Pọl ukọ na o kere nọ: “Nọ mẹ tẹ gwọlọ ru oware nọ u kiehọ, oware uyoma o vẹ romavia.” (Ahwo Rom 7:21) Kọ o be hae jọ ere kẹ owhẹ ẹsejọ? O tẹ rrọ ere, uzoẹme nana u ti fiobọhọ kẹ owhẹ riẹ oghẹrẹ nọ whọ sae rọ kẹnoma kẹ eware iyoma nọ e rẹ sai si owhẹ urru ẹsejọ.

•  Oware nọ u fo nọ whọ rẹ riẹ

•  Oware nọ whọ rẹ sai ru

•  Ẹme nọ ehwa ra a ta

 Ehwa ra a sae lẹliẹ owhẹ ru oware nọ u yoma. Ebaibol na ọ ta nọ: “Usu uyoma o rẹ raha emamọ uruemu.” (1 Ahwo Kọrint 15:33, ẹme-obotọ) Eware nọ amọfa a bi ru gbe enọ whọ be ruẹ evaọ ifimu e rẹ sae lẹliẹ oware uyoma si owhẹ urru te epanọ who re ro ru eware iyoma nọ amọfa a bi ru.​—Ọnyano 23:2.

 “Ohwo ọ gbẹ yọroma ha ọ sai ru oware kpobi nọ ahwo a bi ru fikinọ ọ gwọlọ ru eva were ae.”​—Jeremy.

 Roro kpahe onọ nana: Nọ whọ tẹ be ruawa gaga kpahe epanọ amọfa a bi rri owhẹ, eme o rẹ sae lẹliẹ owhẹ ru?​—Itẹ 29:25.

 Ẹme na họ: Who ru oware nọ o thọ họ fikinọ whọ gwọlọ nọ ehwa ra a rọ emamọ ubiẹro rri owhẹ.

 Riẹ oware nọ u ro fo re whọ kẹnoma kẹ oware uyoma. Whọ gbẹ riẹ oware nọ u ro fo re whọ kẹnoma kẹ oware uyoma ha, obonọ a si owhẹ rri kpobi whọ te nya. O te mai woma re who lele ohrẹ Ebaibol nọ o ta nọ: “Wha vuhu eware kpobi mu; wha kru onọ u woma ga.” (1 Ahwo Tẹsalonika 5:21) Whọ tẹ riẹ oware nọ u ro fo re whọ kẹnoma kẹ uruemu uyoma jọ, ẹsiẹe whọ te rọ jọ udu ra gbaemu inọ who re koko uzi Ọghẹnẹ jẹ kẹnoma kẹ oware uyoma nọ a be gwọlọ nọ who ru na.

 Roro kpahe onọ nana: Fikieme u ro mu owhẹ ẹro nọ who te koko izi Ọghẹnẹ ẹsiẹe eware e te mae riẹ nya kẹ owhẹ?

 “Mẹ ruẹ nọ, nọ amọfa a tẹ be gwọlọ gele omẹ fihọ oware uyoma, mẹ gbẹ rọwo kẹ ae he, a rẹ kẹ omẹ adhẹẹ vi epaọ ọsosuọ.”​—Kimberly.

 Emamọ oriruo jọ evaọ Ebaibol: Daniẹl. Daniẹl “ọ jọ udu riẹ gbaemu” nọ o re koko izi Ọghẹnẹ. Yọ o wọhọ nọ oke yena ọ gbẹ jọ ikpe ikpegbọ.​—Daniẹl 1:8.

 Riẹ oware uyoma nọ whọ rẹ sai kiero lọlọhọ. Ebaibol ọ ta ẹme kpahe “isiuru uzoge,” koyehọ eware nọ e rẹ were ohwo gaga nọ ọ tẹ gbẹ maha. (2 Timoti 2:22) Enana orọnikọ isiuru owezẹ ọvo ho. Izoge a rẹ jẹ gwọlọ ru eware nọ e rẹ were ehwa rai re a sae rọ emamọ ubiẹro rri rai. U te no ere no, a rẹ gwọlọ ru oware nọ o rrọ ae eva. A rẹ gwọlọ nọ omọfa ọ vuẹ ae oware nọ a re ru hu dede nọ a ri te ahwo nọ a rẹ jiroro kẹ omobọ rai hi.

 Roro kpahe onana: Ebaibol ọ ta nọ: “Odawọ u re te omomọvo fiki isiuru obọriẹ nọ e rẹ wọe jẹ lẹliẹe họ.” (Jemis 1:14) Oware uyoma vẹ o rẹ mai si owhẹ urru?

 “Whẹ ọvo whọ riẹ eware nọ whọ rẹ sai kie kẹ lọlọhọ. Jọ ebe ukoko na se kpahe oghẹrẹ nọ whọ sae rọ kẹnoma kẹ eware nana, re who je kere eware nọ e rẹ sai fiobọhọ kẹ owhẹ fihotọ. Oke ofa nọ whọ jẹ nyaku oware utioye, whọ vẹ riẹ oghẹrẹ nọ whọ rẹ rọ kẹnoma kẹ oware uyoma na.”​—Sylvia.

 Emamọ oriruo jọ evaọ Ebaibol. Devidi. Oke jọ o jariẹ nọ Devidi o ru eware nọ i fo ho fikinọ ọ gwọlọ ru eva were amọfa, hayo fikinọ eware na i si rie urru. Rekọ o kẹ riẹ uye uwhremu na, yọ o gbe ru ai ẹdẹfa ha. Ọ lẹ se Jihova nọ: “Kẹ omẹ udu ofuafo, . . . re who fi ẹzi ọkpokpọ họ omẹ oma, onọ o rrọ gaga.”​—Olezi 51:10.

 Who fi oma họ otọ họ. Ebaibol ọ ta nọ: “Whọ kuvẹ re eyoma o fi owhẹ kparobọ họ.” (Ahwo Rom 12:21) Onana u dhesẹ nọ, oware uyoma u te bi si owhẹ urru, hayo nọ ohwo jọ ọ tẹ be bẹbẹ owhẹ họ re who ru oware nọ u fo ho, whọ sae se.

 Roro kpahe onọ nana: Eme ọ rẹ sae lẹliẹ owhẹ gba omara re who gbe ru oware nọ whọ rẹ vioja riẹ ẹdẹfa ha?

 “Mẹ rẹ daoma roro sọ udu mẹ u ti brukpe omẹ ẹdẹfa nọ me te ru oware nọ u bi si omẹ urru na. Kọ me te ru oware na, o te were omẹ oma? Ẹsejọ o te were omẹ oma evaọ omoke jọ. Rekọ nọ u te kri no ẹdẹfa ẹvẹ o te jọ? Oware nọ me ru na o te gbẹ were omẹ? Ijo, o te kẹ omẹ uye gaga. Kọ nọ oware nọ u fo nọ a re gine ru? Kaka!”​—Sophia.

 Emamọ oriruo jọ evaọ Ebaibol: Pọl. Dede nọ Pọl ọ ta nọ iroro iyoma e rẹ ruọ ẹe udu ẹsejọ, ọ daoma kpobi re ọ kẹnoma kẹ eware yena. O kere nọ: “Mẹ be whọku oma mẹ gaga je bi su ei wọhọ ọrigbo.”​—1 Ahwo Kọrint 9:27, ẹme-obotọ.

 Ẹme na họ: Nọ oware uyoma u te bi si owhẹ urru, obọ ra ẹme na ọ rrọ. Whọ sai ru oware nọ u fo.

 Kareghẹhọ nọ, eware iyoma nọ i bi si owhẹ urru nẹnẹ i ti si owhẹ urru odẹ hẹ. Melissa nọ ọ rrọ ikpe udhe o kere nọ: “Eware iyoma buobu nọ i je si omẹ urru oke nọ mẹ jọ isukulu, i gbe bi si omẹ urru enẹna ha. Nọ me roro kpahe onana, mẹ tẹ ruẹ nọ eware nọ i bi si omẹ urru nẹnẹ na i ti si omẹ urru odẹnotha ha. Yọ evaọ obaro, mẹ tẹ kareghẹhọ oghẹrẹ nọ mẹ rọ kẹnoma kẹ eware nana, eva e te were omẹ gaga.”