Ezae-avọ-eyae jọ nọ i bi wo ẹbẹbẹ evaọ orọo rai a re roro nọ a tẹ fa orọo na, oye o te mai kiehọ emọ rai oma. A rẹ jọ udu rai ta nọ orọo na nọ a rẹ fa oye o te mai woma kẹ emọ na ukpenọ a rẹ jọ uwou nọ ọsẹgboni a be jọ họre kẹdẹ kẹdẹ. Kọ ere o ginẹ rrọ?

•  Ẹvẹ o rẹ jọ emọ oma nọ ọsẹgboni rai a tẹ fa orọo?

•  Kọ ma tẹ fa orọo, ẹsiẹe emọ mai a te mae wereva?

•  Eme u fo nọ mẹ rẹ riẹ kpahe ahwo nọ a fa orọo no nọ a bi kuobọgbe yọrọ ọmọ?

•  Kọ u wo edhere ọfa nọ ma sai ro ku ebẹbẹ mai họ?

 Ahwo nọ a kiẹ kpahe orọo-ofa a ruẹ nọ ọsẹgboni a tẹ fa orọo, o rẹ raha uzuazọ emọ na kuotọ. Eware jọ nọ e rẹ sae via kẹ emọ itieye họ:

•   a re mu ofu, jọ awawa, jẹ jọ ọkọkora

•   a rẹ họre uthu

•   a re feli hayo siọ isukulu ba

•   a rẹ mọ kẹse kẹse

 U te no enana no, emọ itiena buobu a rẹ fuọ omarai inọ ae a ru nọ ọsẹgboni rai a rọ fa orọo hayo inọ a hae sai ru oware jọ rọ whaha iẹe.

 Ebẹbẹ nọ orọo-ofa ọsẹgboni o rẹ wha se emọ na o rẹ sae jarae oma rite ọkpako. Nọ a be kpako ze na, a sai rri omarai inọ a fioka ha, yọ o rẹ jọ bẹbẹ kẹ ae re a fievahọ amọfa. U te no ere no, emọ itieye na a te wo ẹbẹbẹ evaọ orọo rai ẹdẹfa, ae a rẹ mae fa orọo rai.

 Ẹme na họ: Dede nọ ahwo jọ nọ a gwọlọ fa orọo rai a re roro nọ oye o mai kiehọ kẹ emọ rai, otu nọ o rẹ kiẹ kpahe orọo-ofa a ruẹ nọ ere o rrọ họ. Aye jọ nọ a re se Penelope Leach nọ o wuhrẹ kokodo kpahe uzuazọ emaha o kere nọ: “Orọo-ofa o rẹ lẹliẹ iyẹ yẹ emọ.” a

 Ehri-uzi Ebaibol: “Wha gwọlọ ewoma obọrai ọvo ho, rekọ ewoma amọfa re.”—Ahwo Filipai 2:4.

 Ahwo jọ a roro nọ ere o rrọ. Rekọ kareghẹhọ nọ evaọ ẹsibuobu, orọnikọ oware nọ u kiehọ ọsẹgboni oma oye u re kiehọ emọ rai oma ha. Ohwo nọ ọ gwọlọ fa orọo ọ be gwọlọ epanọ eware i re ro nwene kẹe evaọ uzuazọ. Rekọ ẹsibuobu, orọnọ oware nọ ọmọ ọ gwọlọ oye he. Ọ gwọlọ nọ ọsẹgboni riẹ a rẹ gbẹ rria kugbe.

 Ahwo jọ a kiẹ kokodo kpahe erọo idu buobu nọ e fa no. Kẹsena a tẹ jọ obe jọ nọ a kere nọ uzoẹme riẹ o rrọ The Unexpected Legacy of Divorce ta nọ: “Oware nọ ma ruẹ vevẹ ona: emọ ahwo nọ a fa orọo rai a ta vievie he inọ enẹna eva e be mae were ae. Ẹme nọ a ta họ, ‘Nọ ọsẹgboni mẹ a fa orọo, uzuazọ mẹ o tẹ raha muotọ.’” A tẹ jẹ jọ obe na ta nọ, nọ ọsẹgboni a tẹ fa orọo, emọ i re rri akpọ na wọhọ oria nọ “a rẹ sai jo fievahọ ohwo ọvo ho, oria nọ uye o sai jo te ai lọlọhọ keme ọsẹgboni rai nọ u fo nọ a rẹ kpekpe ziezi a hẹriẹ no.”

 Ẹme na họ: Eva e rẹ were emọ họ nọ ọsẹgboni rai a tẹ fa orọo.

 Ehri-uzi Ebaibol: “Uweri u re mi ohwo ẹgba.”—Itẹ 17:22.

 Ezae avọ eyae jọ nọ a fa orọo no a rẹ gwọlọ kuobọgbe yọrọ ọmọ rai wọhọ ẹsenọ a gbẹ rrọ oria ovo. Rekọ o lọhọ tere he. Ahwo nọ a rẹ kiẹ kpahe eware itieye a ta nọ:

•   ọzae avọ aye nọ a fa orọo no a rẹ jọ kugbe emọ rai tere he

•   ọsẹ o te bi wuhrẹ emọ rai oware jọ, yọ oni na o bi wuhrẹ ai oware ofa

•   ezae avọ eyae itieye na a rẹ kẹ emọ rai uvẹ re a ru onọ u je rai keme owha nọ a wọ o gbẹdẹ hrọ hayo fikinọ a wo unu nọ a rẹ rọ kpọ emọ na họ họ fiki orọo nọ a fa na

 U te no ere no, emọ nọ ọsẹgboni rai a fa orọo no ae a rẹ mai veghe uzou. Kọ ẹvẹ o gbẹ jọ ere he na? Whaọ ọsẹgboni rai omarai a ru oware nọ u fo ho. Emọ na a sae jọ udu rai ta nọ, ‘Fikieme mẹ rẹ rọ gaviezọ kẹ ọsẹgboni mẹ kpakiyọ a koko eyaa nọ a ya kẹ ohwohwo ho?’

 Ẹme na họ: Nọ ọzae avọ aye nọ a fa orọo no a te bi kuobọgbe yọrọ emọ, uye o rẹ bẹ ae gaga. Rekọ emọ na uye o rẹ mae tubẹ bẹ.

 Ehri-uzi Ebaibol: “Wha ru uzou dhe emọ rai hi, re udu u gbe whrehe ae hi.”—Ahwo Kọlọsi 3:21, ẹme-obotọ.

 Nọ ohwo ọ tẹ fa orọo, ọmọziọ uye ọ rẹ ruẹ hẹ re ọ wariẹ mu akpọ họ. O rẹ tubẹ mai woma re ọ daoma fihọ orọo na ukpenọ ọ rẹ fae. Obe jọ nọ uzoẹme riẹ o rrọ The Case for Marriage o ta nọ: “Ahwo jọ a re roro nọ orọo nọ a bi jo wo ẹbẹbẹ u re gbe woma viere ofa ha, rekọ ere o rrọ vievie he. Nọ oke o be nyaharo na, ezae-avọ-eyae buobu nọ a je wo evawere vẹre he, a re mu evawere họ ewo ziezi evaọ orọo rai.” U te no ere no, emọ nọ ọsẹgboni rai a rrọ kugbe ae eware e rẹ mae riẹ nya kẹ.

 Onana u dhesẹ nọ a rẹ fa orọo vievie he he. Uzẹme riẹ họ, Ebaibol na ọ ta nọ ọzae hayo aye o te bruẹnwae, ohwo ọdekọ na ọ sae fa orọo na. (Matiu 19:9) Rekọ Ebaibol ọ tẹ jẹ ta nọ “ọnọ o wo orimuo o re rri otọ mu re ọ tẹ te jowọ.” (Itẹ 14:15) Fikiere u fo nọ ezae-avọ-eyae nọ e be gwọlọ fa orọo rai fikinọ a bi wo ẹbẹbẹ, a re rri otọ mu ziezi. Oware jọ nọ a re roro kpahe họ, epanọ uzuazọ emọ rai o te jọ nọ a tẹ fa orọo na.

 Rekọ onana u dhesẹ nọ orọo mai o rẹ jọ orọ oja nọ ma rẹ jọ thihakọ ọvo ho. Ma rẹ jọ Ebaibol ruẹ emamọ ehrẹ nọ i re fiobọhọ kẹ ezae-avọ-eyae wo evawere jẹ lẹliẹ orọo rai tọ. O rrọ ere keme Jihova, Ọghẹnẹ nọ ọ ma ọzae avọ aye re a jọ orọo na, ọye o wo eme nọ e rrọ Ebaibol na.—Matiu 19:4-6.

 Ehri-Uzi Ebaibol: “Mẹ Jihova, mẹ họ Ọghẹnẹ ra, Ọnọ o bi wuhrẹ owhẹ re who wo erere kẹ omara.”—Aizaya 48:17.