•   Oghẹrẹ ohwo vẹ whọ sae ta nọ whọ rrọ?

•  Fikieme u ro wuzou re whọ riẹ?

•  Oware nọ whọ rẹ sai ru

•  Gbe se kpahe iẹe

•  Ẹme nọ ehwa ra a ta

•   Ohwo nọ o re roro kpahe abọ owoma oware ọvo

   “Mẹ rẹ daoma wereva ẹsikpobi, me re roro kpahe eware iyoma nọ e via ha. Kọ eme ọ rẹ whae ze nọ ovao mẹ o gbẹ jọ ohwohwẹ ẹsikpobi hi?”—Valerie.

•   Ohwo nọ o re roro kpahe abọ oyoma oware ọvo

   “Ẹsikpobi nọ me te yo kpahe emamọ oware, mẹ rẹ nwani viẹro nọ oware uyoma jọ u ti lele iei.”—Rebecca.

•   Ohwo nọ o re rri eware epanọ e ginẹ rrọ

   “Ohwo o te bi roro kpahe abọ owoma oware ọvo, o rẹ whae ze nọ o rẹ rọ dae gaga nọ oware uyoma o tẹ via kẹe, yọ ohwo o te bi roro kpahe abọ oyoma oware ọvo, ẹsikpobi eva i re mu ei dha. Fikiere me re rri eware epanọ e ginẹ rrọ.”—Anna.

 Ebaibol ọ ta nọ “ohwo nọ eva e be were o wo ehaa ẹsikpobi.” (Itẹ 15:15) Ere o ginẹ rrọ, eva e rẹ mae were ahwo nọ a re si iroro no eware iyoma nọ e be via jẹ tẹrovi abọ owoma eware. Ahwo otiọye na amọfa a rẹ mai si kẹle. Eme o gbẹ jọ ere he? Ono ọ rẹ gwọlọ jọ kugbe ohwo nọ o re mu ovao họ ẹsikpobi?

 O make rrọ ere na, ohwo kpobi ọ be rẹriẹ ovao dhe ebẹbẹ, te ahwo nọ a rẹ tẹrovi abọ owoma eware. Ejọ họ:

•   Usi ẹmo-ofio, ozighi, gbe okienyẹ nọ e da oria kpobi fia.

•   Ebẹbẹ uviuwou.

•   Ethobọ ra.

•   O sae jọ nọ ogbẹnyusu ra jọ o ru eva dha owhẹ.

 Ukpenọ who re ru wọhọ ẹsenọ whọ be ruẹ ebẹbẹ itiena ha, hayo tẹrovi ai te epanọ ọkora ọ rẹ rọ ruọ owhẹ oma, daoma rri eware epanọ u fo. Whọ tẹ rehọ eware epanọ e ginẹ rrọ, o te whae ze nọ ebẹbẹ na e gbẹ te kẹ owhẹ uye ga hrọ họ.

•   Riẹ nọ whọ rẹ sai ru thọ ẹsejọ.

   Ebaibol na ọ ta nọ: “Ohwo okiẹrẹe ọvuọvo ọ rrọ otọakpọ na ha nọ o re ru oware uwoma ẹsikpobi nọ ọ rẹ raha uzi vievie he.” (Ọtausiuwoma Na 7:20) Oware o tẹ thọ owhẹ obọ, o kẹ owhẹ uye ga hrọ họ.

   Epanọ whọ sai ro rri eware epanọ e ginẹ rrọ: Otẹrọnọ whọ be hai ru oware jọ thọ, daoma ku obọ rẹriẹ. Rekọ who du roro nọ oware o te gbẹ thọ owhẹ obọ ẹdẹvo ho ho. Ọmọzae jọ nọ a re se Caleb ọ ta no: “Mẹ rẹ daoma whaha ethobọ mẹ nọ me re roro kpahe ẹsikpobi. Ukpoye, me re roro kpahe oghẹrẹ nọ mẹ sae rọ whaha ethobọ itieye na ẹdẹfa.”

•   Whọ rọ omara kele amọfa ha.

   Ebaibol na ọ ta nọ: “Wha joma wo omorro ho, ma wha oma-uhrowo fihọ udevie mai hi, ma re ohwohwo ihri gbe he.” (Ahwo Galesha 5:26) Whọ tẹ be hae jọ itanẹte rri ifoto nọ egbẹnyusu ra a rehọ evaọ arozaha hayo epati nọ a zizie owhẹ kpohọ họ, o sae da owhẹ te ẹzi. O sae lẹliẹ owhẹ rọ ekpehre ubiẹro rri egbẹnyusu ra.

   Epanọ whọ sai ro rri eware epanọ e ginẹ rrọ: Riẹ nọ orọnikọ epati hayo arozaha kpobi a ti zizie owhẹ kpohọ họ. U te no ere no, kareghẹhọ nọ whọ tẹ make ruẹ ifoto nọ ahwo a be jọ reakpọ kuoma, u dhesẹ nọ ere uzuazọ rai kpobi o nwane rrọ họ. Ọmọtẹ jọ nọ a re se Alexis ọ ta nọ: “Ifoto nọ ahwo a jọ reakpọ kuoma eye a re fihọ itanẹte. A re fi ifoto eware efa buobu nọ a bi ru evaọ uzuazọ rai họ itanẹte he.”

•   Yerikugbe ahwo dhedhẹ, maero kọ evaọ uviuwou ra.

   Ebaibol na ọ ta nọ: “O tẹ lọhọ, nọ orọnọ obọ rai o rrọ na, wha lele ahwo kpobi rria dhedhẹ.” (Ahwo Rom 12:18) Whọ sae kpọ oware nọ amọfa a re ru owhẹ hẹ, rekọ whọ sae kpọ onọ who re ru kpahe oware nọ a ru owhẹ. Whọ sae gbaemu nọ who re lele ahwo rria dhedhẹ.

   Epanọ whọ sai ro rri eware epanọ e ginẹ rrọ: Daoma kpobi re who gbe koko erae họ ẹbẹbẹ nọ ọ rrọ uwou hu, daoma ru oware nọ o rẹ wha udhedhẹ ze, wọhọ epanọ who re ru nọ whẹ avọ egbẹnyusu ra wha te wo ẹbẹbẹ na. Ọmọtẹ jọ nọ a re se Melinda ọ ta nọ: “Ohwo ọvo ọ gba ha fikiere ma re ru ohwohwo thọ ẹsejọ. O tẹ via ere, obọ mai o rrọ sọ ma ti ku ẹme na họ dhedhẹ hayo ma te rehọ iẹe ru ẹwhọ.”

•   Wo edẹro.

   Ebaibol na ọ ta nọ: “Wha hai dhesẹ nọ wha wo edẹro.” (Ahwo Kọlọsi 3:15) Ohwo nọ o wo edẹro o re muẹrohọ emamọ eware nọ i te rie obọ evaọ uzuazọ orọnikọ eware nọ e riẹ nya kẹe he ọvo ọ rẹ tẹrovi hi.

   Epanọ whọ sai ro rri eware epanọ e ginẹ rrọ: Riẹ nọ whọ sai wo ebẹbẹ ẹsejọ, rekọ jọ emamọ eware nọ e be via kẹ owhẹ e thọrọ owhẹ ẹro ho. Ọmọtẹ jọ nọ a re se Rebecca ọ ta nọ: “Kẹdẹ kẹdẹ me re kere emamọ oware jọ nọ o via kẹ omẹ fihọ otọ. Mẹ gwọlọ nọ mẹ rẹ hae kareghẹhọ inọ emamọ eware e be hai te omẹ obọ, o tẹ make rọnọ me wo ẹbẹbẹ.”

•   Riẹ oghẹrẹ ahwo nọ who re lele nya usu.

   Ebaibol na ọ ta nọ: “Usu uyoma o rẹ raha uruemu ezi.” (1 Ahwo Kọrint 15:33) Who te ku usu gbe ahwo nọ a rẹ fuọ amọfa ẹsikpobi, nọ a re bruenu ọvo, uruemu yena u ti wholo owhẹ.

   Epanọ whọ sai ro rri eware epanọ e ginẹ rrọ: Egbẹnyusu ra a sai wo ebẹbẹ ẹsejọ, onana u ve ti ru nọ a ti ro bruenu hayo jọ ọkọkora. Fiobọhọ kẹ ae, rekọ whọ jọ ebẹbẹ rai e wha ọkora se owhẹ hẹ. Ọmọtẹ jọ nọ a re se Michelle ọ ta nọ: “Jọ o jọ nọ egbẹnyusu mai kpobi kọ ahwo nọ a re bruenu hu. Otẹrọnọ ahwo otiọye na ọvo họ egbẹnyusu ra, abọ oyoma eware ọvo whọ te tẹrovi.”

 Ebaibol ọ ta nọ oke nana nọ ma be rria na yọ “oke obẹbẹ nọ o rẹ bẹ ẹria.” (2 Timoti 3:1) Kọ o rrọ bẹbẹ kẹ owhẹ re who roro kpahe abọ owoma eware fikinọ eware iyoma e da akpọ fia? Se uzoẹme nana, “Fikieme Uye-Oruẹ O rọ Da Akpọ na Fia?”