ERIA EBAIBOL NỌ A RU VẸ

Jerimaya 29:11—‘Mẹ Riẹ Omaa nọ Me Wo Kpahe Owhai’

KPORO

“‘Mẹ riẹ iroro nọ me bi roro kpahe owhai,’ ere Jihova a ọ ta, ‘iroro udhedhẹ, orọnikọ okpẹtu hu, re me ru eware woma kẹ owhai evaọ obaro, wha ve je wo ẹruore.’”—Jerimaya 29:11, Efafa Akpọ Ọkpokpọ.

“Mẹ riẹ [omaa] nọ me wo kpahe kẹ owhai, ere ỌNOWO na ọ tae, [omaa] ewoma, orọnọ eyoma ha, re mẹ kẹ owhai ẹruore obaro.”—Jerimaya 29:11, Ebaibol Ẹri Na.

Otofa Eme nọ E Rrọ Jerimaya 29:11

Jihova ọ ya eyaa kẹ idibo riẹ nọ a ti wo udhedhẹ evaọ obaro. Ginọ uzẹme nọ idibo riẹ oke anwae ọ ya eyaa nana kẹ, o make rrọ ere na, Jihova ọ gwọlọ nọ idibo riẹ nẹnẹ a re wo udhedhẹ re. Jihova yọ “Ọghẹnẹ nọ ọ rẹ kẹ ẹruore.” (Ahwo Rom 15:13) Yọ o ru re a kere eyaa nana fihọ Ebaibol na re ma sai “wo ẹruore” inọ eware i ti woma evaọ obaro.—Ahwo Rom 15:4.

Eme nọ E Wariẹ Jerimaya 29:11 Họ

Eme nọ e rrọ oria nana yọ eme nọ e jọ usu ileta nọ a vi se ahwo Izrẹl nọ a mu no Jerusalẹm kpohọ igbo evaọ Babilọn. b (Jerimaya 29:1) Ọghẹnẹ ọ ta kẹ ahwo Izrẹl na nọ a te jọ igbo na ikpe buobu, fikiere jọ a bọ iwou, kọ egbọ, je yẹ emọ. (Jerimaya 29:4-9) Rekọ Jihova ọ ta kẹ ae re nọ: “Nọ wha tẹ rria Babilọn ikpe udhosa-gbikpe gba no, mẹ te rẹriẹ ovao mẹ ku owhai, mẹ vẹ te rehọ owhai zihe ziọ [Jerusalẹm], jẹ rọ ere ru eyaa mẹ gba.” (Jerimaya 29:10) Jihova ọ be rọ ere ta kẹ ae nọ a te thọrọ iẹe ẹro vievie he, yọ o ti gine ru eyaa nọ ọ ya kẹ ae na gba, inọ a ti zihe ziọ ẹkwotọ rai na.—Jerimaya 31:16, 17.

Ọghẹnẹ o gine ru eyaa nọ ọ ya kẹ ahwo Izrẹl na gba. Nọ oke u te, Ovie Pasia nọ a re se Sairọs o te gine fi Babilọn kparobọ. (Aizaya 45:1, 2; Jerimaya 51:30-32) Kẹsena Sairọs ọ tẹ kẹ ahwo Ju na uvẹ re a zihe kpohọ ẹwho rai. Ere a ro zihe kpohọ Jerusalẹm nọ a rria igbo te ikpe udhosa-gbikpe no.—2 Iruẹru-Ivie 36:20-23; Ẹzra 3:1.

Eyaa Ọghẹnẹ nọ e rrọ Jerimaya 29:11 nọ i rugba na, i re ru nọ udu o rẹ rọ jọ idibo Jihova awọ inọ eyaa nọ ọ ya kpahe obaro na kpobi i ti gine rugba. Oware jọ nọ Ọghẹnẹ o ti ru evaọ obaro họ, evaọ okenọ Jesu Kristi nọ ọ rrọ Ovie Uvie Ọghẹnẹ na o te muhọ esuo no, o ti ru nọ udhedhẹ o te rọ jọ akpọ na soso.—Olezi 37:10, 11, 29; Aizaya 55:11; Matiu 6:10.

Eriwo Ọthọthọ Kpahe Jerimaya 29:11

Eriwo ọthọthọ: Ọghẹnẹ ọ ma ‘omaa’ jọ fihotọ kẹ omomọvo no.

Uzẹme ẹme na: Ọghẹnẹ ọ rẹ kẹ ohwo kpobi uvẹ nọ o re ro ru oware nọ u je rie evaọ uzuazọ. Ahwo Izrẹl nọ e jọ igbo evaọ Babilọn na kpobi ae Ọghẹnẹ ọ jọ obe Jerimaya 29:11 na ta nọ o wo omaa jọ kẹ, orọnikọ omomọvo rai hi. O je roro epanọ o ti ro ru oware jọ kẹ ahwo na kpobi, koyehọ epanọ a re ro wo udhedhẹ evaọ obaro. (Jerimaya 29:4) Rekọ Ọghẹnẹ ọ kẹ omomọvo rai uvẹ nọ ọ rẹ rọ salọ sọ o re ru oware nọ u fo re ọ sai wo udhedhẹ yena. (Iziewariẹ 30:19, 20; Jerimaya 29:32) Yọ ahwo nọ a jẹ ginẹ kiẹ gwọlọ Jihova a jẹ lẹ sei no udu ze.—Jerimaya 29:12, 13.

Eriwo ọthọthọ: Ọghẹnẹ o ti ru idibo riẹ fe.

Uzẹme ẹme na: Otofa ẹme Hibru nọ a fa “ewoma” evaọ obe Jerimaya 29:11 evaọ Ebaibol Ẹri Na họ “udhedhẹ gbe omakpokpọ.” Eme nọ e wariẹ oria Ebaibol na họ i dhesẹ nọ oware nọ Ọghẹnẹ ọ ya eyaa riẹ kẹ ahwo Izrẹl nana họ udhedhẹ gbe omakpokpọ orọnikọ efe he. Onana u dhesẹ nọ orẹwho Izrẹl na o te gbẹ jariẹ, yọ a ti zihe kpohọ Jerusalẹm ẹdẹ jọ.—Jerimaya 29:4-10.

Se obe Jerimaya uzou 29, re who je rri eme-obotọ nọ a ro ru eme jọ vẹ, gbe eria Ebaibol efa nọ a fodẹ evaọ etẹe.

a Jihova họ odẹ Ọghẹnẹ.—Olezi 83:18.

b Obe jọ nọ a re se The Expositor’s Bible Commentary o ta kpahe Jerimaya 29:11 na nọ: “Whọ rẹ kake jọ oria ofa evaọ Ebaibol na ruẹ emamọ eyaa nọ e wọhọ eyaa nana nọ Yahweh [Jihova] ọ ya kẹ ahwo Ju nọ a mu kpohọ igbo na ha, keme eyaa na i dhesẹ epanọ Jihova o wo ọdawẹ kẹ ai te, oyejabọ nọ ọ rọ ta eme nọ i ru rai riẹ nọ eware i ti gine woma kẹ ae evaọ obaro.”—Uko avọ 7, ẹwẹ-obe avọ 360.