“Kọ mẹ gbẹ re ta kẹ owhẹ? Wo udu je kru oma ga. Jọ ozọ u mu owhẹ hẹ hayo who guegue he, keme Jihova Ọghẹnẹ ra ọ rrọ kugbe owhẹ evaọ oria kpobi nọ whọ be nya.”—Joshua 1:9, Efafa Akpọ Ọkpokpọ.

 “Kọ ogbẹrọnọ mẹ kẹ owhẹ ujaje? Who wo udu avọ oma ukruga; whọ jọ ozọ u mu owhẹ hẹ, hayo oma o rọ owhẹ hẹ; keme ỌNOWO na Ọghẹnẹ ra ọ rọ kugbe owhẹ evaọ koria koria kpobi no whọ rẹ nya.”—Joshua 1:9, Ebaibol Ẹri Na.

 Jihova a ọ ta eme nana kẹ Joshua re o fiobọhọ kẹe riẹ nọ, ghelọ ebẹbẹ nọ ọ rẹriẹ ovao dhe kẹhẹ, ọ sai “wo udu je kru oma ga.” U fo nọ ozọ u re mu Joshua ha nọ o te bi yoẹme kẹ Jihova, keme ọ te jọ kugbei je fiobọhọ kẹe kparobọ. Ọghẹnẹ ọ jọ kugbe Joshua keme ọ jẹ vuẹe oware nọ o re ru, yọ o je fiobọhọ kẹe fi ewegrẹ riẹ kparobọ.

 Eme Joshua o re ru re ọ sai “wo udu je kru oma ga”? O gwọlọ nọ o re wuhrẹ Ikereakere efuafo na re ọ sai wo udu gbe ogaga. Onana u dhesẹ nọ o re wuhrẹ “oware kpobi nọ o rrọ Uzi nọ Mosis odibo [Jihova] o jie kẹ [Joshua] na.” b (Joshua 1:7) Jihova ọ ta kẹ Joshua nọ ọ “rẹ rọ unu kpotọ sei [“who re sei,” Ebaibol Ẹri Na] te aso te uvo.” (Joshua 1:8) Nọ Joshua ọ tẹ be rọ unu kpotọ se Ẹme Ọghẹnẹ hayo roro didi kpahe iẹe, u re fiobọhọ kẹe ru oreva Ọghẹnẹ ẹsikpobi. O tẹ jẹ gwọlọ nọ Joshua ọ rẹ “romatotọ koko eware kpobi nọ a kere fihọ” Ẹme Ọghẹnẹ. O te ru ere, o ti ru eware avọ areghẹ, yọ eware e te riẹ nya kẹe. Yọ ere o ginẹ via kẹ Joshua. O yeri emamọ uzuazọ dede nọ ọ rẹriẹ ovao dhe ebẹbẹ buobu, yọ ọ gọ Jihova evaọ edẹ uzuazọ riẹ kpobi.​—Joshua 23:14; 24:15.

 Eme nana nọ Jihova ọ ta kẹ Joshua na, e gbẹ be tuduhọ omai awọ nẹnẹ. Eme nana i dhesẹ epanọ Jihova ọ be daezọ idibo riẹ kpobi te, makọ evaọ oke nọ a tẹ rẹriẹ ovao dhe ebẹbẹ. Ọ gwọlọ nọ eware e rẹ riẹ nya kẹ ae wọhọ epanọ o jọ kẹ Joshua. Yọ re a sai “wo udu je kru oma ga” wọhọ Joshua, o gwọlọ nọ a re se Ẹme Ọghẹnẹ, roro didi kpahe iẹe, je ru oware kpobi nọ a se.

 Nọ Mosis o whu no, Jihova ọ tẹ salọ Joshua re o su ahwo Izrẹl. (Joshua 1:1, 2) Evaọ oke yena, ahwo Izrẹl a je ru epanọ a te rọ ruọ Ẹkwotọ Eyaa na, koyehọ ẹkwotọ Kenan. Rekọ taure a tẹ te ruọ ẹkwotọ na, o te gwọlọ nọ a rẹ họre je fi ewegrẹ rai kparobọ. Wọhọ oriruo, o gwọlọ nọ Joshua ọ rẹ họre ahwo orẹwho Kenan nọ a jọ muemu gaga na. c (Iziewariẹ 9:5; 20:17, 18) Ahwo Kenan na a bu vi ahwo Izrẹl, yọ ekwakwa ẹmo rai e ga vi erọ ahwo Izrẹl re. (Joshua 9:1, 2; 17:18) Ghele na, Joshua o ru oware kpobi nọ Ọghẹnẹ ọ ta kẹe ududu. Yọ Ọghẹnẹ ọ ginẹ jọ kugbei, keme ahwo Izrẹl a fi enwenọ ewegrẹ rai kpobi kparobọ evaọ ikpe ezeza ọvo.​—Joshua 21:43, 44.