Dae rehọ iẹe nọ whẹ avọ ohwo jọ wha were ohwohwo gaga, fikiere wha tẹ rọwo nọ wha rẹ nya usu re wha riẹ sọ wha sae rọo. Eware vẹ u fo nọ who re rẹro rai oke nọ wha te nya usu re wha riẹ ohwohwo ziezi na?

Ma te ta kpahe eware nana

•  Riẹ nọ wha te ta uzẹme kẹ ohwohwo

•  Riẹ nọ wha ti rri eware epọvo na ha

•  Riẹ nọ usu orọo o rẹ rehọ oke jẹ lẹliẹ oma rrọ ohwo

 Whẹ avọ ohwo nọ wha te gbẹ nya usu na wha te riẹ ohwohwo ziezi keme wha te raha oke kugbe. Yọ whọ te riẹ eware jọ kpahe ohwo na evaọ uruemu nọ o bi dhesẹ.

 Rekọ u wo eware jọ nọ o gwọlọ nọ whai imava wha rẹ ta kpahe. Nọ wha te ta kpahe eware na, daoma ruẹ nọ who rorote ziezi. Who du ta eware nọ i no owhẹ eva ze he he fikinọ ohwo na ọ were owhẹ gaga.

 Eware jọ nọ u fo nọ whai imava wha rẹ ta kpahe:

•   Ugho. Kọ whọ riosa? Kọ o be hae jọ bẹbẹ kẹ owhẹ re whọ raha ugho avọ areghẹ? Nọ wha tẹ rọo no, eme wha ti ru kpahe ugho nọ wha ti wo? Kọ ẹvẹ wha te rọ raha ugho?

•   Oma ra. Kọ oma ra o ga? Kọ who wo ẹyao jọ nọ o jẹ kẹ owhẹ uye gaga oke jọ nọ u kpemu?

•   Eware nọ whọ gwọlọ ru. Eware vẹ whọ gwọlọ nọ who re ru evaọ uzuazọ? Kọ eware nọ whọ gwọlọ ru eye ọvona ohwo nọ who bi lele nya usu orọo na ọ gwọlọ ru? Nọ wha tẹ rọo no, kọ eva e te gbẹ were owhẹ otẹrọnọ whọ sai ru eware nọ who wo họ iroro ho fiki oghẹrẹ nọ eware e rrọ?

•   Uviuwou. Kọ u wo ahwo uviuwou ra jọ nọ whọ be ko? Kọ u wo ahwo uviuwou ra jọ nọ whọ te rẹrote evaọ obaro? Kọ whọ gwọlọ yẹ emọ? Otẹrọnọ Ee, bro emọ whọ gwọlọ yẹ?

 Nọ wha tẹ be ta kpahe eware nana, daoma ruẹ nọ whọ ta uzẹme. Whọ ko ẹme ọvo dhere he, hayo ta ẹme na were vi epanọ o rrọ họ re ohwo na o rri owhẹ fihọ emamọ ohwo.—Ahwo Hibru 13:18.

 Roro kpahe enọ nana: Eme u fo nọ whọ rẹ riẹ kpahe ohwo nọ wha gbẹ be nya usu orọo? Eme u fo nọ ọ rẹ riẹ kpahe owhẹ? Nọ wha tẹ ta uzẹme kẹ ohwohwo enẹna, ẹvẹ onana o sai ro fiobọhọ kẹ owhai ta uzẹme kẹ ohwohwo nọ wha tẹ rọo uwhremu na?

 Ohrẹ Ebaibol: “Whai omomọvo ọ hae ta uzẹme kẹ ọrivẹ riẹ.”—Ahwo Ẹfisọs 4:25.

 “Ọmọtẹ ọ sai roro nọ, ‘Ẹsejọhọ taure ma tẹ te nya usu te emerae ezeza yọ ọmọzae na ọ ta kẹ omẹ nọ ọ te rehọ omẹ no,’ rekọ ọmọzae na ọ sae gwọlọ nọ a rẹ nya usu na te ukpe re ọ tẹ te vuẹe. O tẹ via enẹ o sae kẹ ọmọtẹ na uye je ru ei reghe no, keme o bi rẹro nọ ọmọzae na ọ hae te ta ẹme orọo kẹe no. Fikiere u fo nọ aimava a rẹ riẹ oware nọ ohwohwo o bi roro kpahe ẹme na.”—Ariana nọ ọ rọo te ukpe ọvo no.

 Imava a sae jọ epọvo na ha. Fikiere who du roro vievie he inọ ohwo nọ wha gbẹ be nya usu orọo wha te rọwokugbe evaọ oware kpobi hayo rri eware kpobi epọvo na. Wọhọ oriruo, uruemu ẹwho gbe epanọ a rọ yọrọ ohwo e sae lẹliẹ ohwo rri oware oghẹrẹ ofa.

 Roro kpahe onọ nana: Nọ wha gbẹ rọwokugbe evaọ eware jọ nọ i wuzou tere he, kọ wha be hae rehọ orọ ohwohwo ẹsejọ re udhedhẹ o sae jariẹ otẹrọnọ oware na o wọso uzi Ebaibol ho?

 Ohrẹ Ebaibol: “Wha ru re ahwo kpobi a ruẹ nọ wha wo iroro.”—Ahwo Filipai 4:5.

 “Whọ tẹ maki roro nọ wha fo ohwohwo gaga, riẹ nọ wha te rọwokugbe evaọ oware kpobi hi. O tẹ make rọnọ u wuzou re wha fo ohwohwo, oware nọ o mai wuzou họ uruemu nọ whai imava na wha ti dhesẹ nọ wha gbẹ rọwokugbe he evaọ oware jọ.”—Matthew nọ ọ rọo te ikpe isoi no.

 Riẹ nọ usu orọo o te rehọ oke ra gaga yọ o te lẹliẹ oma rrọ owhẹ. Rekọ eme o rẹ sai fiobọhọ kẹ owhẹ?

 Daoma riẹ umuo nọ who re ru ba. Whọ kuvẹ hẹ re usu orọo nọ whọ be nya o rehọ oke ra kpobi no te epanọ whọ gbẹ sai ru eware efa nọ u fo nọ who re ru hu, hayo nọ who gbe ro wo oke kẹ egbẹnyusu ra ha. Alana nọ ọ rọo te ikpe isoi no ọ ta nọ: “Nọ whọ tẹ make rọo no dede whọ gbẹ gwọlọ egbẹnyusu, yọ a te gbẹ gwọlọ nọ whọ jọ ogbẹnyusu rai re. Fikiere whọ kpairoro vrẹ rai enẹna ha fikinọ whọ be nya usu orọo.”

 Kareghẹhọ nọ whọ tẹ rọo no, o te gbẹ gwọlọ nọ who re ru eware kpobi nọ i wuzou ghele. Yọ enẹna nọ whọ be nya usu orọo na whọ sai ro mu ei họ.

 Roro kpahe enọ nana: Kọ whọ be hae gwọlọ nọ ohwo nọ wha gbẹ be nya usu orọo na ọ rẹ raha oke kugbe owhẹ gaga hayo jọ kugbe owhẹ ẹsikpobi? Kọ o rrọ owhẹ oma nọ eware nọ ọ gwọlọ mi owhẹ i bu ga hrọ? Eme whai imava na wha rẹ sai ru re wha ruẹ nọ usu orọo na o rehọ oke rai kpobi hi hayo ruẹ nọ o be lẹliẹ oma rrọ owhai ga hrọ họ?

 Ohrẹ Ebaibol: “Oware kpobi u wo oke riẹ, oware kpobi nọ a bi ru.”—Ọtausiuwoma Na 3:1.

 “Otẹrọnọ arozaha ọvo họ oware nọ imava nọ a be nya usu orọo a rẹ raha oke rai fihọ, oware nọ a te ruẹ nọ a tẹ rọo no u ti gbe ae unu. U fo nọ a re ru eware jọ nọ a ti ru evaọ oke nọ a tẹ rọo no. Wọhọ oriruo, a sai kpohọ eki kugbe, wozẹ imidhe kugbe jẹ gọ Ọghẹnẹ kugbe. Eware nana i re fiobọhọ kẹ ae riẹ epanọ a sai ro ru eware kugbe ziezi okenọ a tẹ rọo no.”—Daniel nọ ọ rọo te ikpe ivẹ no.

 Kareghẹhọ nọ usu orọo yọ oware ubroke nọ o re fiobọhọ kẹ ohwo jiroro sọ ọ rẹ rọo hayo ọ rẹ fa usu na. Evaọ abọ avọ 3 uzoẹme nana, ma te ta kpahe eware nọ ohwo o re roro kpahe taure ọ tẹ te jiroro oware nọ o re ru.