa Kpahe Emuhọ 1:1

Eriwo ọthọthọ: Umutho ikpe idu jọ ọvo ehrugbakpọ na o kri te no.

Uzẹme ẹme na: Ebaibol na ọ fodẹ oke nọ a rọ ma ehrugbakpọ na ha. Egba-eriariẹ e ta nọ erugbakpọ na o kri te ikpe ima-idu buobu no, yọ ẹme rai na avọ ọnọ ọ rrọ Emuhọ 1:1 na e wọso ohwohwo ho. c

Eriwo ọthọthọ: Emuhọ 1:1 u dhesẹ nọ Ọghẹnẹ yọ Esanerọvo, keme ubiẹme Hibru nọ a fa “Ọghẹnẹ” evaọ oria ikere yena a rẹ rehọ iẹe ta kpahe imava hayo bu vi ere dede.

Uzẹme ẹme na: Dede nọ ubiẹme Hibru na ’Elo·himʹ nọ a fa “Ọghẹnẹ” na a rẹ rehọ iẹe ta kpahe imava hayo bu vi ere, orọnikọ unu ahwo a be rehọ iẹe ta kpahe evaọ etenẹ na ha. Ukpoye a be rehọ iẹe ta kpahe oruaro gbe ọghọ ologbo. Yọ oyena o rọwokugbe ẹme nọ obe ofeme nọ a re se New Catholic Encyclopedia o ta inọ: ’Elo·himʹ nọ a fodẹ evaọ Emuhọ 1:1 na o be ta kpahe ‘oware nọ u wo oruaro gbe ọghọ ologbo orọnikọ unu ahwo ho.’—Ukere Avivẹ, Uko avọ 6, ẹwẹ-obe avọ 272.

Se obe Emuhọ uzou 1, re who je rri eme-obotọ nọ a ro ru eme jọ vẹ, gbe eria Ebaibol efa nọ a fodẹ evaọ etẹe.

a Ebaibol jọ nọ a re se HCSB Study Bible ọ ta kpahe ẹme nana nọ: “Ẹme Hibru nọ a fa bara’ na nọ otofa riẹ o rrọ ‘re a ma na,’ a rẹ rehọ iẹe ta kpahe oware nọ ohwo-akpọ o ru vievie he. Fikiere, oware nọ Ọghẹnẹ o ru ọvo a rẹ rehọ ẹme na bara’ rọ ta kpahe.”— Ẹwẹ-obe avọ 7.

b Jihova họ odẹ Ọghẹnẹ.—Olezi 83:18.

c Obe jọ nọ a re se The Expositor’s Bible Commentary o ta kpahe ẹme Hibru nọ a fa “evaọ emuhọ” na nọ: “Orọnikọ a be rọ ẹme na ta kpahe epanọ etoke na o theri te he.”—Onọ A Wariẹ Kere, Uko I, ẹwẹ-obe avọ 51.