Whọ te jọ uzoẹme nana riẹ eware jọ kpahe

•  Ohwo nọ who re vi uwou se

•  Uwou nọ who re vi

•  Oke nọ who re ro vi uwou

O te jẹ ta kpahe:

•  Roro kpahe onana

•  Enọ gbe iyo

 Izoge buobu a ruẹ nọ re a rọ ifonu vi uwou se ahwo u kiehọ kẹhẹ. Keme u re ru nọ who re ro lele ahwo nọ edẹ rai e rrọ ifonu ra ta ẹme lọlọhọ, kiyọ ọsẹgboni ra a rọwo fihọ iẹe he.

 “O rẹ dha ọsẹ mẹ eva nọ mẹ avọ oniọvo ọmọtẹ ọmaha mẹ ma te bi lele emezae ta ẹme. Rekọ re ma lele ọmọzae ta ẹme kiyọ ifonu nọ ọ rrọ otuwou ma re ro se, yọ ahwo kpobi a bi yo ẹme nọ ma be ta.”​—Lenore.

 Oware nọ whọ rẹ riẹ: Whọ tẹ rehọ inọmba ra kẹ ohwo kpobi o sai fi owhẹ họ uye.

 “Whọ gbẹ riẹ ahwo nọ whọ rẹ kẹ inọmba ra ha, whọ vẹ te jọ ifonu ra ruẹ ekpehre iwou hayo ifoto nọ a ti vi se owhẹ.”​​—Scott.

 “Whọ tẹ be hae vi uwou se ọmọzae hayo ọmọtẹ ẹsikpobi, obọnana yọ ọ dhẹruọ owhẹ oma no.”​—Steven.

 Ebaibol ọ ta nọ: “Ohwo owareghẹ ọ ruẹ ese o re sioma no.” (Itẹ 22:3) Whọ tẹ dina muẹrohọ otọ, whọ te whaha ebẹbẹ jọ.

 Oware nọ o via dẹẹ: “Mẹ avọ ọmọzae jọ ma jọ egbẹnyusu yọ ma jẹ hai vi uwou se ohwohwo gaga. Me je roro nọ usu gheghe, yọ me se rie gbe oware ovo ho bẹsenọ ọ rọ vuẹ omẹ nọ o wo isiuru kẹ omẹ. O hae jọnọ me rri otọ mu, mẹ hai mu usu kugbei hi​—mẹ hai tube vi uwou se ei dede he.”​—Melinda.

 Dai roro iei: Ẹvẹ who roro nọ usu Melinda avọ ọmọzae na o be te jọ enẹna nọ ọ riẹ nọ ọye omariẹ ọ were ọmọzae na no na?

 Wariẹ gbiku na! Eme Melinda ọ hai ru re avọ ọmọzae na a jọ egbẹnyusu gheghe nọ isiuru e gbẹ ruẹe he?

 O lọhọ kẹhẹ re a rọ ifonu vi uwou, yọ o rẹ were oma nọ u te te ohwo obọ, rekọ oware ofa o rẹ ze ahwo jọ iroro.

 Oware nọ whọ rẹ riẹ: Ẹmẹme nọ who vi se ohwo o rẹ sae lẹliẹ ohwo wo iroro efa.

 “A sae jọ uwou nọ a vi riẹ oware nọ o rrọ iroro ohwo ho hayo riẹ urru riẹ hẹ. Makọ emeka ifoto esese nọ e rẹ jọ ifonu nọ ohwo na o fihọ iẹe. O sae wha ẹwhọ tha.”​—Briana.

 “Mẹ riẹ emetẹ buobu nọ e raha odẹ rai no, a te je rri rai fihọ emetẹ nọ e rẹ lẹliẹ emezae fiki uwou nọ a vi.”​—Laura.

 Ebaibol ọ ta nọ: “Evaọ ohwo nọ o kiẹrẹe o re roro didi epanọ ọ rẹ rọ kẹ uyo.” (Itẹ 15:​28) Eme ma jọ oria Ebaibol nana wuhrẹ? Wariẹ se uwou nọ whọ gwọlọ vi na ziezi tao!

 Whọ sae rọ areghẹ riẹ oghẹrẹ uwou nọ who re vi gbe oke nọ who re ro vi ei.

 Oware nọ whọ rẹ riẹ: Who gbe muẹrohọ oghẹrẹ iwou nọ who re vi hi, who ti ru ahwo jọ eva dha hayo le ahwo no oma, a vẹ te rọ ekpehre ibiaro rri owhẹ.

 “Who gbe muẹrohotọ họ o rẹ thọrọ ẹro re whọ riẹ oke nọ who re ro vi uwou. Mẹ avọ ohwo jọ ma jẹ ta ẹme evaọ okenọ ma jẹ re emu yọ oke ovona me bi vi uwou se omọfa evaọ ifonu.”​—Allison.

 “O rọ yoyoma gaga re who vi uwou yọ whọ be dhẹ omoto. Whọ tẹ nwane si ovao no edhere yọ ora u reno.”​—Anne.

 Ebaibol ọ ta nọ: “Koware koware kpobi ọvuọ ezi riẹ, . . . oke jọ nọ a rẹ rọ fọ tou, oke jọ nọ a rẹ rọ ta ẹme.” (Ọtausiuwoma Na 3:1, 7) Onana u kiekpahe uwou nọ a re vi orọnikọ ẹmeọta ọvo ho!

Ohwo nọ who re vi uwou se

•  ;-) Yoẹme nọ ọsẹgboni ra a vuẹ owhẹ.​—Ahwo Kọlọsi 3:20.

•  ;-) Whọ kẹ ohwo kpobi inọmba ra ha. Whọ tẹ be rọ areghẹ ko evuẹ jọ dhere kpahe omara te inọmba ra, yọ who bi wuhrẹ omara emamọ uruemu nọ u ti fiobọhọ kẹ owhẹ nọ whọ tẹ kpako no.

•  ;-) A riẹ owhẹ fihọ ohwo nọ o re vi uwou obẹlẹ se ahwo ho. Ohwo na o te wo isiuru obẹlẹ kẹ owhẹ whẹ ọvo who ru omara.

 “Ọsẹgboni mẹ a fievahọ omẹ keme mẹ rẹ rọ ifonu mẹ vi ugbevi hi, yọ a riẹ nọ me re mu inọmba ahwo fihọ ifonu mẹ hẹ.”​—Briana.

Uwou nọ who re vi

•  ;-) Taure who te ti mu uwou họ ekere nọ omara nọ, ‘Kọ uwou u vi o mai woma nọ mẹ rẹ rọ ta ẹme nana?’ Ẹsejọ o rẹ mai woma re whọ rọ ifonu se ei hayo hẹrẹ bẹsenọ wha rẹ ruẹ ẹro.

•  ;-) Oware nọ whọ riẹ nọ whọ rẹ sae ta ha nọ whọ tẹ ruẹ ohwo na, who kere iei hi. Sarah nọ ọ rrọ ikpe 23 ọ ta nọ “otẹrọnọ ahwo a re yo ẹme na ha, who vi ei hi.”

 “Otẹrọnọ ohwo o vi ekpehre ifoto se owhẹ, vuẹ ọsẹgboni ra. O te thọ owhẹ, ọsẹgboni ra a ve je fievahọ owhẹ.”​—Sirvan.

Oke nọ who re ro vi uwou

•  ;-) Jẹ iroro na kpahotọ okenọ who re dhobọte ifonu ra ha. Ọmọtẹ nọ a re se Olivia ọ ta nọ, “Ifonu mẹ ọ rẹ jọ kugbe omẹ hẹ nọ mẹ tẹ be re emu hayo nọ me te bi se obe. Me re furie nọ mẹ tẹ rrọ uwuhrẹ re mẹ se iẹe ba ẹnẹ.”

•  ;-) Roro kẹ amọfa. (Ahwo Filipai 2:4) Who vi uwou hu nọ ohwo ọ tẹ rrọ kugbe owhẹ bi lele owhẹ ta ẹme.

 “Mẹ vuẹ omamẹ no nọ me re vi uwou se ohwo ho nọ mẹ tẹ rrọ udevie ahwo hayo kiyọ o gba omẹ họ nọ me re vi uwou na. Mẹ rẹ kẹ ohwo nọ mẹ riẹ hẹ inọmba mẹ hẹ.”​—Janelly.