“Ebaibol ọ sai fo eho, whọ gbẹ riẹ oghẹrẹ nọ a re sei hi,” ere uzoge jọ nọ a re se Will ọ ta.

 Kọ whọ gwọlọ riẹ epanọ Ebaibol ọ sai rọ were owhẹ ese? Uzoẹme nana u ti fiobọhọ kẹ owhẹ.

•  Ru oria nọ who bi se na wọhọ ẹsenọ o be via dẹẹ

•  Kiẹ otọ oware nọ o via!

•  Ẹme nọ ehwa ra a ta

 Fi omara họ iku nọ who bi se na. Whọ sae rọ edhere utiona ru ei:

1.   Salọ oria Ebaibol nọ whọ gwọlọ se. Whọ sae salọ iku jọ hayo oware nọ o via evaọ usu ebe Usi Uwoma na, hayo whọ sai salọ iku jọ evaọ isase Ebaibol nọ a ru wọhọ edrama nọ e rrọ jw.org.

2.   Se iku na. Whọ sae sei kẹ omara, hayo sei ruarua kẹ egbẹnyusu ra hayo ahwo uwou ra. Jọ ohwo jọ evaọ usu rai o se ohwo nọ o bi gbiku na, re ahwo nọ i kiọkọ a ghale oma rai fihọ ahwo nọ e rrọ iku na.

3.   O tẹ kawo, dao oriruo jọ evaọ usu enọ ma be te fodẹ na:

   •   Drọ ipishọ ro gbiku oware nọ iku na o be ta kpahe. Hayo drọ ipishọ othotha oghẹrẹ nọ oware na o be rọ via. Kere eme fihọ akotọ ipishọ ọvuọvo re whọ sae riẹ oware nọ o be jọ ipishọ yena via.

   •   Who te se kpahe iku ohwo nọ ọ jọ emamọ ohwo evaọ Ebaibol na, kere emamọ iruemu riẹ, oware nọ o ru gbe eghale nọ i te rie fihotọ.

   •   Zihe iku na ruọ usi nọ a re whowho. Nọ iyẹrẹ oware nọ o via evaọ iku na no eghagha avọ eghagha ze, “kiẹ” ahwo nọ iku na o be ta kpahe riwi gbe ahwo nọ e jọ etẹe nọ oware na o via.

   •   Otẹrọnọ ohwo jọ evaọ iku na ọ jiroro thọ, jọ udu ra roro kpahe oware nọ o hae via o hae jọnọ ọ jẹ emamọ iroro. Wọhọ oriruo, roro kpahe okenọ Pita ọ vro Jesu. (Mak 14:66-72) Uyo vẹ Pita ọ hae kẹ okenọ ahwo a jẹ rọ enọ fae ovao na?

   •   Whọ tẹ riẹ epanọ a re kere iku, kere iku kpahe omara nọ u re tho oware nọ o via dẹẹ evaọ Ebaibol na. Ku oware nọ a rẹ sai wuhrẹ noi ze kugbe iku na.—Ahwo Rom 15:4.

 Whọ tẹ kiẹ iku te otọ, whọ rẹ sae violo eware jọ nọ i dhere lahwe. Evaọ uzẹme, ẹme ọvo hayo ivẹ evaọ Ebaibol na ọ sae wo otofa ulogbo.

 Wọhọ oriruo, rọ Matiu 28:7 wawo Mark 16:7.

•    Fikieme Mak ọ rọ ta nọ Jesu ọ be te romavia kẹ ilele riẹ “gbe Pita”?

•  Riẹ nọ: Mak ọ jọ etẹe he nọ oware na o via; o sae jọ nọ Pita o gbiku na kẹe.

•  Uzẹme nọ u dhere: Fikieme udu Pita u re ro te otọ nọ o yo nọ Jesu ọ gwọlọ ruẹ riẹ? (Mak 14:66-72) Ẹvẹ Jesu o ro dhesẹ kẹ Pita nọ uvi ogbẹnyusu ọ ginẹ rrọ? Ẹvẹ whọ sai rọ raro kele Jesu jọ emamọ ogbẹnyusu kẹ amọfa?

 Who te zihe iku Ebaibol ruọ oware nọ o via dẹẹ jẹ daoma kiẹ otọ epanọ o rọ via, Ebaibol ọ te were owhẹ oma ese!