U fo nọ whọ rẹ rẹrote eware nọ e rrọ ghaghae kẹ owhẹ, wọhọ uwou hayo omoto ra. Ere ọvona o gwọlọ nọ who re ru usu ra kugbe Ọghẹnẹ ga re. Kọ ẹvẹ whọ sai ro ru usu ra kugbe Ọghẹnẹ ga nọ whọ tẹ họ-ame no?

Ma te ta kpahe eware nana

•  Gbẹ hai se Ẹme Ọghẹnẹ

•  Gbẹ hae lẹ se Jihova

•  Gbẹ hae vuẹ amọfa kpahe eware nọ who bi wuhrẹ

•  Gbẹ hai kpohọ ewuhrẹ Ileleikristi

 Ebaibol na ọ ta nọ: “Ruabọhọ ru iruo iwoma kpobi jẹ . . . nyaharo evaọ eriariẹ egbagba Ọghẹnẹ.”—Ahwo Kọlọsi 1:10.

 Oware nọ onana u dhesẹ: Nọ whọ tẹ họ-ame no, o gwọlọ nọ whọ rẹ gbẹ hai se Ebaibol na je roro didi kpahe eware nọ who bi se na.—Olezi 25:4; 119:97.

 Oware nọ o rẹ sae via: Evaọ ẹsejọ, obe-use o rẹ ruọ ohwo oma ha. Whọ sai tube roro nọ whẹ yọ ohwo nọ “obe-use” o rẹ nwane were tere he.

 Oware nọ whọ rẹ sai ru: Se kpahe eware nọ e rẹ mae were owhẹ evaọ Ebaibol na. Fi oke họ nọ who re ro se Ebaibol na gbe ebe ukoko na, jẹ jiroro oghẹrẹ nọ who re ro ru ei nọ o gbẹ rọ bẹ owhẹ no ho. Utee ra họ re usu ra kugbe Jihova o kpekpe ziezi, ẹme riẹ ọ vẹ jẹ hae were owhẹ. Whọ tẹ be hae rọ enẹ se Ebaibol na, who re wo erere noi ze, yọ obe-use o te hae were owhẹ re.—Olezi 16:11.

 Oware jọ nọ u re fiobọhọ: Re whọ sae wo erere ziezi no oware nọ who bi se ze, daoma ruẹ nọ whọ rrọ oria nọ ọ rrọ fọfọ.

 Eware efa nọ e rẹ sai fiobọhọ

•   Se:

   “Ẹvẹ Ebaibol E Sae ro Fiobọhọ Kẹ Omẹ?—Abọ 2: Riẹ Epanọ Ebaibol Ọ Sae rọ Were Owhẹ Ese”

   “Ẹvẹ Mẹ Sae rọ Tẹrovi Oware nọ Me bi Ru Ziezi?”

•   Rri ividio na:

   Ẹme nọ Ehwa Ra A Ta—Isase Ebaibol

•   Danlodu:

   “Omaa Isase Ebaibol”

 Ebaibol na ọ ta nọ: “Wha ruawa kpahe oware ovo ho, rekọ evaọ oware kpobi wha rọ olẹ avọ olẹ ayare-ọgaga kugbe uyere-okẹ ta ayare rai via kẹ Ọghẹnẹ.”—Ahwo Filipai 4:6.

 Oware nọ onana u dhesẹ: Ọghẹnẹ ọ rẹ ta ẹme kẹ owhẹ, whọ vẹ jẹ ta ẹme kẹ Ọghẹnẹ. Whọ rẹ gaviezọ kẹe nọ who te bi se ẹme riẹ Ebaibol na; whọ rẹ ta ẹme kẹe nọ whọ tẹ be lẹ sei. Riẹ nọ whọ sae lẹ kpahe eware nọ e rrọ owhẹ oja, who ve je yere ei kẹ eware nọ o ru kẹ owhẹ no.

 Oware nọ o rẹ sae via: Ẹsejọ, o sae jọ wọhọ nọ who bi dhe eme evona ẹwẹwariẹ evaọ olẹ. Whọ sai roro nọ o wọhọ nọ Ọghẹnẹ ọ be gaviezọ kẹ owhẹ hẹ hayo ọ tubẹ gwọlọ gaviezọ kẹ owhẹ hẹ.—Olezi 10:1.

 Oware nọ whọ rẹ sai ru: Evaọ okpẹdẹ na soso, hae lẹ kpahe eware nọ e rrọ owhẹ iroro. Otẹrọnọ fiki epanọ eware e rrọ kẹ owhẹ hayo oria nọ whọ rrọ, whọ sae lẹ olẹ othethei hi, whọ sae lẹ evaọ owọwọ nọ who te te uwou no. U te no eware obọra nọ whọ rẹ lẹ kpahe no, whọ sae lẹ roro amọfa re.—Ahwo Filipai 2:4.

 Oware jọ nọ u re fiobọhọ: Who te roro nọ whọ be hae dhe eme evona ẹwẹwariẹ evaọ olẹ ra, lẹ se Jihova kpahe iẹe. Jihova ọ gwọlọ nọ whọ vuẹe eware kpobi nọ e be kẹ owhẹ uye, makọ eme olẹ ra nọ o wọhọ nọ whọ be hae dhe ẹwẹwariẹ na.—1 Jọn 5:14.

 Eware efa nọ e rẹ sai fiobọhọ

•   Se:

   “Kọ U Fo re Mẹ Lẹ?”

•   Danlodu:

   “Epanọ A rẹ rọ Lẹ Emamọ Olẹ”

 Ebaibol na ọ ta nọ: “Hai muẹrohọ omara gbe ewuhrẹ ra kẹse kẹse. . . . Enẹ oruo who ti ro siwi omara gbe enọ e gaviezọ kẹ owhẹ.”—1 Timoti 4:16.

 Oware nọ onana u dhesẹ: Whọ tẹ be hae vuẹ amọfa kpahe eware nọ who bi wuhrẹ, ẹrọwọ ra ọ te jọ gaga. U ti ru nọ whọ sai ro siwi uzuazọ rai gbe uzuazọ ahwo nọ a gaviezọ kẹ owhẹ.

 Oware nọ o rẹ sae via: Orọnikọ ẹsikpobi o te ruọ owhẹ oma re whọ vuẹ ahwo kpahe eware nọ who bi wuhrẹ hẹ. Ozọ o sai tube mu owhẹ re whọ vuẹ amọfa, maero kọ evaọ obọ isukulu.

 Oware nọ whọ rẹ sai ru: Whọ kuvẹ hẹ re eware wọhọ ehoo hayo ozọ i ru oma lọhọ owhẹ. Pọl ukọ na o kere nọ: “Mẹ tẹ be [make ta usi uwoma na] dede nọ o were omẹ hẹ, o gbẹ rrọ iruo nọ a mu họ omẹ obọ.”—1 Ahwo Kọrint 9:16, 17.

 Oware jọ nọ u re fiobọhọ: Ọsẹgboni ra a tẹ rọwo, mu usu kugbe oniọvo nọ whọ rẹ sae rọ aro kele emamọ uruemu riẹ, maero kọ oghẹrẹ nọ ọ be rọ ta usi uwoma.—Itẹ 27:17.

 Eware efa nọ e rẹ sai fiobọhọ

•   Se:

   “Why Am I Afraid to Share My Faith?”

 Ebaibol na ọ ta nọ: “Joma roro kpahe ohwohwo re ma sai ru ohwohwo dhesẹ uyoyou je ru iruo iwoma, ma re gbabọkẹ omakokohọ mai hi.”—Ahwo Hibru 10:24, 25.

 Oware nọ onana u dhesẹ: Oware nọ o be mae wọ omai kpohọ ewuhrẹ họ, re ma gọ Jihova. Rekọ irere ivẹ efa e riẹ nọ ma re wo nọ ma te kpohọ ewuhrẹ. Orọ ọsosuọ, inievo na a ti tuduhọ owhẹ awọ. Orọ avivẹ, who te ru ẹme hayo kuyo, whọ te tuduhọ inievo na awọ re.—Ahwo Rom 1:11, 12.

 Oware nọ o rẹ sae via: Ẹsejọ iroro ra e sai kpohọ enẹ avọ enẹ evaọ obọ ewuhrẹ, onọ o rẹ sai ru nọ emamọ eme jọ e rẹ rọ vrẹ owhẹ. Hayo whọ sae siọ ewuhrẹ ba, jẹ kuvẹ re eware isukulu e rehọ oke ra te epanọ who gbe ro wo uvẹ kẹ ewuhrẹ hẹ.

 Oware nọ whọ rẹ sai ru: Dede nọ whọ te nyasiọ eware obọ isukulu ra ba ha, whọ jọ ewuhrẹ o vo owhẹ hẹ makọ ẹsiẹvo dede, re who je fi iroro họ eware nọ a bi wuhrẹ. Hae kparobọ re whọ kuyo. Nọ ewuhrẹ o te kuhọ no, o tẹ kawo jiri omọvo jọ kẹ uyo riẹ hayo kẹ ẹme nọ o ru.

 Oware jọ nọ u re fiobọhọ: Ruẹrẹ oma kpahe taure oke ewuhrẹ u te ti te. Danlodu JW Library® app, re whọ jọ oria “Meetings” na rri eware nọ a te ta kpahe evaọ obọ ewuhrẹ.

 Eware efa nọ e rẹ sai fiobọhọ

•   Se:

   “Why Go to Christian Meetings?”