Anwọ oke jọ ze na whẹ avọ ohwo jọ wha be nya usu orọo, rekọ o wọhọ nọ avro ọ be gwọlọ ruọ owhẹ udu sọ whọ gbẹ gwọlọ nya usu na. Kọ u fo re who gbe lele ohwo na nya usu na manikọ whọ rẹ fae? Uzoẹme nana u ti fiobọhọ kẹ owhẹ jiroro na.

Ma te ta kpahe eware nana

•  Oware nọ who re ru nọ who te wo avro

•  Jiroro oware nọ who re ru

•  Oware nọ who re ru nọ whọ tẹ jiroro nọ whọ be fa usu na

 Nọ ọmọzae avọ ọmọtẹ a tẹ nya usu orọo te oria jọ no, ẹsejọ a rẹ ruẹ nọ a nwani kiehọ ohwohwo oma te epanọ a roro oke ọsosuọ họ. Wọhọ oriruo:

•   Nọ a tẹ gwọlọ ru eware nọ e rẹ lẹliẹ oma rai jaja, ọjọ ọ rẹ gwọlọ nọ o re kpobọ unueri abade, rekọ ọnọ o kiọkọ ọ rẹ gwọlọ nọ ọ rẹ nyae gadiẹ igbehru.

•   Ọjọ evaọ usu rai ọ rẹ sasa oma gaga, rekọ ọnọ o kiọkọ ọ rrọ dhedhẹ.

•   Ẹsibuobu ọjọ o re ru eware nọ ọ rẹ rọ viẹ amọfa họ, rekọ ọnọ o kiọkọ ọ rẹ ta uzẹme ẹsikpobi.

 Who te muẹrohọ, eware nọ ma ta kpahe na e rrọ epọvo na ha. Evaọ ọrọ ọsosuọ na, oware ovona o rẹ were aimava na ha; evaọ ọrọ avọ ivẹ na, aimava na a rrọ epọvo na ha; yọ evaọ ọrọ avọ esa na, uruemu rai u wo ohẹriẹ.

 Roro kpahe enọ nana: Otẹrọnọ whẹ avọ ohwo nọ wha be nya usu orọo na wha rọo, ọvẹ evaọ usu eware esa na o te mae jọ bẹbẹ kẹ owhẹ re who thihakọ riẹ? Kọ ọvẹ who roro nọ whai imava na wha sae kuvẹ riẹ?

 O tẹ make rọnọ oware ovona o rẹ were ọzae avọ aye he yọ a rrọ epọvo na ha, a sai wo evawere ghele evaọ orọo rai. Re a ta nọ imava a fo ohwohwo, orọnikọ epọvo na a rẹ jọ họ yọ orọnọ oware ovona o rẹ nwane were aimava na ha. Ẹsejọ ọzae ọ sai kuomagbe aye riẹ ru oware nọ o rẹ were aye na, yọ aye na ọ sai ru epọvo na re. Aimava a sai tube wuhrẹ mi ohwohwo dede. a

 Rekọ u wuzou gaga re ohwo nọ whọ te rehọ o wo emamọ uruemu wọhọ owhẹ. Yọ u fo nọ ọ rẹ rọwo eware nọ whọ rọwo kpahe egagọ gbe eware nọ who rri nọ i woma hayo i yoma. Otẹrọnọ o wo emamọ uruemu hu yọ o bi rri eware epọvo na ha, onana o sai dhesẹ nọ o te mai woma re whọ fa usu na.

 Wọhọ oriruo, roro kpahe oware nọ o rẹ sae via nọ ọzae avọ aye a tẹ rrọ ọvuọ egagọ riẹ. Obe na Fighting for Your Marriage o ta nọ: “Ekiakiẹ buobu nọ a ru no i dhesẹ nọ orọo nọ ọzae avọ aye a jọ rrọ ọvuọ egagọ riẹ, oye o rẹ mae kake fa.”

 Ohrẹ Ebaibol: “Wha mu usu kugbe enọ e rọwo ho ho.”—2 Ahwo Kọrint 6:14.

 Ebaibol na ọ ta nọ enọ e rọo a ti “wo ukpokpoma.” (1 Ahwo Kọrint 7:28, Ebaibol Ẹri Na) Fikiere, ukpokpoma utioye u te te owhẹ oma enẹna nọ whọ be nya usu orọo na, jọ u gbe owhẹ unu hu.

 Nọ wha te bi wo ẹmẹwhọ, orọnikọ onana o nwani dhesẹ nọ usu na o be riẹ nya ha ha. Onọ nọ u fo nọ whọ rẹ nọ omara họ, nọ wha te wo ẹmẹwhọ, kọ wha be hae sai ku ẹwhọ na họ dhedhẹ? Onana u ti fiobọhọ kẹ owhai gaga nọ whai imava wha tẹ rọo no.

 Ohrẹ Ebaibol: “Wha dhesẹ uwowou kẹ ohwohwo, wo uvi ọdawẹ, wha rọvrẹ ohwohwo riẹriẹriẹ.”—Ahwo Ẹfisọs 4:32.

 Rekọ otẹrọnọ whai imava na wha rẹ whọ gaga, onana o sai dhesẹ nọ wha fo ohwohwo ho. Otẹrọnọ wha fo ohwohwo ho, o mai woma re whọ riẹ enẹna ukpenọ wha rẹ rọo no whọ vẹ te vioja!

 Ẹme na họ: Otẹrọnọ who wo avro kpahe ohwo nọ wha gbẹ be nya usu orọo na hayo who rri omara nọ whọ re ruẹrẹ oma kpahe kẹ orọo ho, ru oware jọ kpahe iẹe enẹna!

 Ohrẹ Ebaibol: “Ohwo nọ o wo areghẹ ọ rẹ ruẹ oware enwoma, o ve siomano, rekọ ogbori ọ rẹ nyaruọ ẹe, ọ vẹ reoja oware nọ u re noi ze.”—Itẹ 22:3.

 O rẹ da gaga nọ ohwo ọ tẹ fa usu orọo nọ ọ be nya. Rekọ otẹrọnọ whẹ hayo whai imava na wha wo avro kpahe usu nọ wha be nya na, o mai woma re wha fa usu na.

 Kọ oghẹrẹ vẹ u fo nọ whọ rẹ rọ fa usu na? Otẹrọnọ whai imava wha sae ta ẹme ovao-dhe-ovao, o nwani kiehọ tere he re whọ rọ ifonu vi uwou sei inọ whọ be fa usu na. Ukpoye, whai imava na wha rọwo fihọ oke gbe oria nọ wha sae jọ ta ẹme nana nọ o wuzou gaga na.

 Ohrẹ Ebaibol: “Wha ta uzẹme kẹ ohwohwo.”—Zẹkaraya 8:16.

 Kọ nọ whọ tẹ fa usu orọo nọ whọ be nya, onana u dhesẹ nọ whọ riẹ oware jọ ru hu? O rrọ ere vievie he. Kareghẹhọ nọ oware nọ whọ jẹ rọ fiki riẹ nya usu orọo na họ re whọ riẹ iroro nọ whọ rẹ jẹ, sọ whọ rẹ rehọ ohwo na hayo whọ rẹ rehọ ohwo na ha. Usu na o tẹ make fa, whọ sai gbe wuhrẹ emamọ eware jọ noi ze.

 Nọ omara nọ: ‘Eme mẹ jọ usu nana wuhrẹ kpahe omobọ mẹ? Kọ usu nana u fiobọhọ kẹ omẹ ruẹ eware jọ nọ u fo nọ mẹ rẹ gbẹ daoma fihọ taure mẹ tẹ te rọo? Otẹrọnọ mẹ te nya usu orọo ọfa evaọ obaro, kọ u wo oware jọ nọ u fo nọ me re nwene?’