“O ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware anwae na e vrẹ no.”—Eviavia 21:4, Efafa Akpọ Ọkpokpọ.

 “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:4, Ebaibol Ẹri Na.

 Ọghẹnẹ ọ ya eyaa nọ o ti si edada gbe uye-oruẹ no, yọ o ti si eware nọ e be wha ebẹbẹ nana ze no re.

 “O ti ririe irui-oviẹ kpobi no aro rai.” Jihova a ọ kake ya eyaa nana no vẹre evaọ obe Aizaya. Jihova ọ jọ etẹe ta nọ o ti “ririe irui-oviẹ no ovao kpobi.” (Aizaya 25:8; Eviavia 7:17) Eme nana i dhesẹ nọ Jihova ọ be daezọ ahwo kpobi nọ a bi weri hayo viẹ fiki uwhu ahwo rai, hayo fiki eware efa nọ e be lẹliẹ ae ruẹ uye.

 “Uwhu o gbẹ te jọ ofa ha.” A sae jẹ fa ẹme nana inọ “uwhu u ti notọ no” hayo “ahwo a ti gbe whu hu.” Ọghẹnẹ ọ ya eyaa nọ o ti si uwhu no, yọ o ti si uye-oruẹ nọ uwhu o be wha ze no re. Ofariẹ, a te kpare ahwo nọ a whu no zihe ziọ uzuazọ. (1 Ahwo Kọrint 15:21, 22) Fikiere Ọghẹnẹ o ti “si uwhu . . . no otọ.”—1 Ahwo Kọrint 15:26.

 “Uweri hayo oviẹ hayo edada e gbẹ te jọ ofa ha.” Orọnikọ eyaa Ọghẹnẹ nana i dhesẹ nọ oware ovo o gbẹ te da omai ha ha. Nọ oware jọ o tẹ gwọlọ nwa omai oma, ma rẹ riẹ. Oware nọ oria nana o be ta na họ, eware nọ e rẹ lẹliẹ omai wo ẹyao iroro, gbe ọkora, hayo edada evaọ ugboma mai fiki uzioraha b hayo sebaẹgba, e te gbẹ jọ họ.—Ahwo Rom 8:21, 22.

 “Eware anwae na e vrẹ no.” Ebaibol na ọ jọ abọ urere oria ikere nana dhesẹ epanọ eware i ti nwene te evaọ otọakpọ na. Obe jọ nọ a jọ kere kpahe oria Ebaibol nana o ta nọ: “Eware nọ ahwo-akpọ a riẹ vẹre họ uwhu, uweri, oviẹ gbe edada, yọ a sai ru oware ovo kpahe ae he. Rekọ eware nana e gbẹ te jariẹ hẹ keme ahwo-akpọ a ti yeri uzuazọ ọkpokpọ.” Ahwo-akpọ a te reawere uzuazọ bẹdẹ bẹdẹ evaọ otọakpọ na, yọ eware kpobi e te jọ wowoma wọhọ epanọ Ọghẹnẹ ọ gwọlọ no emuhọ ze.—Emuhọ 1:27, 28.

 Evaọ obọ emuhọ uzou avọ 21, Jọn ukọ na o dhesẹ eware nọ ọ ruẹ evaọ eruẹaruẹ inọ: “Mẹ tẹ ruẹ odhiwu ọkpokpọ avọ otọakpọ ọkpokpọ.” (Eviavia 21:1) O dhesẹ epanọ eware i ti ro nwene riẹriẹriẹ evaọ otọakpọ na, wọhọ epanọ a ruẹaro evaọ eria efa evaọ Ebaibol na. (Aizaya 65:17; 66:22; 2 Pita 3:13) Ọghẹnẹ ọ te rehọ “idhiwu ekpokpọ,” hayo egọmeti riẹ nọ o ro mu evaọ obọ odhiwu rọ raha egọmeti ahwo-akpọ no. Egọmeti Ọghẹnẹ o ve ti su “otọakpọ ọkpokpọ,” koyehọ ahwo nọ a te rria otọakpọ na.—Aizaya 65:21-23.

 Ẹvẹ ma rọ riẹ nọ eruẹaruẹ na i kiekpahe ahwo nọ a te rria otọakpọ na? Orọ ọsosuọ, oria ikere na o ta nọ: “Uwou Ọghẹnẹ o rrọ udevie ahwo-akpọ.” (Eviavia 21:3) Onana u dhesẹ nọ ahwo-akpọ Ọghẹnẹ ọ ya eyaa na kẹ orọnikọ ikọ-odhiwu hu. Orọ avọ ivẹ, a jọ eruẹaruẹ na ta kpahe akpọ nọ “uwhu o gbẹ te jọ ofa ha.” (Eviavia 21:4) Uwhu o rrọ obọ odhiwu hu, obọ otọakpọ obonẹ ahwo a be jọ whu. (Ahwo Rom 5:14) Fikiere oware nọ a be jọ oria ikere nana dhesẹ na họ, epanọ eware e te jọ evaọ otọakpọ na evaọ obaro.

 Rri ividio ọkpẹkpẹe nana re whọ ruẹ eware nọ e rrọ obe Eviavia.