“Oke nọ a fihọ na u te no, yọ Uvie Ọghẹnẹ o kẹle no. Wha kurẹriẹ, je fi ẹrọwọ họ usi uwoma na.”—Mak 1:15, Efafa Akpọ Ọkpokpọ.

 “Oke u te [no], uvie Ọghẹnẹ o kẹle ino: Wha kuevarẹriẹ, wha rọwo usiuwoma na.”—Mak 1:15, Ebaibol Ẹri Na.

 Jesu ọ jọ oria ikere yena ta nọ Uvie Ọghẹnẹ a “o kẹle no,” keme ọyomariẹ nọ ọ te jọ Ovie Uvie yena ọ jọ kugbe ahwo na evaọ oke yena.

 Nọ Jesu ọ ta nọ Uvie Ọghẹnẹ o kẹle no na, orọnikọ u dhesẹ nọ Uvie na u muhọ esuo no evaọ oke yena ha. Ẹme ọfa jọ nọ Jesu ọ ta kẹ ilele riẹ u dhesẹ nọ okenọ Uvie na u ti ro muhọ esuo o gbẹ jọ obaro. (Iruẹru Ikọ 1:6, 7) Rekọ otọ ẹme riẹ na họ, ọyomariẹ nọ ọ te jọ Ovie b Uvie yena ọ ginẹ romavia no evaọ uzedhe ukpe nọ Ebaibol ọ ruẹaro nọ ọ te rọ romavia. Oyejabọ nọ Jesu ọ rọ ta nọ: “Oke nọ a fihọ na u te no,” koyehọ okenọ ọyomariẹ o ti ro mu usi uwoma Uvie na họ ẹta.—Luk 4:16-21, 43.

 Re ahwo a sai wo erere no usi uwoma Uvie na ze, o gwọlọ nọ a re kurẹriẹ, koyehọ a rẹ siọ ikpehre eware nọ a je ru ba a ve koko izi Ọghẹnẹ evaọ uzuazọ rai. Yọ ahwo nọ a gine kurẹriẹ a rọ ere dhesẹ nọ a wo ẹrọwọ inọ Uvie na u ti ru eware nọ Ọghẹnẹ ọ ya eyaa rai na.

 Jesu ọ ta eme yena evaọ okenọ o je mu iruo odibọgba riẹ họ evaọ Galili. Ma rẹ jọ obe Matiu 4:17 ruẹ ọkpọ eme yena. Oria ikere yena o ta nọ “no umuo oke yena vrẹ,” Jesu o te mu usi uwoma Uvie Ọghẹnẹ họ ewhowho. Uvie Ọghẹnẹ họ uzedhe uzoẹme nọ Jesu Kristi ọ jẹ rọ ta usi uwoma. Evaọ ebe Usi Uwoma ene c na, unuẹse nọ a fodẹ Uvie na u bu vi asia udhusoi (100), yọ eme nọ Jesu ọ ta a jọ mae fodẹ iẹe. Uvie Ọghẹnẹ họ oware nọ Jesu ọ mae ta ẹme kpahe.