Aroza nọ ọmaha o re jo wuhrẹ oware okpokpọ u re fiobọhọ nọ ẹvori riẹ o re ro ruiruo ziezi, keme ọ te hai roro ku eware ekpokpọ gbe epanọ o re ro ru ai. Onana u re ru nọ ọmọ ọ rẹ rọ jọ sasasa nọ ọ be rro ze na, ọ vẹ jẹ riẹ epanọ a rẹ rọ abọ ru eware.

 Eroza itieye jọ họ:

•   Eware nọ a rẹ drọ

•   Eware wọhọ ikeki nọ a re ru

•   Edrama nọ a re ru

•   Ile nọ a rẹ so

•   Oghẹrẹ aroza nọ a rẹ jọ rọ onaa fi eware họ ehru ohwohwo ma kpobọ ehru

•   Aroza nọ a re ro ku eware (ohwo ọ tẹ be rọ makọ ekatọno ku eware, ọ rẹ jọ uzou riẹ roro ku eware buobu)

 Evaọ erẹwho buobu, ahwo a gbẹ be zaharo nọ a re jo ru oware okpokpọ họ. Eroza nọ ahwo a rẹ jọ keria rri ughe hayo enọ amọfa a ruẹrẹ fihọ no ọvo e be mai were ae.

 Ẹvẹ ẹme nana o ro te owhẹ?

•   Oware nọ u fo nọ whọ rẹ riẹ

•   Oware nọ whọ rẹ sai ru

•   Aroza nọ a re jo wuhrẹ oware okpokpọ o rẹ lẹliẹ ọmọ jọ ziezi nọ ọ be rro ze na. O rẹ lẹliẹ ọmọ wo oma okpokpọ, kru obọ ga, wo areghẹ nọ a re ro ru eware sa-sa, ọ rẹ jẹ riẹ ru ziezi nọ ọ tẹ rrọ kugbe amọfa. U re je fiobọhọ kẹ emaha wo odiri, riẹ oware nọ u fo nọ a tẹ be jiroro. Ere ọvo gbe he, a rẹ sae jẹ kpọ ofu rai, je lele amọfa zaharo ababọ ẹwhọ. Eware nana kpobi i re fiobọhọ kẹ ae riẹ ọkpako jọ.

•   Ọmọ o te bi rri ifimu, ekọmputa, hayo ifonu ga hrọ, o rẹ sae wha ẹbẹbẹ ze. Ahwo nọ a kiẹ kpahe ebẹbẹ nọ oware utiona o rẹ sae wha ze a ta nọ o rẹ lẹliẹ ọmọ fu fihọ, jẹ jọ ohwo nọ eva i re kri ẹdha ha. A ta nọ jọ esẹgbini a yọroma kẹ eware itiena nọ a re ro whrehe emọboba rai oviẹ nọ a gbẹ rrọ kugbe ai hi.

•   O rẹ wha ebẹbẹ jọ ze nọ ọmọ ọ gbẹ be rọ iroro obọriẹ ru oware ovo ho. Nọ esẹgbini a tẹ be hae rọ emọ rai kpohọ oria erozaha nọ a ruẹrẹhọ no ẹsikpobi, hayo nọ a gbẹ be kẹ ai uvẹ zaharo kẹ omarai hi, a te sai wo uvẹ kẹ aroza nọ o rẹ lẹliẹ ai roro je ru eware kẹ omarai hi.

•   Jọ emọ ra a hae zaharo nọ o ro fiobọhọ kẹ ai wuhrẹ eware ekpokpọ. Hae kẹ emọ ra uvẹ re a ruọ otafe nyae zaharo. U re fiobọhọ kẹ ae riẹ oghẹrẹ nọ erao, ire, gbe emama Ọghẹnẹ efa e rrọ. Jọ a hae rọ ikolo gbe eware itieye na zaharo. Onana u re je fiobọhọ kẹ ae riẹ epanọ a re ru eware. a

   Roro kpahe enọ nana: Emamọ uruemu gbe onaa vẹ ọmọ mẹ ọ rẹ sai wo, nọ ọ tẹ be hae zaharo nọ o re jo wuhrẹ eware ekpokpọ? Ẹvẹ eware itiena nọ o re wuhrẹ e sai ro fiobọhọ kẹe ẹdẹfa?

   Ohrẹ Ebaibol: “Oma na nọ a re ru jaja o rẹ kẹ . . . erere.”—1 Timoti 4:8.

•   Whọ kẹ emọ ra uvẹ re a hai rri TV, ifonu, hayo ekọmputa ẹsikpobi hi. Re whọ tẹ te kẹ emọ ra eware itieye na, roro kpahe ebẹbẹ nọ e rẹ sae wha ze. Edọktọ nọ i wuhrẹ kpahe oma emọboba a ta nọ u fo ho re emọ nọ i ri te ikpe ivẹ hẹ a hai rri etẹlẹvisiọno, ifonu, gbe ekọmputa. A tẹ jẹ ta kpahe emọ nọ e rrọ umuo ikpe ivẹ rite ikpe isoi inọ, u fo re a rri eware itieye na vrẹ auwa ọvo okpẹdẹ hẹ. b

   Roro kpahe enọ nana: Ẹvẹ mẹ te kẹ ọmọ mẹ uvẹ rri TV, ifonu, hayo ekọmputa kri te? Kọ u fo re mẹ jọ kugbei nọ o te bi ru eware nana? Eme ọfa ọmọ mẹ ọ rẹ sai ru, o gbẹ nwane jọ nọ TV, ifonu hayo ekọmputa o re rri ẹsikpobi hi?

   Ohrẹ Ebaibol: “Wha fiẹrohotọ ziezi re wha ruẹ nọ oghẹrẹ nọ wha be nya o rrọ wọhọ igheghẹ hẹ rekọ wọhọ ahwo nọ a wo areghẹ.”—Ahwo Ẹfisọs 5:15, 16.

•   Roro kpahe oware nọ o rẹ sai noi ze otẹrọnọ eroza nọ a ruẹrẹhọ no ọvo ọmọ ra ọ be hai rri ẹsikpobi. Uzẹme riẹ họ, emọ i te bi rri ifimu hayo arozaha wọhọ ebọro gbe oghẹrẹ itieye efa, o sae lẹliẹ ae riẹ kpahe eroza nana ziezi. Rekọ kareghẹhọ nọ a te bi ru eware nana ga hrọ, oma o rẹ rrọ ai, makọ te esẹgbini nọ e rẹ wọ emọ rai kpohọ eria itiena je zihe ze. U fo nọ a re je roro kpahe ohrẹ nọ o rrọ Ahwo Ẹfisọs 5:15, 16 evaọ ẹme nana.

   Roro kpahe enọ nana: Kọ eroza nọ a ruẹrẹhọ no, nọ emọ mẹ e be hae nya, i bu ga hrọ? O tẹ rrọ ere, eme mẹ rẹ sai ru re erozaha itieye nọ emọ mẹ e rẹ nya i gbe bu ga hrọ họ?

   Ohrẹ Ebaibol: “Vuhu eware nọ e mae roja.”—Ahwo Filipai 1:10.