Kọ epanọ ahwo nana a ta na ere o be hae jọ owhẹ oma ẹsejọ?

 “Ẹsikpobi me re roro inọ: ‘Kọ otẹrọnọ . . . ?’ ‘Kọ ma te wo asidẹnte?’ ‘Kọ arupre nọ ma ro o te kie?’ Mẹ be ruawa eware nọ ohwo aruro ọ rẹ ruawa rai hi.”—Charles.

 “Mẹ rẹ ruawa gaga. Mẹ wọhọ odhogbi nọ ọ be jọ eva etaya dhẹ wariẹ họ nọ ọ be sae dhẹ kpohọ oria ovo ho. Me bi ruiruo taso tuvo rekọ mẹ be ruẹ ovao iruo na ha!”—Anna.

 “Nọ ahwo a tẹ vuẹ omẹ nọ omẹ u woma inọ mẹ gbẹ rrọ isukulu, mẹ rẹ jọ udu mẹ ta nọ, ‘ahwo ọna a riẹ uye nọ o rrọ isukulu hu!’”—Daniel.

 “Awaọruọ ọ da omẹ oma fia. Mẹ rẹ ruawa oware nọ o re via dede he hayo oware nọ me ti ru.”—Laura.

 Uzẹme na họ: Ma be rria etoke nọ Ebaibol o se “oke obẹbẹ nọ o te bẹ eyeri.” (2 Timoti 3:1) Fikiere, te emaha te ekpako a sae ruawa.

 Ijo. Makọ Ebaibol dede ọ ta nọ u woma re ohwo ọ ruawa kpahe epanọ o ti ro ru eva were ohwo nọ o you.—1 Ahwo Kọrint 7:32-34; 2 Ahwo Kọrint 11:28.

 Re a ginẹ ta uzẹme—awaọruọ ọ rẹ kẹ ohwo ẹgba ru oware nọ whọ hẹ sai ru vẹre he. Wọhọ oriruo, otẹrọnọ oka notha wha ti kere ẹdawọ, awaọruọ ọ sae lẹliẹ owhẹ se obe re whọ sae pase!

 Awaọruọ ọ sai je ru ohwo yọroma gaga. “Otẹrọnọ who bi ru oware jọ nọ o thọ, awaọruọ o re ru owhẹ riẹ nọ owọ nọ whọ be jẹ na u woma ha, u ve je ru owhẹ nwene iroro re udu o siọ owhẹ ba ebrukpe,” ere ọmọtẹ jọ nọ a re se Serena ọ ta—Wawo Jemis 5:14.

 Uzẹme na họ: Awaọruọ ọ sai fiobọhọ kẹ owhẹ otẹrọnọ ọ wọ owhẹ jowọ nọ u fo.

 Kọ otẹrọnọ awaọruọ ọ be lẹliẹ owhẹ roro kpahe eware iyoma nọ e re via ha?

 Oriruo: “Udu mẹ u re te otọ họ nọ me te roro kpahe eware sa-sa nọ e rẹ sai no idhọvẹ jọ ze. Iroro eware na ọvo e rẹ ziọ omẹ udu te epanọ awaọruọ ọ rẹ rọ gwọlọ kpe omẹ no,” ere ọmọzae ikpe kpogbizi jọ nọ a re se Richard ọ ta.

 Ebaibol ọ ta nọ “Udu udhedhẹ [o] rẹ kẹ iwo uzuazọ.” (Itẹ 14:30) Evaọ abọdekọ riẹ, awaọruọ ọ sae lẹliẹ uzou tehe ohwo, lẹliẹ aro bi ohwo, lẹliẹ eva da ohwo, jẹ lẹliẹ ohwo wo ẹyao udu.

 Eme whọ rẹ sai ru otẹrọnọ awaọruọ o bi kpe owhẹ no viukpenọ o re fiobọhọ kẹ owhẹ?

•    Kiẹ omara riwi re whọ ruẹ oware nọ o be ginẹ lẹliẹ owhẹ ruawa. “Re a ruawa fiki eware nọ e vọ ohwo obọ o thọ họ; rekọ re a rọ fiki oyena ruawa vrẹta o thọ. Onana o lẹliẹ omẹ kareghẹhọ ohare jọ nọ a re bru inọ, Awaọruọ ọ wọhọ agbara nọ ohwo ọ be jọ thahe kurẹriẹ. Whọ sae ginẹ rọ ẹgba ra kpobi thahe iẹe, rekọ who ti no ẹta ha.”—Katherine.

   Ebaibol ọ ta nọ: “Ono evaọ usu rai ọ rẹ sae rọ fiki awaọruọ fi omoke jọ ba uzuazọ riẹ?”—Matiu 6:27.

   Otọ ẹme na họ: Awaọruọ ọ gbẹ wọ owhẹ ru oware nọ u fo ho, o ve fiba ẹbẹbẹ ra. Hayo u ve ti zihe ruọ ẹbẹbẹ ra.

•    Le orọ okpẹdẹ na ọvo. “Roro ei te ziezi. Kọ oware nọ whọ be rọ fiki riẹ ruawa na u ti wo iruo kẹ owhẹ odẹnotha? amara ọsoso? ukpe ovo? ikpe isoi?”—Anthony.

   Ebaibol ọ ta nọ: “Wha ruawa odẹnotha vievie he, keme odẹnotha o ti wo ẹkẹ ebẹbẹ riẹ. Ebẹbẹ ẹdẹ kpobi i te kẹ ẹdẹ yena.”—Matiu 6:34.

   Otọ ẹme na họ: O nwani kiehọ tere he re ma ruawa eware nọ e te via evaọ obaro—keme ejọ rai dede e rẹ via ha.

•    Otẹrọnọ whọ sai nwene uyero na ha, kọ rehọ iẹe ere. “Oware nọ whọ sai ru kpobi họ dao utho ẹgba ra kpobi evaọ uyero nọ whọ rẹriẹ ovao ku na, rekọ riẹ vevẹ nọ u wo oware ovo nọ whọ rẹ sai ru kpahe iyero jọ họ.”—Robert.

   Ebaibol ọ ta nọ: “Ọmae dhẹ a rọ kparobọ họ, . . . hayo ọwena eware e mai kiehọ kẹ hẹ, rekọ oke gbe uvẹ o rẹ whae ze.”—Ọtausiuwoma Na 9:11.

   Otọ ẹme na họ: Ẹsibuobu ohwo ọ rẹ sai nwene uyero nọ ọ rẹriẹ ovao ku hu, rekọ ọ sai nwene eriwo riẹ kpahe uyero na.

•    Hae tẹrovi eware nọ e ginẹ mai wuzou. “Mẹ ruẹ vuhumu no inọ u woma re mẹ kaki wo otoriẹ uyero na tao viukpenọ mẹ rẹ nwani mu awa họ ẹruọ. Mẹ rẹ kaki roro kpahe eware nọ e mai wuzou kẹsena me ve ru eware yena.”—Alexis.

   Ebaibol ọ ta nọ: “Vuhu eware nọ e mae roja.”—Ahwo Filipai 1:10.

   Otọ ẹme na họ: Ahwo nọ a rẹ ruawa evaọ omoware kpobi hi, ebẹbẹ rai e rẹ kake rro vrẹ ae oma ha.

•    Ta kẹ ohwo jọ. “Okenọ mẹ jọ oware wọhọ ikpe kpogbọvo, mẹ jẹ hae ruawa kẹdẹ kẹdẹ nọ me te bi no isukulu kpozi, ozọ isukulu nọ mẹ te nya odẹnotha u je mu omẹ. Ọsẹgboni mẹ a jẹ gaviezọ kẹ omẹ nọ mẹ tẹ be ta kẹ ae epanọ eware e rọ kẹ omẹ. Eva ọsẹgboni mẹ e jẹ were omẹ gaga. Mẹ jẹ ta oware kpobi kẹ ae fikinọ me fievahọ ae. Onana o jẹ hai ru nọ ozọ isukulu nọ mẹ te nya odẹnotha u gbe je ro mu omẹ hẹ.”—Marilyn.

   Ebaibol ọ ta nọ: “Awaọruọ ọ rẹ rọ ohwo gbotọ, rekọ ẹme ezi ọ rẹ kẹ ẹe eva ewerọ.”—Itẹ 12:25.

   Otọ ẹme na họ: Ọsẹgboni hayo ogbẹnyusu ra a sae vuẹ owhẹ oware nọ who re ru re whọ gbẹ ruawa vrẹta ha.

•    Lẹ. “Oware jọ nọ u fiobọhọ kẹ omẹ họ mẹ jẹ lẹ do via te epanọ me je ro yo uvo mẹ dede. Mẹ jẹ ta oware nọ o be lẹliẹ omẹ ruawa na lahwe viukpenọ o rẹ jọ omẹ eva ọvo. U te je fiobọhọ kẹ omẹ riẹ nọ Jihova ọ riẹ eware kpobi nọ mẹ be ruawa rai.”—Laura.

   Ebaibol ọ ta nọ: “Gbolo awaọruọ rai kpobi kẹe, keme ọ be daezọ rai.”—1 Pita 5:7.

   Otọ ẹme na họ: Ma du roro nọ ma tẹ lẹ no yọ ẹbẹbẹ na o kuhọ no ho. Jihova who bi lele ta ẹme na, ọnọ ọ ta nọ: “Who nyuhẹ hẹ, keme mẹ họ Ọghẹnẹ ra. Mẹ te kẹ owhẹ ogaga, me ti fiobọhọ kẹ owhẹ.”—Aizaya 41:10.