Ẹsejọhọ egbẹnyusu ra kpobi a bi kpohọ eria itanẹte nọ a sae jọ nyusu kugbe amọfa, yọ a rẹ ta ẹme kpahe iẹe ẹsikpobi. O sae jọ nọ a be hai se owhẹ ẹkoko keme who re kpohọ eria itanẹte itieye he. Eme u fo nọ whọ rẹ riẹ kpahe eria itanẹte nana? Kọ eme whọ rẹ sai ru?

 Whẹ ọvo o rrọ ere kẹ hẹ. Esẹgbini buobu a rẹ kẹ emọ rai uvẹ hẹ re a hai kpohọ eria itanẹte nọ a sae jọ nyusu kugbe amọfa. A riẹ nọ a te bi kpohọ eria itanẹte yena, eware nana e sai noi ze:

•   ọkora gbe ẹyao iroro.

•   ifoto ẹbẹba nọ a re rri, ifoto ẹbẹba nọ a rẹ rọ ifonu vi se ohwohwo, gbe amọfa nọ a rẹ gwọlọ ae ẹme.

•   ebẹbẹ buobu nọ e rẹ romavia evaọ udevie ahwo nọ a gbẹ be nyusu.

 Izoge buobu a salọ nọ a rẹ siọ eria itanẹte nọ a rẹ jọ nyusu kugbe amọfa ba ekpohọ. Izoge buobu a muẹrohọ nọ eria itanẹte nana e be wha ebẹbẹ buobu se ae, viukpenọ u re fiobọhọ kẹ ae. Joma ta kpahe iriruo jọ:

•   Priscilla ọ ruẹ nọ eria itanẹte nana e be rehọ oke riẹ kpobi no, fikiere ọ gbẹ be sai ru eware nọ e mae roja kẹe he.

•   Jeremy o muẹrohọ nọ eware buobu nọ ọ be ruẹ evaọ oria itanẹte riẹ, i kiehọ iẹe oma ha, yọ u wo oghẹrẹ ọvo nọ ọ sai ro si ai no ho.

•   Bethany ọ ruẹ nọ eria itanẹte yena e be lẹliẹe ruawa je roro kpahe eware nọ amọfa a bi ru ga hrọ.

 “Me si oware nọ a re ro rovie kpohọ oria itanẹte nọ a sae jọ nyusu kugbe amọfa no ifonu mẹ, yọ eva e were omẹ nọ me ru ere. O da omẹ hẹ, keme enẹna me wo oke nọ me re ro ru eware nọ e mae roja.”​—Sierra.

 “Nọ ohwo o te bi kpohọ eria itanẹte nọ a sae jọ nyusu kugbe amọfa, oke kpobi oma o rẹ wọe re o rovie kpohọ iẹe, yọ onana o were omẹ hẹ. Yọ ẹsejọ mẹ rẹ ruawa kpahe ẹme nọ ahwo a te ta kpahe eware nọ me kere. O lọhọ kẹ omẹ hẹ re me si oware nọ a re ro rovie kpohọ eria itanẹte yena no ifonu mẹ, rekọ nọ me ru ere, eva e were omẹ. Udu u te omẹ otọ, mẹ gbẹ be ruawa ha.”​—Kate.

 Ru oware nọ ọsẹgboni ra a ta. Nọ who te ru oware nọ ọsẹgboni ra a ta, onana u re dhesẹ kẹ ae nọ who mu areghẹ họ ewo no, yọ whọ sai koko izi nọ a fihọ kẹ owhẹ ababọ ofu nọ who re mu, hayo inoma nọ who re gu.

 Ohrẹ Ebaibol: “Ohwo ogheghẹ o re dhesẹ evedha riẹ kpobi via, rekọ ohwo owareghẹ ọ rẹ nyẹ omariẹ.”​—Itẹ 29:11.

 Ahwo jọ a sae ta kẹ owhẹ inọ whọ hae lẹlẹ rovie kpohọ eria itanẹte itieye na, ababọ ọsẹgboni ra nọ whọ rẹ ta kẹ. Who te ru ere, who ti fi omara họ uye. Udu o te hai brukpe owhẹ yọ whọ te jọ awawa. O te wha ẹbẹbẹ se owhẹ nọ a tẹ riẹ kpahe oware nọ who bi ru na, yọ a ti gbe fievahọ owhẹ hẹ.

 Ohrẹ Ebaibol: “Ma be gwọlọ ru eware kpobi avọ oruọzewọ.”​—Ahwo Hibru 13:18.

 Ru oware nọ ọsẹgboni ra a ta wọhọ ẹsenọ whọ be rọ udu obọra ru ei. Wọhọ izoge nọ ma ta kpahe evaọ obehru na, whẹ ọvo whọ sai roro kpahe eware jọ nọ e rẹ lẹliẹ owhẹ siọ eria itanẹte yena ba ekpohọ. Whọ tẹ riẹ nọ eria itanẹte nọ a sae jọ nyusu kugbe amọfa i kiehọ owhẹ oma ha, whọ sae siọ eria itanẹte yena ba ekpohọ, orọnikọ fiki ọsẹgboni ra ọvo ho, rekọ fikinọ u no owhẹ eva ze. Who te rri rie ere, o te gbẹ kẹ owhẹ uye he nọ egbẹnyusu ra a tẹ nọ owhẹ kpahe iẹe, yọ a te gbẹ rehọ iẹe se owhẹ ẹkoko ho.

 Ẹme na họ: Ru oware nọ ọsẹgboni ra a ta. Ru ei wọhọ ẹsenọ whẹ ọvo whọ jiroro na kẹ omara. Obọnana, whọ sai yeri uzuazọ ra vrẹ ababọ itanẹte.