Akpọ na o rri rie nọ, u re kiekpe ohwo kpobi nọ o bi dhesẹ uruemu oruọzewọ. Keme otujọ o re roro nọ:

•   ‘Me gbe gu ọrue kẹ ọsẹgboni mẹ hẹ, mẹ sae kpohọ oria nọ mẹ gwọlọ nya na ha.’

•   ‘Me gbe ru ẹspo evaọ ẹdawọ nana ha, me ti feli.’

•   ‘Me gbe tho oware nana ha, mẹ te ruẹ ugho dẹe he.’

 ‘U te no ere no dede, eme ọ jariẹ thọ. ‘Ohwo jọ ọ riẹ nọ o bi tho uji hi?’

 Uyo onọ yena họ ee. Keme ahwo buobu—makọ izoge dede a riẹ nọ oruọzewọ u kiehọ gaga, yọ u re kiekpe ohwo ho. “Oware kpobi nọ ohwo ọ be kọ, oye o ti vu,” ere Ebaibol ọ ta. (Ahwo Galesha 6:7) Koyehọ, owọ nọ ma jẹ hayo ẹme nọ ma ta, oware nọ u no rie ze kpobi mai ọvo ma te rọ uzou mai di ei—te uwoma te uyoma.

 Wọhọ oriruo, rri oware nọ o via kẹ ahwo jọ fiki ọrue nọ a gu.

  “Me gu ọrue kẹ oni mẹ kpahe ọmọ jọ. Ọ riẹ nọ ọrue me bi gu na. Orọ avọ isiasa nọ me ro gu ọrue nana kẹe, eva e tẹ dha oni mẹ. O te juzi kẹ omẹ nọ evaọ eka ivẹ soso mẹ dao iẹe no uwou na ha, o te je mi omẹ ifonu mẹ jẹ whaha omẹ etẹlẹvisiọno iriwo evaọ amara soso. Mẹ gbẹ dao iẹe gu ọrue kẹ ọsẹgboni mẹ ofa ha woo!”—Anita.

 Roro kpahe onọ nana: Fikieme o te rọ bẹ gaga re oni Anita ọ tẹ te rọwo ẹme nọ Anita ọ te ta kẹe oke ofa kpobi?

 Ebaibol ọ ta nọ: “Enẹna nọ wha siobọno eviẹhọ no na, whai omomọvo ọ hae ta uzẹme kẹ ọrivẹ riẹ.”—Ahwo Ẹfẹsọs 4:25.

  “Me gu ọrue kẹ ọsẹgboni mẹ bi roro nọ mẹ vabọ no, rekọ evaọ owọwọ a tẹ wariẹ se omẹ ze re mẹ wariẹ iku oware nọ o via na kẹ ae. Fikinọ ọrue mẹ kaki gu kẹ ae, mẹ gbẹ jẹ sae wariẹ eme na unọjọ utọjọ họ. Rekọ whọ tẹ ta uzẹme, eme na e rẹ whaliẹ evaọ unu hu makọ unuẹse kpobi nọ a se owhẹ kẹ hẹ fiki ẹme ọvona!”—Anthony.

 Roro kpahe onọ nana: Ẹvẹ Anthony ọ hae sae rọ whaha oware omovuọ yena nọ o via kẹe na?

 Ebaibol ọ ta nọ: “Ọrue ọ ta oware otọtọ eva aro ỌNOWO na, rekọ ahwo oruọzewọ a rẹ were iẹe.”—Itẹ 12:22.

  “Unu ogbẹnyusu mẹ jọ o rẹ were umuo ho nọ o te bi gbiku. Keme o re bru okpa họ ẹme gaga je tube fi ọrue bae dede. Fikinọ ọ were omẹ gaga mẹ rẹ nwane tẹrovi uruemu yena tere he. Rekọ evaọ uzẹme, whọ sae kake rọwo ẹme na ọ ta vievie he.”—Yvonne.

 Roro kpahe onọ nana: Didi oghẹrẹ ohwo a rẹ sae dhesẹ ogbẹnyusu Yvonne na fihọ, nọ orọnọ o re bru okpa họ ẹme je tube gu ọrue kugbei na?

 Ebaibol ọ ta nọ: “Ma gwọlọ . . . ru eware kpobi avọ oruọzewọ.”—Ahwo Hibru 13:18.

 Dae rri irere nọ i re no oruọzewọ ze.

  “Ugho u kie no obọ aye jọ nọ ọ jọ aro mẹ jẹ nyavrẹ fihọ otọ. Mẹ tẹ tọlọ ugho na dhẹ sei. Eva e were riẹ umuo ho. Ọ tẹ ta nọ: ‘Oware nọ who ru na u gbunu kẹhẹ. Keme ahwo wọhọ owhẹ na a bu hu evaọ akpọ na.’ Eva e rẹ were ohwo gaga nọ o te ru oware uwoma nọ amọfa a muẹrohọ!”—Vivian.

 Roro kpahe onọ nana: Fikieme oruọzewọ nọ o dhesẹ na u ro gbe aye na unu? Kọ erere vẹ o te Vivian fiki oruọzewọ nọ o dhesẹ na?

 Ebaibol ọ ta nọ: “Oghale u te enọ i re. . . ru oware nọ ukiete ẹsikpobi.”—Ilezi 106:3.

  “Iruo orufuọ oye uviuwou mai u je ru kẹ ahwo, fikiere ẹsibuobu ma rẹ ruẹ ibigho nọ i kie fihọ otọ ọfisi nọ ma bi ririe na. Nọ o tẹ via ere, ma vẹ tọlọ ugho na fihọ ehru emẹjẹ nọ ọ rrọ etẹe kpobi. Oware nọ ma je ru na o jẹ dha ohwo jọ nọ ma je ruiruo kẹ eva—ọ ta nọ: ‘oruọzewọ rai o vrẹta!’ Rekọ eva nọ e were omai họ, o fievahọ omai gaga fiki oruọzewọ mai.”—Julia.

 Roro kpahe enọ nana: Otẹrọnọ Julia o kpohọ ekọmpene ọfa nyae gwọlọ iruo odẹnotha, didi oghẹrẹ ohwo ekọmpene nọ ọ be jọ ruiruo obọnana o ti dhesẹ Julia?

 Ebaibol ọ ta nọ: “Dawo ẹgba ra kpobi re whọ jọ ọnọ Ọghẹnẹ ọ rẹ jẹrehọ, oruiruo nọ o wo oware ovo nọ o rẹ lẹliẹ oma vuọ iẹe he.”—2 Timoti 2:15.

  “A hwa omẹ osa euwa 80, yọ euwa 64 ọvo me ru. Dede nọ mẹ tẹ riẹ ugho na ohwo ọvo ọ rẹ riẹ hẹ, udu u brukpe omẹ. Mẹ tẹ vuẹ ohwo nọ ọ rẹ hwosa kẹ omai, yọ eva e were riẹ umuo ho. Orọnọ ugho na o hae lẹliẹ ekọmpene na kie he, rekọ mẹ sae re ugho utioye he keme me rri rie fihọ ugho nọ a tho.”—Bethany.

 Roro kpahe enọ nana: Kọ ugho ekọmpene nọ a tho u wo ohẹriẹ no uji nọ a re tho omọfa?

 Ebaibol ọ ta nọ: “Ohwo nọ o re ru umuomu o re tu ỌNOWO na oma, rekọ o fievahọ enọ edhere rai okiẹrẹe.”—Itẹ 3:32.