Ọmọtẹ na o dhere omoria jọ evaọ akotọ ethẹ ologbo jọ nọ a re se Naele. Ọ tẹrovi oware jọ nọ o rrọ udevie ikpoko nọ e rrọ akọ ethẹ na. Ozọ o dina riẹe ẹro. Ọ be sai nuhu oma ha dede nọ ame ethẹ na o bi kporo vrẹ ọvo. Oke o be nya, yọ ọ gbẹ rrọ etẹe. Ọ tẹrovi oware nọ o bi rri na ọvo. Ọ be hẹrẹ re ọ ruẹ oware nọ o be te via. Ọ be tubẹ daezọ emera nọ e be tafru rie evaọ etẹe dede he. Ekete nọ a nabi zuo ziezi nọ ame ọ sai fi ruọ eva ha ọ rrọ oria nọ ọmọtẹ na ọ tẹrovi na. Yọ oniọvo riẹ ọrọ ọmọzae nọ a yẹ obọ ọ rrọ eva ekete na. O be kẹe uye gaga inọ ọmọboba yena ọvo ọ rrọ etẹe. Rekọ ọ riẹ nọ, oware nọ a sai ro siwi uzuazọ riẹ kpobi oye ọsẹgboni riẹ a ru na.

Oware nọ ọmọtẹ nana o bi ru na u dhesẹ nọ o wo udu. Rekọ o jọ ere kuhọ họ. Eware efa e riẹ nọ o bi ti ru nọ u gine dhesẹ nọ ọ gudu. Dede nọ ọ gbẹ maha, obọdẹ uruemu jọ oye o muhọ ewo no na. Oye họ ẹrọwọ. Oware jọ o be te via obọnana nọ u ti dhesẹ nọ o gine wo ẹrọwọ. Yọ ẹrọwọ nana o ti fiobọhọ kẹe evaọ edẹ uzuazọ riẹ kpobi. Oke nọ eware i ti nwene kẹ ahwo riẹ evaọ obaro nọ ọ tẹ kpako no, ẹrọwọ nana o ti fiobọhọ kẹe riẹ oware nọ o re ru. Yọ o ti je fiobọhọ kẹe kurẹriẹ nọ oware jọ o te thọe obọ. Ọmọtẹ vẹ ma be ta ẹme kpahe na? Kọ eme ma rẹ sai wuhrẹ no ẹrọwọ riẹ ze?

A jọ etenẹ iku na fodẹ odẹ ọmọtẹ nana ha. Rekọ ma riẹ ohwo nọ ọ rrọ dẹẹ. Odẹ riẹ Miriam, ọmọ ọkpako Amram avọ Jokebẹd. Ọzae-avọ-aye nana yọ ahwo Izrẹl nọ a jọ igbo evaọ obọ Ijipti. (Ikelakele 26:59) Oniọvo Miriam ọmaha nọ o je rri na, a se rie Mosis uwhremu na. Miriam o wo oniọvo-ọmọzae ọfa nọ a yẹ Mosis tu, nọ ọ jọ oware wọhọ ikpe esa evaọ oke nọ oware nana o rọ via. Odẹ riẹ Erọn. Ma nwane riẹ unu ikpe nọ Miriam ọ jọ evaọ oke yena ha, rekọ u muẹro nọ o ri te ikpe ikpe he.

Nọ Miriam ọ be whẹro ze na, yọ ahwo Izrẹl a be reoja gaga. O jọ ahwo Ijipti oma inọ ahwo Izrẹl a bi ti mi ai otọ no. Fikiere, a tẹ rehọ ae ru erigbo, bi gboja kẹ ae. Nọ ahwo Ijipti a ruẹ nọ ahwo Izrẹl a bi dhe ebuebu je bi wo ogaga ghele, a tẹ tubẹ jiroro nọ a re ru oware ofa nọ u yoma vi oyena. Fẹro nọ o je su Ijipti o juzi nọ ahwo Izrẹl a te yẹ ọmọzae, jọ a kpei no. U wo eyae Ijipti ivẹ jọ nọ a re se Shifra avọ Pua nọ a rọwo lele uzi nọ Fẹro o jie na ha. Yọ ma riẹ nọ Miriam o yo kpahe ẹrọwọ eyae ivẹ nana.—Ọnyano 1:8-22.

Miriam ọ ruẹ nọ ọsẹgboni riẹ a wo ẹrọwọ gaga re. Nọ Amram avọ Jokebẹd a yẹ ọmọ avọ esa rai, a ruẹ nọ ọmọzae na o wo erru wo umuo ho. Fikinọ a gwọlọ nọ a kpe ọmọ na no ho, a si rie no emerae esa soso. A rọwo wọe lahwe he. (Ahwo Hibru 11:23) Rekọ re a si ọmọboba no, o lọhọ vievie he. A tẹ jiroro nọ a re ru oware jọ nọ o rrọ bẹbẹ gaga. O gwọlọ nọ Jokebẹd o re si ọmọ na no họ oria jọ nọ ohwo nọ ọ rẹ sai siwi ọmọ na jẹ yọrọ iẹe rehọ ọ rẹ jọ nyaku ei. Dae rehọ iẹe nọ whọ be ruẹ oni ọmọ na nọ ọ be lẹ ọvo re Jihova o siwi ọmọ na. Ọ rehọ ikpoko ze, ọ tẹ rehọ ai zuo ekete. Kẹsena ọ tẹ rehọ bitumẹn avọ ikota ralọ obemu ekete na re ame o gbe fi ruọ ẹe he. Ọ tẹ wọ ọmọ oyoyou riẹ na fihọ eva ekete na. Ọ tẹ wọ ekete na kpohọ akotọ Ethẹ Naele. U muẹro nọ oke yena ọ rọ ta kẹ Miriam nọ o dhere amakotọ jọ re o rri oware nọ ọ te via kẹ ọmọ na.—Ọnyano 2:1-4.

Ere Miriam o ro muhọ ẹhẹrẹ. Nọ ọ hẹrẹ te oria jọ no, ọ tẹ ruẹ nọ ahwo jọ a be nyaze. Ivovo-eyae Ijipti jọ ae a be nyaze na. Enana yọ ahwo gheghe he, yọ ahwo nọ a riẹ odẹ. Ọmọtẹ Fẹro avọ idibo emetẹ riẹ ae a be nyaze te họ evaọ ethẹ Naele na. Ẹsejọhọ udu u no Miriam awọ. Kọ ọmọtẹ Fẹro ọ te ginẹ wọso uzi nọ ọsẹ riẹ o jie, o ve siwi ọmọ Izrẹl nana? O sae jọnọ Miriam ọ jẹ jọ udu riẹ lẹ gaga.

Ọmọtẹ Fẹro ọye ọ kaki gbẹro ku ekete nọ ọ rrọ udevie ikpoko na. O te vi odibo-ọmọtẹ riẹ jọ nyae wọ ekete na sei. Ebaibol ọ ta kpahe ọmọtẹ ovie na, inọ: “Nọ o rovie iei, ọ tẹ ruẹ ọmọ na, yọ ọmọzae na ọ jẹ viẹ.” Ọ tẹ nwane riẹ nọ aye Izrẹl jọ ọye ọ be gwọlọ edhere nọ o re ro siwi ọmọ riẹ na. Ohrọ ọmọ owowoma nana ọ tẹ re ọmọtẹ Fẹro. (Ọnyano 2:5, 6) Oke yena yọ Miriam o bi rri rie kiọkiọkiọ. Ọ tẹ ruẹ nọ ohrọ ọmọ na o re uvovo-aye nana. Miriam ọ tẹ nwane riẹ nọ oke nọ o re ro ru oware jọ kpata kpata ona. Ọ ruẹ nọ o re ru oware nọ u dhesẹ nọ o fi ẹrọwọ họ Jihova. Ere ọmọtẹ nana ọ rọ gbaudu nya lahwe, be dhẹ bru ivovo-eyae nana nọ i no ighẹ ovie ze na.

Kọ eme ọ tubẹ jọ ọmọtẹ Izrẹl nana nọ ọ rrọ ọrigbo na udu, nọ o bi yiwi nyabru ahwo otiọnana nọ a riẹ odẹ na? Ma riẹ hẹ. Rekọ oware nọ ma riẹ họ, nọ o te etẹe ọ tẹ nọ ọmọtẹ Fẹro na onọ jọ, inọ: “Kọ mẹ nyai se aye Hibru jọ ze re ọ yọrọ ọmọ na kẹ owhẹ?” Ọmọtẹ na o wo areghẹ kẹhẹ nọ ọ rọ nọ oghẹrẹ onọ utiona. Whaọ ọmọtẹ Fẹro ọ riẹ nọ ọyomariẹ ọ sae yọrọ ọmọboba otiọna ha. Ẹsejọhọ o jọ ọmọtẹ Fẹro na oma inọ, nọ ọmọ na ọ rrọ ohwo Izrẹl na, o te mai woma re aye Izrẹl jọ ọ yọrọ ọmọ na kẹe. Nọ ọ tẹ rro ze no, o ve mi ei re ọ rẹrotei je wuhrẹ iẹe isukulu. A re gbiku oghẹrẹ nọ eva e were Miriam te he nọ ọmọtẹ Fẹro ọ ta kẹe nọ: “Nya!”—Ọnyano 2:7, 8.

Ere Miriam ọ rọ dhẹ ogbohrẹ bru ọsẹgboni riẹ nọ a rrọ awawa evaọ obọ uwou. Dae rehọ iẹe nọ whọ be ruẹ Miriam nọ eva e be were gaga, nọ o bi gbiku na kẹ oni riẹ na. Ababọ avro, Jokebẹd ọ ruẹ nọ Jihova họ ọnọ o ru eware na kpobi lọhọ na. Ere avọ Miriam a ro bruoma zihe bru ọmọtẹ Fẹro. Ẹsejọhọ Jokebẹd ọ jẹ gba oma riẹ re o gbe dhesẹ evawere riẹ via ha nọ ọmọtẹ Fẹro ọ ta kẹe nọ: “Rehọ ọmọ nana vrẹ re whọ yọrọ iẹe kẹ omẹ, mẹ te hwosa kẹ owhẹ.”—Ọnyano 2:9.

Miriam o wuhrẹ eware buobu kpahe Jihova, Ọghẹnẹ riẹ evaọ ẹdẹ yena. Ọ riẹ nọ Jihova o re fiobọhọ kẹ idibo riẹ jẹ gaviezọ kẹ elẹ rai. Ọ tẹ jẹ ruẹ nọ, orọnikọ ekpako soso hayo ezae ọvo e rẹ sai wo udu gbe ẹrọwọ họ. Ohwo kpobi, makọ emaha dede a rẹ sai wo emamọ iruemu nana. Yọ Jihova ọ rẹ gaviezọ kẹ elẹ idibo riẹ kpobi. (Olezi 65:2) U fo nọ mai kpobi, te emaha te ekpako, te ezae te eyae, ma rẹ kareghẹhọ onana evaọ oke obẹbẹ nana nọ ma be rria na.

Jokebẹd ọ wọ ọmọ na kpo, ọ tẹ yọrọ iẹe. Ma riẹ nọ Miriam ọ jẹ hai no abotọ ọmọ na ha keme ọ rrọ usu ahwo nọ a siwi uzuazọ riẹ. Ẹsejọhọ Miriam ọ jẹ hai wuhrẹ iẹe epanọ a rẹ ta ẹme, yọ eva e were riẹ gaga evaọ ẹdẹ ọsosuọ nọ ọmọ na o ro se odẹ Jihova, Ọghẹnẹ riẹ. Nọ ọmọ na ọ rro no, a tẹ rehọ iẹe se ọmọtẹ Fẹro. (Ọnyano 2:10) Ma riẹ nọ ẹdẹ nọ a rọ wọe se ọmọtẹ Fẹro, o da ohwo kpobi gaga evaọ uwou na. Ọmọtẹ Fẹro o te mu odẹ kẹ ọmọ na, o se rie Mosis. Ẹsejọhọ Miriam o je roro sọ Mosis ọ te jọ emamọ ohwo nọ ọ be kpako ze na. O sae jọnọ ọ jẹ jọ udu riẹ nọ nọ, ‘Kọ Mosis ọ te gọ Jihova nọ ọ be te whẹro evaọ ighẹ ovie Ijipti na?’

Nọ oke o be nyaharo na Mosis ọ tẹ jọ ohwo nọ o you Jihova. Ma riẹ nọ eva e were Miriam gaga inọ oniọvo riẹ ọmaha ọ be gọ Jihova ukpenọ o re kie lele eware iwoma nọ i bi no uwou Fẹro ze. Nọ Mosis ọ jọ ikpe udhuvẹ, ọ rọ okpakpa ru oware jọ nọ ọ jẹ rọ gwọlọ fiobọhọ kẹ ahwo riẹ. O kpe ohwo Ijipti jọ nọ o je gboja kẹ ohwo Izrẹl. Kẹsena nọ Fẹro ọ jẹ gwọlọ Mosis re o kpei no, ọ tẹ dhẹ no Ijipti.—Ọnyano 2:11-15; Iruẹru Ikọ 7:23-29; Ahwo Hibru 11:24-26.

Mosis ọ dhẹ kpobọ Midian nọ ọ rrọ ugbo obojọ thethabọ. Obei o je jo su igodẹ. Ẹsejọhọ oware wọhọ ikpe udhuvẹ soso, Miriam o gbe yo mi oniọvo riẹ hẹ. (Ọnyano 3:1; Iruẹru Ikọ 7:29, 30) Ahwo Ijipti a gbẹ jẹ lahiẹ ahwo Izrẹl tube vi epaọ ọsosuọ. Yọ enana kpobi Miriam o je thihakọ rai nọ ọ be kpako na.

Nọ ikpe buobu e vrẹ no, Mosis o te ti zihe ziọ Ijipti. Ọghẹnẹ o vi rie ze ti si ahwo riẹ no igbo. U muẹro nọ oke yena yọ Miriam ọ kpako vrẹ ikpe udhone no. Erọn ọ jọ ọtota Mosis. Ere Mosis avọ Erọn, inievo ivẹ Miriam a rọ nyabru Fẹro re a ta kẹe nọ o siobọno ahwo Ọghẹnẹ kpo. U muẹro nọ Miriam ọ jẹ tuduhọ inievo riẹ awọ nọ a bi dhe Fẹro ẹnyẹnya bru na. Rekọ Fẹro ọ kẹ rai uzou sokpọ ghele he. Uwhremu na Jihova ọ tẹ rọ iye ikpe te ẹkwotọ Ijipti. Nọ uye avọ ikpe na o ze, emezae ekpako ahwo Ijipti kpobi i te whu. Kẹsena Fẹro o te siobọno ahwo Izrẹl. Ahwo Izrẹl kpobi nọ e rrọ Ijipti a tẹ wọ onya. Dae rehọ iẹe nọ whọ be ruẹ Miriam nọ o bi fiobọhọ kẹ ahwo riẹ avọ ajọwha, nọ Mosis o bi su ai no Ijipti na.—Ọnyano 4:14-16, 27-31; 7:1–12:51.

Uwhremu na, egbaẹmo Ijipti a te le ahwo Izrẹl te akotọ Abade Ọwawae na. O tẹ wọhọ nọ u wo edhere ọvo nọ a sae rọ dhẹ vabọ họ. Miriam ọ tẹ ruẹ Mosis oniọvo riẹ nọ o dikihẹ akotọ abade na, kẹsena ọ tẹ rriẹ ọkpọ riẹ rri ame na. Oware igbunu jọ o tẹ via, abade na ọ tẹ ghale abava! Mosis o te su ahwo Izrẹl nya otọ oyaya vrẹ ruọ abọ obei. Ababọ avro, ẹrọwọ nọ Miriam o fihọ Jihova ọ wariẹ ga ziezi. Ọ ruẹ nọ Ọghẹnẹ nọ ọ be gọ na, oware ovo o rẹ bẹe eruo ho, yọ o re ru eyaa riẹ kpobi gba.—Ọnyano 14:1-31.

Nọ ahwo Izrẹl kpobi a fa ruọ abọ obei abade na gbẹsinẹdẹ no, ame abade na o te zurie ruru Fẹro avọ egbaẹmo riẹ kpobi. Miriam ọ ruẹ vevẹ inọ Jihova ọ ga vi ogbaẹmo nọ o mai wo ẹgba kpobi evaọ akpọ na soso. Oware nọ o via na u duobọte ahwo te epanọ a rọ kpare ole re a ro jiri Jihova. Miriam omariẹ avọ eyae na nọ e rọ kpahe iẹe a te ku unu gbe ezae na be so inọ: “So ile kẹ Jihova, keme ọ kpare omariẹ kpehru gaga no. O gbolo anyenya na avọ ọnọ ọ be dhẹe fihọ abade na no.”—Ọnyano 15:20, 21; Olezi 136:15.

Anwẹnọ a ro yẹ Miriam na, ọ re ruẹ oware utiona ẹdẹvo ho. Oware nọ o via na o rẹ thọrọ iẹe ẹro vievie he. Oke nana a rọ jọ Ebaibol se Miriam ọruẹaro-aye. Miriam họ aye ọsosuọ nọ a jọ Ebaibol na se ọruẹaro-aye. Yọ eyae nọ e rrọ idibo Jihova nọ a jọ Ebaibol na se eruẹaro-eyae i bu hu.—Ibruoziẹ 4:4; 2 Ivie 22:14; Aizaya 8:3; Luk 2:36.

Iku Ebaibol nana i ru omai riẹ nọ Jihova ọ be ruẹ oware kpobi nọ ma bi ru. Yọ ma tẹ be romakpotọ ru iruo kẹe, thihakọ, je jiri ei, o re bru ọghọ họ omai oma. Jọ mai kpobi, te emaha te ekpako, te ezae te eyae, ma ru eware nọ i re dhesẹ nọ ma fi ẹrọwọ họ Jihova. Ẹrọwọ otiọye na o re ru eva were iẹe. O rẹ thọrọ iẹe ẹro vievie he, yọ ọ rẹ ghale omai fiki ẹrọwọ mai. (Ahwo Hibru 6:10; 11:6) Kọ whọ gbẹ ruẹ nọ u fo re ma rọ aro kele ẹrọwọ Miriam?

Nọ a tẹ riẹ ohwo odẹ hayo nọ o te wo ọkwa, o rẹ sae wha eghale ze. Rekọ ohwo ọ gbẹ yọroma ha, o rẹ sae lẹliẹe mu uke họ efu. Evaọ oke nọ ahwo Izrẹl a ro no igbo na, u muẹro nọ Miriam họ aye nọ a mae riẹ odẹ evaọ usu rai. Kọ onana u ti ru ei fu uke hayo du omorro? (Itẹ 16:18) U yoma kẹhẹ inọ Miriam ọ jẹ wọ oma kpehru nọ u te oke jọ no!

Nọ ahwo Izrẹl a no Ijipti no, nọ emerae jọ e jẹ vrẹ no, ahwo jọ a tẹ kpahe Mosis. Ae họ, Jẹtro ọgọ Mosis, gbe Zipora aye Mosis avọ emezae ivẹ rai. Oke nọ Mosis ọ rọ dhẹ kpobọ Midian nyae rria ikpe udhuvẹ na ẹsiẹe ọ rọ rehọ Zipora. Zipora o zihe bru ahwo riẹ evaọ obọ Midian vẹre, o wọhọ nọ ọ nyae ruẹ e rai ọvo. Rekọ obọnana, ọsẹ riẹ ọ rehọ e riẹ avọ emezae riẹ bru Mosis evaọ oria nọ ahwo Izrẹl a fa ivuẹ fihọ. (Ọnyano 18:1-5) Dae rehọ iẹe nọ whọ be ruẹ oria kpobi nọ u duwuku nọ ahwo a bi yere aye Mosis avọ emọ riẹ nọ e nyaze na. Ma riẹ nọ ahwo buobu a te gwọlọ ruẹ aye ohwo nọ Ọghẹnẹ o ro su ai no ẹkwotọ Ijipti na.

Kọ ẹnyaze Zipora na o were Miriam re? O wọhọ nọ o were riẹ evaọ oke ọsosuọ. Rekọ nọ oke o be nyaharo na, o te mu oma họ ẹwọ kpehru. Ẹsejọhọ o jariẹ oma nọ Zipora o bi ti mi ei otọ no, inọ a gbẹ te riẹe odẹ hẹ. Oghẹrẹ kpobi nọ o jọ kẹhẹ, Miriam avọ Erọn a te mu eme iyoma Mosis họ ẹta. Ma riẹ nọ ẹsibuobu, nọ a tẹ be jọ emu ohwo ta ẹme kpahe iẹe, o rẹ sae whae ze nọ a rẹ rọ ta ohwo na raha. Yọ ere o jọ kẹ Miriam avọ Erọn. Evaọ oke ọsosuọ, a jẹ ta nọ Mosis ọ rehọ Zipora keleme, fikinọ Zipora yọ ohwo Izrẹl he. Ohwo Kush ọ jọ. * Rekọ u kri hi, a te mu eme nọ i yoma vi erọ ọsosuọ na họ ẹta kpahe Mosis. Miriam avọ Erọn a jẹ ta nọ: “Kọ ẹkwoma Mosis ọvo Jihova ọ rọ ta ẹme no? Kọ ọ gbẹ rọ ẹkwoma mai ta ẹme no re?”—Ikelakele 12:1, 2.

Who te rri eme iyoma yena nọ a ta kpahe Mosis na, whọ rẹ nwane ruẹ nọ uruemu uyoma Miriam avọ Erọn a muhọ ewo no na. O gbẹ were ae he inọ Jihova ọ be rọ Mosis su ahwo riẹ. A gwọlọ okpodẹ gbe ọkwa ologbo. Kọ fikinọ Mosis ọ be rọ obọ ogaga su ai je wo omorro jabọ nọ a be rọ ta eme iyoma nana kpahe iẹe na? Ma riẹ nọ Mosis ọ gba ha, fikiere eware e rẹ sae thọe obọ ẹsejọ. Rekọ orọnikọ ọ jọ ohwo nọ ọ jẹ gwọlọ okpodẹ, nọ ọ jẹ kpare igabọ kpehru hu. Ebaibol na ọ ta nọ: “Whaọ Mosis họ ọzae nọ ọ mai wolẹ kpaobọ evaọ usu ahwo kpobi nọ a jọ otọakpọ na.” Oware kpobi nọ o lẹliẹ Miriam avọ Erọn ta eme yena kẹhẹ, a la vrẹ usi no. Yọ a te reoja oware nọ a ru na. Ebaibol ọ ta nọ: “Jihova ọ jẹ gaviezọ.”—Ikelakele 12:2, 3.

Ẹsiẹvo na, Jihova o te se inievo esa na ẹgwae kpohọ uwou-udhu omakugbe na. Nọ a te etẹe, upila ẹgho nọ u re mu ọwhewhe na u te nwrotọ ziọ unuẹthẹ uwou-udhu na. Onana u dhesẹ nọ Jihova ọ nyaze no. Kẹsena Jihova ọ tẹ ta ẹme. Ọ whọku Miriam avọ Erọn. Ọ kareghẹhọ ae oghẹrẹ nọ usu riẹ avọ Mosis o kpekpe te, gbe nọ o mu uwou riẹ soso họ iẹe obọ. Jihova ọ tẹ nọ ae nọ: “Kọ fikieme ozọ u gbe mu owhai hi re wha ta ẹme wọso odibo mẹ, wọso Mosis?” U muẹro nọ Miriam avọ Erọn a je nuhu zighi zighi. O jọ Jihova oma nọ Mosis nọ a rri vo na yọ ọyomariẹ a bi rri vo na.—Ikelakele 12:4-8.

O wọhọ nọ Miriam họ ọnọ ọ mai kru ẹme na ga. Ọye o bru Erọn kugbe oma, aimava a te mu Mosis họ ẹfo. Ẹsejọhọ oyejabọ nọ Miriam ọ rọ rehọ uzou riẹ whae na. Jihova ọ rọ ẹyao oti tehe iẹe. Ekpehre ẹyao yena o ru nọ ohọroma riẹ o jẹ rọ “fo wọhọ ekpalekpa-ame.” Erọn o te mu Mosis họ ẹlẹ ababọ oke oraha. Ọ ta kẹe nọ jọ ọ lẹ Ọghẹnẹ kẹ ae, inọ: “Oware ugheghẹ ma ru na.” Mosis ọzae owowolẹ na o te bo se Jihova nọ, “O Ọghẹnẹ, ivie siwi ei! Ivie!” (Ikelakele 12:9-13) Oghẹrẹ nọ oware nọ o via kẹ Miriam na o kẹ inievo ivẹ riẹ uye te na u dhesẹ nọ a gine you oniọvo rai dede nọ eware e thọ riẹ obọ.

Jihova ọ re ohrọ Miriam. Fikinọ Miriam o kurẹriẹ, Jihova o siwi ẹyao oti riẹ na kpo. Rekọ re o te ti siwi ei, ọ ta nọ a rẹ rọ Miriam kpohọ otafe evuẹ ahwo Izrẹl na re ọ rria obei edẹ ihrẹ soso. Dai roro epanọ oma o vuọ Miriam te nọ a be kwae no evuẹ na kpohọ otafe na. Ohwo kpobi o ti yo oware nọ o via kẹe na. Rekọ o ru oware nọ u dhesẹ nọ o wo ẹrọwọ, yọ onana u siwi rie. Ọ riẹ nọ Jihova, Ọsẹ oyoyou riẹ na o re kienyẹ ohwo ho, yọ fikinọ o you rie ọ rọ whọku ei na. Fikiere, o te ru epanọ Jihova ọ ta na. Nọ ọye ọvo ọ jọ oria evaọ edẹ ihrẹ na yọ ahwo Izrẹl nọ i kiọkọ a be hẹrẹ. A wọ no etẹe ruọ edhere he. Nọ edẹ ihrẹ na e gba no, Miriam o ru oware ofa nọ u dhesẹ nọ o gine wo ẹrọwọ. Ọ rọwo nọ a ‘rehọ iẹe zihe ze.’—Ikelakele 12:14, 15.

Ahwo nọ Jihova o you ọ rẹ whọku. (Ahwo Hibru 12:5, 6) O you Miriam gaga oyejabọ nọ ọ rọ whọku ei na. Ọ kuvẹ re omorro riẹ o raha iẹe kuotọ họ. Ọwhọkuo na ọ kẹ Miriam uye, rekọ u fiobọhọ siwi uzuazọ riẹ. Fikinọ ọ romakpotọ je nwene, Ọghẹnẹ ọ rọvrẹ riẹ. Miriam o yeri uzuazọ riẹ vrẹ ri bọwo oke nọ ahwo Izrẹl a rọ joma te Ẹkwotọ Eyaa na no. O te whu evaọ Kedẹsh nọ o rrọ udhude Zin. U muẹro nọ oke yena yọ ọ joma kpako te ikpe udhozeza-gbikpe (130) no. * (Ikelakele 20:1) Nọ ikpe buobu e vrẹ no, Jihova o ru oware jọ ro bru ọghọ họ Miriam oma fiki ẹrọwọ riẹ. Ọ rehọ Maeka ọruẹaro riẹ kareghẹhọ ahwo riẹ nọ: “Obonọ wha jẹ jọ igbo mẹ ta owhai no ze; me vi Mosis, Erọn, gbe Miriam karo kẹ owhai.”—Maeka 6:4.

U wo eware buobu nọ ma rẹ sai wuhrẹ no iku Miriam na ze. U fo nọ ma rẹ thọ ahwo nọ ae ọvo a rẹ sae thọ omarai hi. Ma rẹ jẹ ta ẹme ududu wọhọ epanọ Miriam o ru evaọ oke nọ ọ jọ ọmaha. (Jemis 1:27) Ma rẹ jẹ rọ evawere whowho ẹme Ọghẹnẹ wọhọ epanọ Miriam o ru. (Ahwo Rom 10:15) Ma tẹ kareghẹhọ oware nọ o via kẹ Miriam na, u re ru omai yọroma kpahe ihri-eriọ gbe eme iyoma nọ ma rẹ ta kpahe amọfa. (Itẹ 14:30) Nọ Jihova ọ tẹ whọku omai, ma rẹ romakpotọ je nwene wọhọ epanọ Miriam o ru. (Ahwo Hibru 12:5) Ma te bi ru eware nana kpobi, yọ ẹrọwọ Miriam ma be rọ aro kele na.