“Mẹ tẹ make be nya evaọ ukiekpotọ ebi ọlala dede, mẹ rẹ dhozọ enwoma evo ho, keme whọ rrọ kugbe omẹ; ọkpọ ra avọ umure ra e be kẹ omẹ uduotahawọ.”​—Olezi 23:4, Efafa Akpọ Ọkpokpọ.

 “E, mẹ tẹ make be nya eva ukpotọ uwoho uwhu, mẹ rẹ dhẹozọ oware uyoma ovo ho; keme who lele omẹ rọ; ọkpọ gbe umure ra, e rẹ sasa omẹ oma.”—Olezi 23:4, Ebaibol Ẹri Na.

 Ọghẹnẹ ọ rẹ thọ idibo riẹ jẹ rẹrote ai o tẹ make rọnọ a bi thihakọ uyero obẹbẹ. Evaọ oria Ebaibol nana, a rehọ oriruo othuru-igodẹ nọ ọ be rẹrote igodẹ riẹ ro dhesẹ epanọ Jihova ọ rẹ rẹrote ahwo nọ a be gọe. b Nọ a tẹ be rẹriẹ ovao dhe uyero obẹbẹ nọ o wọhọ ebi ọlala hayo ukpotọ uwoho uwhu nọ a dhesẹ evaọ oria ikere na, a rẹ jọ goli hi. Ozọ u re mu ai hi, keme o rẹ jọ e rai oma wọhọ ẹsenọ Ọghẹnẹ ọ rrọ etẹe kugbe ai.

 Evaọ oke nọ a ro kere Ebaibol na, othuru-igodẹ ọ rẹ rọ ọkpọ hayo umure riẹ rọ thọ igodẹ riẹ no obọ erao ijihẹ. Ọ rẹ jẹ rehọ ọkpọ riẹ ro su hayo si igodẹ riẹ no oria enwoma, keme ọkpọ na ọ rẹ jọ thethei jẹ gẹle evaọ eria jọ. Epọvo na, Jihova Ọghẹnẹ ọ wọhọ othuru-igodẹ oyoyou nọ ọ rẹ thọ jẹ sẹro ahwo nọ a be gọe. Makọ oke nọ a tẹ rẹriẹ ovao dhe ebẹbẹ, Jihova ọ rẹ rẹrote ai evaọ idhere sa-sa.

•   Ọ rẹ rọ Ẹme riẹ Ebaibol na rọ kẹ ae ehrẹ jẹ sasa ae oma.​—Ahwo Rom 15:4.

•   Ọ rẹ gaviezọ kẹ elẹ rai, je ru nọ a re ro wo udhedhẹ iroro.​—Ahwo Filipai 4:6, 7.

•   Ọ rẹ rehọ idibo riẹ efa rọ tuduhọ ae awọ.​—Ahwo Hibru 10:24, 25.

•   Ọ ya eyaa kẹ ae evaọ Ebaibol na inọ akpọ na o ti woma evaọ obaro, yọ o ti si ebẹbẹ gbe eware kpobi nọ e be kẹ ahwo uye notọ no.​—Olezi 37:29; Eviavia 21:3-5.

 Devidi họ ohwo nọ o kere Olezi avọ 23 na. Ọ jọ othuru-igodẹ evaọ oke uzoge riẹ, yọ uwhremu na o zihe ruọ ovie Izrẹl. (1 Samuẹle 17:34, 35; 2 Samuẹle 7:8) Evaọ obọ emuhọ olezi nana, a dhesẹ Jihova wọhọ othuru-igodẹ nọ o bi su, ko, jẹ sasa idibo riẹ oma, wọhọ epanọ othuru-igodẹ o re ru igodẹ riẹ na.​—Olezi 23:1-3.

 Nọ Devidi o je dhesẹ epanọ Jihova ọ rẹ rọ thọ idibo riẹ evaọ Olezi 23:4, ẹme nọ o ro dhesẹ Jihova họ, “whọ” rọ kugbe omẹ. Rekọ ẹme nana o wo ohẹriẹ no eme wọhọ “ọ” hayo “o” nọ o je ro dhesẹ Jihova no obehru ze. Devidi ọ rọ ẹme nana dhesẹ epanọ usu riẹ avọ Jihova o kpekpe te. Devidi ọ riẹ nọ Ọghẹnẹ ọ be daezọ riẹ, yọ ọ riẹ oghẹrẹ edawọ nọ i bi tei. Fikiere, ozọ u je mu Devidi hi.

 Evaọ Olezi 23, owọ avọ 5 gbe owọ avọ 6, a gbẹ ta kpahe oriruo othuru-igodẹ avọ igodẹ riẹ na ha, rekọ oriruo ohwo nọ ọ be ghọ ọrara riẹ. Wọhọ epanọ ohwo ọ rẹ ghọ ọrara nọ ọ rrọ ghaghae kẹe ziezi na, ere Jihova o ru kẹ Devidi. Ọghẹnẹ ọ rẹrote Devidi, yọ ewegrẹ riẹ a sae whaha iẹe he. Kẹsena evaọ obọ ekuhọ Olezi na, Devidi o dhesẹ nọ o fievahọ Jihova inọ o ti dhesẹ ewoma gbe uyoyou riẹ nọ o rẹ yẹ hẹ kẹe evaọ edẹ uzuazọ riẹ kpobi.

 Eme ọtadhesẹ nọ e rrọ obe Olezi 23 na, i dhesẹ oghẹrẹ nọ Jihova ọ be hai ro dhesẹ uyoyou kẹ ahwo nọ a be gọe jẹ rẹrote ai.​—1 Pita 2:25.