“Evaọ imikpe jọ nọ e vrẹ, mẹ jẹ ruawa gaga. Kẹdẹ kẹdẹ o jọ wọhọ ẹsenọ erae e rrọ oma mẹ to yọ mẹ be gwọlọ furie ei. Oke yena, mẹ jẹ gwọlọ nọ me re kpe oma mẹ no. Orọnikọ mẹ ginẹ gwọlọ whu hu, rekọ mẹ gwọlọ nọ edada na i re serihọ.”—Jonathan, nọ ọ rrọ ikpe 17.

 Nọ a kiẹ emọ ekọleji nọ i bu te idu ikpegbene (14,000) riwi, omọvo evaọ usu imasoi a ta nọ a wo iroro epanọ a re ro kpe omarai no evaọ emerae 12 nọ e vrẹ na. a Eme whọ rẹ sai ru nọ uzuazọ o tẹ bẹ owhẹ no?

•   Thihakọ. Gbaemu nọ orọnikọ oware kpobi nọ o nwane ziọ owhẹ iroro who re ru hu. Eware nọ e be kẹ owhẹ uye e tẹ make rrọ buobu, u wo eware nọ whọ rẹ sai ru nọ i re fiobọhọ kẹ owhẹ thihakọ rai.

 O sae jọ owhẹ oma wọhọ ẹsenọ a kare owhẹ dhe oria jọ. Rekọ oghẹrẹ nọ who rri eware ere e rẹ nwane jọ họ. U wo idhere sa-sa nọ a sai ro ku ẹbẹbẹ ra na họ. Whọ tẹ ruẹ edhere otiọye jọ, ẹbẹbẹ ra na ọ sai kuhọ vẹrẹ vi epanọ who roro.

•  Ohrẹ Ebaibol: “A be nwẹ omai evaọ kabọ kabọ, rekọ a keke omai ba ugbẹhẹ hẹ; eware i re dhe omai ọvẹ, rekọ idhere na kpobi i di hi.”—2 Ahwo Kọrint 4:8.

   Oware nọ whọ rẹ sai ru: Nọ iroro uwhu e tẹ be hae ziọ owhẹ udu ẹsikpobi hayo nọ e tẹ rrọ gaga, roro kpahe oware nọ who rẹ sai ru hayo eria nọ who re kpohọ nọ a sae jọ fiobọhọ kẹ owhẹ. Whọ sai kpohọ ọspito hayo se inọmba ahwo nọ a re fiobọhọ kẹ ahwo nọ i wo iroro uwhu. A wuhrẹ ahwo nọ a bi ru iruo evaọ eria nana ziezi no yọ a ginẹ gwọlọ fiobọhọ kẹ owhẹ.

•   Ta kẹ ohwo jọ. Ahwo nọ a you owhẹ nọ a gwọlọ fiobọhọ kẹ owhẹ a riẹ. Ahwo nana a sae jọ ahwo uviuwou ra hayo egbẹnyusu ra. Whọ gbẹ ta ẹbẹbẹ ra kẹ ae he, a sae riẹ oware nọ o be kẹ owhẹ uye he.

 O gwọlọ nọ ahwo jọ a re ku ẹno họ re a sae ruẹ ude ziezi. Epọvo na re, ogbẹnyusu ọ rẹ sai fiobọhọ kẹ owhẹ rri ebẹbẹ ra epanọ u fo je ru nọ whọ sai ro si iroro uwhu no udu.

•  Ohrẹ Ebaibol: “Emamọ ogbẹnyusu . . . [yọ] oniọvo nọ a yẹ fiki oke idhọvẹ.”—Itẹ 17:17.

   Oware nọ whọ rẹ sai ru: Whọ tẹ gwọlọ ta ẹme na kẹ ohwo jọ, whọ sae ta nọ: “Anwọ oke jọ ze na, me bi wo ekpehre iroro. Kọ mẹ sae vuẹ owhẹ kpahe iẹe?” Hayo whọ sae ta nọ: “Me wo ẹbẹbẹ jọ rekọ mẹ riẹ epanọ mẹ sai ro ku ei họ họ. Kọ whọ sai fiobọhọ kẹ omẹ?”

•   Nyae ruẹ edọktọ. Ẹyao iroro hayo ọkora e rẹ lẹliẹ ohwo roro iroro uwhu. Rekọ a rẹ sai siwi eyao nana.

 Wọhọ epanọ ẹyao owọre o re ru nọ emu ọ gbẹ ruọ ohwo oma ha na, ere ọvona ọkora o re ru uzuazọ bẹ ohwo no. Rekọ a rẹ sai siwi eyao nana.

•  Ohrẹ Ebaibol: “Ahwo nọ oma rai o ga a gwọlọ ọbo-imu hu, rekọ enọ e be mọ e gwọlọ ọbo-imu.”—Matiu 9:12.

   Oware nọ whọ rẹ sai ru: Daoma hae wezẹ ziezi, ru eware nọ i re ru oma ra jaja, jẹ re emamọ emu. Oghẹrẹ nọ oma ra o rrọ o sai kpomahọ oghẹrẹ nọ who re rri eware evaọ uzuazọ.

•   Lẹ. Ebaibol na ọ ta nọ Ọghẹnẹ “ọ rro vi udu mai jẹ riẹ eware kpobi.” (1 Jọn 3:20) Whọ sae lẹ sei nẹnẹ na. Se odẹ riẹ Jihova evaọ olẹ ra, jẹ ta eva ra kẹe.

 Ebẹbẹ jọ e wọhọ owha ogbẹgbẹdẹ, fikiere whẹ ọvo whọ sae wọ ae he. Jihova nọ ọ ma owhẹ na, ọ ginẹ gwọlọ nọ o re fiobọhọ kẹ owhẹ.

•  Ohrẹ Ebaibol: “Wha . . . ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te sẹro udu rai gbe ogaga iroro rai.”—Ahwo Filipai 4:6, 7.

   Oware nọ whọ rẹ sai ru: U te no ebẹbẹ ra nọ whọ rẹ ta kẹ Jihova no, daoma roro kpahe emamọ oware jọ nọ o ru kẹ owhẹ no nẹnẹ na, re who yere iei kẹ oware na. (Ahwo Kọlọsi 3:15) Nọ who te wo uruemu uyere-okẹ, onana u re fiobọhọ kẹ owhẹ roro kpahe emamọ eware evaọ uzuazọ.

 Iroro uwhu e tẹ be ziọ owhẹ udu, kpohọ oria nọ a sae jọ fiobọhọ kẹ owhẹ. Oware yena Jonathan nọ ma fodẹ evaọ obehru na o ru. Ọ ta nọ: “Me lele ọsẹgboni mẹ ta ẹme unuẹse buobu yọ me kpohọ ọspito. Enẹna oma mẹ o woma vi epaọ ọsosuọ no. Dede nọ ẹsejọ eva e rẹ were omẹ hẹ, iroro uwhu e gbẹ be ziọ omẹ udu hu.”