Evaọ usu eware ene nana, ọvẹ whọ sai ro dhesẹ obruoziẹ-iroro ra?

•   ekọmpase

•   ughẹgbe

•   ogbẹnyusu

•   obruoziẹ

 Uyo na họ aikpobi na. Ma te jọ uzoẹme nana ta kpahe oware nọ o rọ rrọ ere.

•  Eme họ obruoziẹ-iroro?

•  Fikieme u ro fo re who wuhrẹ obruoziẹ-iroro ra?

•  Ẹvẹ whọ sai ro wuhrẹ obruoziẹ-iroro ra?

•  Ẹme nọ ehwa ra a ta

 Obruoziẹ-iroro yọ oware nọ o rrọ oma ohwo nọ u re fiobọhọ kẹe riẹ oware uwoma gbe uyoma. A jọ Ebaibol na dhesẹ iẹe wọhọ “uzi nọ a kere họ evaọ eva” ohwo-akpọ. (Ahwo Rom 2:15, Ebaibol Ẹri Na) Emamọ obruoziẹ-iroro o re fiobọhọ kẹ owhẹ roro kpahe oware nọ who bi ti ru sọ u ti kiehọ hayo u ti kiehọ họ, gbe oware nọ who ru no, sọ u kiehọ hayo u kiehọ họ.

•   Obruoziẹ-iroro ra ọ wọhọ ekọmpase. O rẹ kpọ owhẹ họ edhere re who gbe ru oware nọ o rẹ wha uye ze he.

•   Obruoziẹ-iroro ra ọ wọhọ ughẹgbe. U re fiobọhọ kẹ owhẹ riẹ oghẹrẹ ohwo nọ whọ ginẹ rrọ evaọ obeva, sọ who wo emamọ uruemu.

•   Obruoziẹ-iroro ra ọ wọhọ emamọ ogbẹnyusu. O rẹ sae kẹ owhẹ emamọ ohrẹ, yọ otẹrọnọ whọ ginẹ gaviezọ kẹe, eware i re woma kẹ owhẹ.

•   Obruoziẹ-iroro ra ọ wọhọ obruoziẹ. O re gu owhẹ ẹdhọ nọ who te ruthọ.

 Ẹme na họ: Obruoziẹ-iroro ra o wuzou gaga, keme o rẹ sai fiobọhọ kẹ owhẹ (1) jẹ emamọ iroro (2) je fiobọhọ kẹ owhẹ riẹ inọ who ruthọ, who ve nwene.

 Ebaibol ọ ta nọ ma “sẹro emamọ obruoziẹ-iroro.” (1 Pita 3:16) Rekọ who re wo emamọ obruoziẹ-iroro taure whọ tẹ sẹro riẹ, koyehọ who re wuhrẹ obruoziẹ-iroro ra tao.

 “Mẹ jẹ hai gu ọrue kẹ ọsẹgboni mẹ kpahe oria nọ mẹ nya, yọ mẹ rẹ vuẹ ohwo ọvo ho. Oke ọsosuọ udu o jẹ hai brukpe omẹ, rekọ nọ u te oria jọ no, me gbe je rri rie fihọ oware ọvo ho.”—Jennifer.

 Uwhremu na, obruoziẹ-iroro Jennifer o te fiobọhọ kẹe nọ ọ jẹ hae rọ ta kẹ ọsẹgboni riẹ kpahe eware kpobi nọ o bi ru, ọ gbẹ jẹ viẹ ae họ họ.

 Roro kpahe onana: Oke vẹ who roro nọ obruoziẹ-iroro Jennifer o hae te kaki ru ei riẹ nọ oware nọ o bi ru na o thọ?

 “Uye o rẹ bẹ ohwo wo umuo ho nọ ọ tẹ be hae jọ iraro ahwo nọ ọ riẹ ziezi ru wọhọ emamọ ohwo, rekọ a gbẹ riẹ hẹ, o ve ru ofa. Nọ obruoziẹ-iroro ra ọ tẹ kẹ owhẹ uvẹ ru oware uyoma jọ no, ẹdẹfa whọ te gbẹ daezọ tere he nọ who te bi ru oware uyoma ofa.”—Matthew.

 Ahwo jọ a rẹ daezọ họ nọ obruoziẹ-iroro rai ọ tẹ maki bi brukpe ai. Ebaibol ọ ta nọ ahwo otiọye na “a zẹ omovuọ rai no riẹriẹriẹ.” (Ahwo Ẹfisọs 4:19) A jọ Ebaibol Good News Translation fa oria yena nọ: “A gbe wo omovuọ họ.”

 Roro kpahe onana: Kọ ahwo nọ obruoziẹ-iroro rai o re brukpe he, ae uzuazọ rai o mai woma? Ebẹbẹ vẹ ahwo otiọnana a re wo?

 Ẹme na họ: Re whọ sai wo emamọ obruoziẹ-iroro, who re ‘wuhrẹ ẹgba orimuo ra re whọ sai vuhu oware uwoma gbe uyoma.’—Ahwo Hibru 5:14.

 Re whọ sai wuhrẹ obruoziẹ-iroro ra, u re wo oware jọ nọ who re rri hayo nọ o rẹ kpọ owhẹ evaọ oware kpobi nọ who bi ru. Ahwo jọ a re rri jẹ rọ aro kele:

•   ahwo uviuwou gbe ẹwho rai

•   ehwa rai

•   ahwo nọ odẹ rai u bi do evaọ ifimu

 Rekọ ehrẹ Ebaibol nọ ohwo o re rri ro yeri uzuazọ u woma vi eyena kpekufiẹ. Yọ o rẹ siọ ere ba ẹjọ họ keme “ẹkwoma ẹzi Ọghẹnẹ” a ro kere Ebaibol na. Whaọ Ọghẹnẹ họ Ọnọ ọ ma omai yọ ọye ọ riẹ oware nọ o mai woma kẹ omai.—2 Timoti 3:16.

 Joma rri eware jọ nọ Ebaibol ọ ta.

 OHRẸ EBAIBOL: “Ma be gwọlọ ru eware kpobi avọ oruọzewọ.”—Ahwo Hibru 13:18.

•   Ẹvẹ ẹme yena ọ sai ro fiobọhọ kẹ obruoziẹ-iroro ra nọ whọ tẹ be gwọlọ rri tho evaọ ẹdawọ, gu ọrue kẹ ọsẹgboni ra hayo thuji?

•   Nọ obruoziẹ-iroro ra ọ tẹ be hai fiobọhọ kẹ owhẹ ru oware nọ u fo ẹsikpobi, kọ who gbe roro nọ o te wha erere se owhẹ enẹna gbe evaọ obaro?

 OHRẸ EBAIBOL: “Dhẹ siọ ọfariẹ-ogbe ba.”—1 Ahwo Kọrint 6:18.

•    Oghẹrẹ vẹ ohrẹ yena o sai ro fiobọhọ kẹ obruoziẹ-iroro ra nọ oma o tẹ be hae gwọlọ wọ owhẹ rri ifoto-ẹbẹba hayo gbe-ọfariẹ?

•   Nọ obruoziẹ-iroro ra ọ tẹ be hai fiobọhọ kẹ owhẹ dhẹ siọ ọfariẹ-ogbe ba, ewoma vẹ o ti noi ze te owhẹ enẹna gbe evaọ obaro?

 OHRẸ EBAIBOL: “Wha dhesẹ uwowou kẹ ohwohwo, wo uvi ọdawẹ, wha rọvrẹ ohwohwo riẹriẹriẹ.”—Ahwo Ẹfisọs 4:32.

•    Ẹvẹ ohrẹ yena o sai ro fiobọhọ kẹ owhẹ nọ ẹwhọ ọ tẹ rrọ udevie ra avọ oniọvo ra hayo ogbẹnyusu ra?

•   Nọ obruoziẹ-iroro ra ọ tẹ be whae ze nọ whọ rọ rrọ wowou jẹ be hae rọvrẹ amọfa, erere vẹ o ti te owhẹ enẹna gbe evaọ obaro?

 OHRẸ EBAIBOL: “Jihova . . . o mukpahe ohwo kpobi nọ ozighi ọ rẹ were.”—Olezi 11:5.

•    Oghẹrẹ vẹ ohrẹ Ebaibol yena o sai ro fiobọhọ kẹ owhẹ nọ who te bi rri ifimu hayo fa igemu?

•   Nọ obruoziẹ-iroro ra ọ gbẹ be kẹ owhẹ uvẹ rri ekpehre ifimu hayo fa ekpehre igemu hu, erere vẹ o ti te owhẹ enẹna gbe evaọ obaro?

 OWARE NỌ O VIA: “Egbẹnyusu mẹ a jẹ hae fa igemu ozighi gaga, yọ mẹ jẹ hae fa re. Rekọ ọsẹ mẹ ọ tẹ ta kẹ omẹ nọ mẹ gbẹ fa igemu ozighi na ha. Fikiere oke nọ mẹ nyae ruẹ egbẹnyusu mẹ ọvo mẹ rẹ rọ fa, yọ me te te uwou, mẹ rẹ vuẹ ohwo ọvo kpahe iẹe he. Ọsẹ mẹ ọ jẹ hae nọ omẹ sọ eware e rrọ ziezi, me ve yo kẹe nọ Ee. Ẹdẹ jọ, me te se Olezi 11:5. Mẹ tẹ ruẹ nọ oware nọ me bi ru na u yoma gaga gbe inọ u fo nọ mẹ rẹ siọ igemu ozighi na ba. Ere mẹ rọ ginẹ seba. Nọ ogbẹnyusu mẹ jọ ọ ruẹ nọ mẹ seba no, ọyomariẹ ọ tẹ siọ igemu ozighi na ba re.”—Jeremy.

 Roro kpahe onana: Oke vẹ obruoziẹ-iroro Jeremy o ro mu ei họ ebrukpe, kọ oke vẹ ọ rọ gaviezọ kẹe? Eme who wuhrẹ no iku Jeremy na ze?

 Ẹme na họ: Obruoziẹ-iroro ra o re dhesẹ oghẹrẹ ohwo nọ whọ rrọ gbe oware nọ o roja kẹ owhẹ evaọ uzuazọ. Eme obruoziẹ-iroro ra ọ be ta kpahe owhẹ?