Emọ jọ a re kpozi uwou hu evaọ oke nọ ọsẹgboni a fihọ kẹ ae. Efa i re gu ọrue kẹ esẹgbini rai hayo lẹlẹ no uwou nyabru egbẹnyusu rai. Eme who re ru nọ ọmọ ra o te ru oware nọ who gbe ro fievahọ iẹe he?

•  Kọ ọmọ mẹ na ọ be ghẹmeeyo?

•  Kinọ ọmọ mẹ ọ tẹ viẹ omẹ họ?

•  Ono ọ soriẹ ze?

•  Ẹvẹ me ti ro fiobọhọ kẹ ọmọ mẹ ru oware nọ mẹ rẹ rọ wariẹ fievahọ iẹe?

•  Ẹme nọ esẹgbini a ta

 O nwane rrọ ere he. Ebaibol ọ ta nọ: “Ugheghẹ o vọ udu uzoge.” Oghẹrẹ nọ izoge buobu a be hai ru u dhesẹ nọ ẹme yena uzẹme. (Itẹ 22:15, ẹme-obotọ) Ọzae jọ nọ o wuhrẹ kpahe uruemu ahwo, nọ a re se Dr. Laurence Steinberg o kere nọ, “Ẹsejọ izoge a rẹ rọ okpakpa ru eware, je ru eware igheghẹ.” Ọ ta re inọ: “Riẹ nọ eware e te hae thọ ae obọ.” a

 Whọ nwani roro nọ ọmọ ra o bi yiwi aro ho. Ahwo nọ a kiẹ kpahe uruemu izoge a ta nọ izoge a rẹ gwọlọ ru oware nọ esẹgbini rai a re ro fievahọ ae, dede nọ ẹsejọ o rẹ wọhọ nọ a be daezọ oyena ha. Ọmọ ra ọ tẹ maki ru wọhọ ẹsenọ oware nọ o ru thọ na o da riẹ hẹ, o sae jọ nọ o be jọ obeva dae gaga inọ o ru eva dha owhẹ.

•    Kọ ahwo nọ o bi kuomagbe? Ebaibol ọ ta nọ: “Usu uyoma o rẹ raha uruemu ezi.” (1 Ahwo Kọrint 15:33) Izoge a rẹ rọ aro kele egbẹnyusu rai gaga. Ahwo nọ a bi lele ta ẹme evaọ ifonu gbe itanẹte, te enọ a be ruẹ evaọ ifimu gbe etẹlẹvisiọno a rẹ sae raha emamọ uruemu rai. Whaọ izoge a ri wo areghẹ tere he, fikiere nọ a te bi lele usu utionana a re ru eware igheghẹ. O rẹ wọhọ ẹsenọ a ku ithu gbe eza. O make rrọ ere na, u fo nọ izoge a rẹ riẹ nọ ohwo ọ tẹ jẹ owọ thọ, ọ rẹ rọ uzou riẹ wha oware nọ u no rie ze. Onana u ti ru ai wo areghẹ.

•    Kọ mẹ soriẹ? Ẹsejọhọ who ti roro nọ obọ ogaga nọ who bi ro kru ọmọ na jabọ nọ ọ be rọ ghẹmeeyo. Yọ whọ sai roro nọ whọ rehọ e riẹ robọ ga hrọ, oyejabọ nọ ọ rọ raha na. Ukpenọ who roro nọ whọ riẹ ọmọ na yọrọ họ jabọ nọ o ro ru oware na, roro kpahe epanọ whọ sai ro ku ẹbẹbẹ nọ ọ rrọ otọ na họ.

•   Nẹ oma ra. Ẹsejọhọ ọmọ ra ọ riẹ nọ eva e te siọ owhẹ ba ẹdha ha. Kọ u gbe ti woma re whọ gba ofu ra? Rọ unu kpotọ nọe oware nọ o lẹliẹ e riẹ ru oware na. Kọ ọ fake dawo oware na re ọ riẹ epanọ o rrọ? Kọ uwou na o bẹ riẹ no? Kọ ọ gwọlọ wo egbẹnyusu re ọ siọ oma ba emuhọ? Uzẹme riẹ họ, eware yena e rẹ kẹe udu nọ ọ rẹ rọ ghẹmeeyo ho. Rekọ e rẹ sae lẹliẹ owhẹ riẹ oware nọ ọmọ ra o bi roro, gbe oware nọ o soriẹ nọ o ro ru oware nọ o ru na.

   Ohrẹ Ebaibol: “Ohwo kpobi ọ rẹ jọ ọnọ ọ rẹ kake gaviezọ, ọnọ ọ rẹ rọ okpakpa ta ẹme he, ọnọ ọ rẹ kaki mu ofu hu.”—Jemis 1:19.

•   Lele ọmọ ra ta ẹme kpahe oware nọ o via na. Nọe enọ wọhọ, Eme who wuhrẹ no oware nọ o via na ze? Eme whọ rẹ sai ru ẹdẹfa nọ who te wo ẹbẹbẹ otiọna? Enọ itiena i re fiobọhọ kẹ ọmọ ra wo areghẹ.

   Ohrẹ Ebaibol: “Kẹ ọwhọkuo, kẹ unuovẹvẹ ogaga, kẹ uduotahawọ avọ odiri ọgaga gbe onaa ewuhrẹ kpobi.”—2 Timoti 4:2.

•   Jọ ọ ruẹ umuye jọ fiki oware nọ o ru na. Whọ tẹ kẹe uye nọ u wobọ kugbe oware nọ o ru na, oye o te mai fiobọhọ kẹe nwene. Oriruo jọ họ, otẹrọnọ ọmọ ra ọ vuẹ owhẹ taure ọ tẹ te dhẹ omoto ra vrẹ hẹ, whọ rẹ sae vuẹe inọ ọ te gbẹ dhẹ omoto na evaọ etoke jọ họ.

   Ohrẹ Ebaibol: “Oware kpobi nọ ohwo ọ be kọ, oye o ti vu.”—Ahwo Galesha 6:7.

•   Oware nọ o rẹ mae jọ owhẹ oja họ, epanọ who re ro fiobọhọ kẹ ọmọ na ru eware nọ e rẹ sae lẹliẹ owhẹ wariẹ fievahọ iẹe. Ma riẹ nọ onana o te via asohẹrioke he. Rekọ ru re ọ riẹ nọ ọ sae wariẹ ru eware nọ who re ro fievahọ iẹe. Daoma fiobọhọ kẹe vuhu onana mu. Who te ru ọmọ ra roro nọ whọ sai gbe fievahọ iẹe ofa ha, ọ te gbẹ daoma viere he.

   Ohrẹ Ebaibol: “Wha ru uzou dhe emọ rai hi, re a gbẹ jọ ọkọkora ha.”—Ahwo Kọlọsi 3:21.