Kọ oma o be hae rrọ owhẹ gaga? O tẹ rrọ ere, uzoẹme nana o sae fiobọhọ kẹ owhẹ!

•  Oware nọ o be whae ze

•  Oware nọ u je wuzou

•  Oware nọ whọ rẹ sai ru

•  Ẹme nọ ehwa ra a ta

•   Owha nọ o vrẹta. Ọmọtẹ jọ nọ a re se Julie ọ ta nọ: “Ofẹ kpobi nọ who rri evaọ uzuazọ, ẹme nọ who re yo họ,” “kru obọ ga, jọ oma o rrọ owhẹ hẹ, daoma jọ ohwo ologbo nọ a rẹ kpao ovao rri odẹnotha. Oma o rẹ rrọ ohwo nọ o te bi yo eme itienana ẹsikpobi!”

•   Ekọmputa gbe Ifonu. Taso tuvo, “obọ u bi no” ifonu gbe ekọmputa ha evaọ akpọ ọgbọna—Yọ o tẹ reria obọ no, o sae lẹliẹ oma rrọ ohwo.

•   Nọ ohwo ọ gbẹ be wezẹ ziezi hi. “Izoge buobu a be kaki kiẹzẹ hẹ, yọ ọkpa o ri bo ho a kpama no fiki isukulu, iruo hayo omaweromẹ akpọ, yọ enẹ ọvo ma ti ro yeri akpọ na vrẹ na,” ere ọmọtẹ jọ nọ a re se Miranda ọ ta. Uzuazọ utiona o rẹ whọlọ ohwo oma fihotọ.

 Ebaibol ọ ta nọ u fo re ohwo ọ ga oma iruo. (Itẹ 6:6-8; Rom 12:11) Rekọ, orọnọ o be ta nọ ohwo o whu họ ehru iruo ho, nọ o gbe wo uvẹ kẹ eware efa ha—onana u re kpe oma.

 “Ẹdẹjọ me ruiruo okpẹdoke soso ababọ emu nọ mẹ kareghẹhọ re, keme iruo buobu e vọ omẹ obọ nọ me je ru. Oyena u wuhrẹ omẹ areghẹ inọ orọnikọ iruo kpobi nọ a ro se ohwo ọ rẹ rehọ họ—mẹ sae kpe oma mẹ kufiẹ fiki iruo ho.”—Ashley.

 Gheghe he Ebaibol ọ rọ ta nọ: “Arakọ ọkpokpọ o woma vi okpohrokpo owhuowhu.” (Ọtausiuwoma Na 9:4) Ẹsejọhọ whọ sae roro nọ obọ ra u gbe bi no iruo ho oye u ti ru owhẹ ga oma—O sae ginẹ jọ ere. Rekọ who te bi ru vrẹ onọ omara u te, riẹ nọ i re hrẹ nyẹ ohwo evaọ obaro.

•   Whọ jẹ iruo kpobi rehọ họ. Ebaibol ọ ta nọ: “Areghẹ ọ rẹ jọ rọ kẹ enọ e rehọ oma kpotọ.” (Itẹ 11:2) Ohwo nọ ọ riẹ epanọ ẹgba riẹ o te, o re dede iruo nọ a ro sei kpobi rehọ họ.

   “Oma o rẹ rrọ ohwo nọ ọ gbẹ riẹ epanọ a rẹ siọ iruo ho, otẹrọnọ iruo kpobi o re dede rehọ. U woma re who ru vrẹ onọ omara u te he. E gbẹ make yao owhẹ oma obọnana ha, riẹ nọ e rrọ obaro hẹrẹ owhẹ.”—Jordan.

•   Hae wezẹ da oma. Ebaibol ọ ta nọ: “Ẹkuobọ ọvo nọ ọ vọ avọ udhedhẹ o woma vi ekuabọ ivẹ nọ unye avọ oma odawọ evaọ ofou.” (Ọtausiuwoma Na 4:6) A ta nọ owezẹ “oye o rẹ lẹliẹ ẹvori na dhidhivi,” rekọ izoge buobu e be sae wezẹ te ehwa ikpe hayo eree dede he evaọ aso wọhọ epanọ oma na o gwọlọ.

   “Ẹsikpobi nọ iruo e tẹ vọ omẹ obọ, mẹ rẹ gwọlọ wezẹ tere he. Rekọ mẹ tẹ daoma wezẹ ziezi, okioke riẹ oma u re vori omẹ, mẹ rẹ jọ sasasa je ruiruo jaka jaka.”—Brooklyn.

•   Wo Omaa. Ebaibol ọ ta nọ: “[Omaa] omamọ ohwo o rẹ rehọ ọruẹriọ tha.” (Itẹ 21:5) Whọ gbẹ be raha oke fihọ eware evere he, ukpoye whọ tẹ be rehọ iẹe ruiruo nọ ẹgba ra o mu, u ti fiobọhọ kẹ owhẹ gaga evaọ uzuazọ.

   “Nọ ohwo o te wo omaa, ọ rẹ sae whaha oghẹrẹ ebẹbẹ jọ nọ ohwo ọvo ọ rẹ rọ obọ siwi se omariẹ na. Whọ tẹ ma omaa lele iruo nọ e rrọ owhẹ obọ, u ti fiobọhọ kẹ owhẹ ru iruo na ziezi ababọ oma nọ o te rrọ owhẹ vrẹta.”—Vanessa.