•  Oware nọ u fo nọ whọ rẹ riẹ

•  Oware nọ whọ rẹ sai ru

•  Ẹme nọ ehwa ra a ta

 A sai fievahọ owhẹ otẹrọnọ whẹ yọ ohwo nọ a rẹ sai fievahọ. Who te bi yoẹme kẹ ọsẹgboni ra o wọhọ ẹsenọ whọ be hwa osa nọ whọ re. Whọ re osa ẹme nọ who re yo kẹ ọsẹgboni ra, yọ epanọ whọ be hwa osa na te, ere a rẹ kẹ owhẹ ‘ugho’ (hayo uvẹ) te. Evaọ abọdekọ riẹ, otẹrọnọ whọ gbẹ rọ ohwo nọ a re fievahọ họ, a jọ u gbe owhẹ unu hu inọ ọsẹgboni ra a ti mi owhẹ uvẹ jọ nọ a kẹ owhẹ no.

 O rẹ rehọ oke re a te ti fievahọ ohwo. O gwọlọ nọ whọ rẹ hai dhesẹ emamọ uruemu ẹsikpobi taure ọsẹgboni ra a tẹ te kẹ owhẹ uvẹ ziezi.

 IKUIGBE OWARE NỌ O VIA: “Nọ mẹ jọ ikpe ikpegbọ, mẹ riẹ oware nọ ọsẹgboni mẹ a gwọlọ mi omẹ, fikiere me je ru wọhọ ẹsenọ me bi ru oware nọ a gwọlọ mi omẹ, yọ mẹ be hae lẹlẹ ru oware nọ o rrọ omẹ eva. Oyena u je ru ei bẹbẹ re ọsẹgboni mẹ a fievahọ omẹ. Nọ oke jọ o vrẹ no, mẹ tẹ te riẹ nọ edhere nọ ọsẹgboni mẹ a sae rọ kẹ omẹ uvẹ ziezi họ, mẹ rẹ jọ ohwo oruọzewọ. Re amọfa a ruẹsi fievahọ owhẹ, whọ rẹ jọ ohwo nọ a rẹ sai fievahọ.”—Craig.

 Ta uzẹme—o tẹ make bẹ. Oware o rẹ thọ ohwo kpobi obọ, rekọ whọ tẹ be gbenu okenọ oware o tẹ thọ owhẹ obọ (hayo ko eware jọ dhere re a siọ uzẹme na ba ẹriẹ), ọsẹgboni ra a gbẹ te sai fievahọ owhẹ vievie he. Evaọ abọdekọ riẹ, a tẹ riẹ owhẹ nọ whẹ yọ ọmọ nọ ọ rẹ ta uzẹme ẹsikpobi, ọsẹgboni ra a te ruẹ inọ who te ohwo nọ ọ rẹ rọwo ethobọ riẹ no. Yọ oghẹrẹ ohwo otiọye na a rẹ sai fievahọ.

 “Orọnikọ ẹsikpobi nọ oware o thọ owhẹ obọ a gbe ro fievahọ owhẹ hẹ hẹ, rekọ nọ whọ tẹ be gwọlọ ko ethobọ ra dhere, o rẹ whae ze ẹsikpobi nọ a gbe fievahọ owhẹ hẹ.”—Anna.

 Ebaibol ọ ta nọ: “Ma be gwọlọ ru eware kpobi avọ oruọzewọ.”—Ahwo Hibru 13:18.

•   Roro kpahe enọ nana: Okenọ ọsẹgboni ra a tẹ nọ owhẹ obonọ whọ be nya gbe oware nọ whọ gwọlọ ru, whọ be hae ta uzẹme na kpobi kẹ ae? Hayo kọ okenọ ọsẹgboni ra a tẹ nọ owhẹ obonọ whọ nya gbe oware nọ who ru, kọ whọ be hae ko eware jọ nọ u fo nọ a rẹ riẹ dhere ai?

 Jọ ohwo nọ a rẹ sae rẹroso. Koko izi kpobi nọ a jọ uwou rai fihọ. Ru iruo uwou nọ a kẹ owhẹ vẹrẹ vẹrẹ. Who leti kpohọ oria nọ wha jọ fi oke họ họ. Se iruo nọ a jọ obọ isukulu kẹ owhẹ gboja. Who kpohọ ore kri vrẹ oke nọ a fihọ kẹ owhẹ hẹ.

 “Otẹrọnọ ọsẹgboni ra a kẹ owhẹ uvẹ nọ whẹ avọ egbẹnyusu ra a kpohọ ore ri bọo ighọjọ izii owọwọ (9:00 p.m), whọ rehọ ighọjọ ikpe gbabọ (10:30 p.m) kpozi hi, keme a te gbẹ kẹ owhẹ uvẹ nya ẹdẹ ọfa ha.”—Ryan.

 Ebaibol ọ ta nọ: “Ohwo kpobi ọ te wọ ọvuọ owha-iruo nọ u te rie.”—Ahwo Galesha 6:5, ẹme-obotọ.

•   Roro kpahe onọ nana: A riẹ owhẹ wọhọ ohwo nọ o re koko oke, ru iruo uwou nọ a kẹ owhẹ, je koko izi nọ a fihọ evaọ uwou na—makọ enọ e were owhẹ hẹ?

 Wo odiri. Otẹrọnọ whọ raha eva nọ ọsẹgboni ra a fihọ owhẹ, o te rehọ oke re a tẹ wariẹ fievahọ owhẹ. Who re wo odiri.

 “Eva e jẹ dha omẹ nọ ọsẹgboni mẹ a jẹ kẹ omẹ uvẹ ru eware jọ họ nọ mẹ kpako te unuikpe jọ no. Mẹ riẹ vẹre he inọ, orọnikọ unuikpe nọ ohwo ọ rrọ u re dhesẹ nọ o wo areghẹ no ho. Mẹ tẹ ta kẹ ọsẹgboni mẹ inọ a kẹ omẹ uvẹ re me dhesẹ nọ me te ohwo nọ a rẹ sai fievahọ no. Dede nọ o rehọ oke, o wha ewoma ze. Yọ me wuhrẹ nọ unuikpe nọ ohwo ọ rrọ a re ro fievahọ iẹe he, rekọ oware nọ o bi ru.”​—Rachel.

 Ebaibol ọ ta nọ: “Wha hai dhesẹ oghẹrẹ ohwo nọ wha rrọ via.”—2 Ahwo Kọrint 13:5.

•   Roro kpahe onọ nana: Re ọsẹgboni ra a fievahọ owhẹ (hayo wariẹ fievahọ owhẹ), eware jọ vẹ whọ rẹ sai ru ro dhesẹ ‘oghẹrẹ ohwo nọ whọ rrọ via’?

 EWARE JỌ NỌ I RE FIOBỌHỌ: Fi utee họ evaọ eware nana, oke nọ who re koko, iruo uwou nọ who re ru, oke nọ who re ro no ore ze, hayo eware efa jọ kpobi. Ta kẹ ọsẹgboni ra oware nọ whọ gba riẹ mu nọ who ti ru jẹ nọ ae oware nọ a gwọlọ mi owhẹ re a sai fievahọ owhẹ. Kẹsena whọ vẹ daoma ru lele ohrẹ Ebaibol nana: “Wha ba uruemu anwae na no oma, onọ o rọwokugbe oghẹrẹ uzuazọ nọ wha je yeri vẹre.” (Ahwo Ẹfisọs 4:22) Nọ oke o be nya na, ọsẹgboni ra a te ruẹ epanọ whọ be riẹ ru te!